7
1 Yayewe imwani! Ngola nga mundu úwagenda ha nyuma lyaꞌbimbuzi iri anashondooza imisigala,
haliko, anabonaga ndaayo íki sigiiri.
Ndaagwo mutiini gwo nangalya, mbu njaluuke.
Kiri neꞌbitumbwe byeꞌmizabibu, ndaabyo bikiri ho.
2 Yabo booshi ábâli simbahiri Rurema, batakiri ho.
Mu kihugo kyoshi, mutakiri mundu mwija.
Si abandu booshi bakola mu yitana.
Banagweti bagakizi tegana umubashu.
3 Balyagagi beeshu mu kukola amabi naꞌmaboko gaabo.
Abimangizi, naꞌbatwi beꞌmaaja, bali mu huuna ikitulire.
Abagale, ngiisi byo baloziizi, kwo banali mu gira igambi lyoꞌkubilonga.
4 Mu kati kaabo, kundu bangadetwa kwo balyagagi biija, banabe boꞌkuli,
si bakola mu shuta nga mishuugi.
Aaho! Ulusiku lwinyu lwoꞌkuhanwa, keera lwahika!
Ngiisi mundu agapumukira haage-haage.
5 Mutakolwe mbu mukizi biika umulangaaliro ku mutuulani,
kandi iri ku mwira wawe.
Hatanagire byo mugabwira kiri na bakiinyu.
6 Si umwana mutabana akoli gweti agagayiriza yishe.
Noꞌmunyere akola mu yihindulira nyina.
Noꞌmwali-kazi naye, akola mu yihindulira navyala.
Abagoma boꞌmundu bagaaba baabalya ba mu mbaga yage.* 7.6 Mataayo 10.35-36.
7 Si Abahisiraheeri boohe, bagweti bagaadeta kwokuno:
Niehe, ngaloogeza ubutabaazi imwa Nahano.
Ngalindirira Rurema, bwo ye gangiza.
Ee! Rurema wani aganyuvwa!
8 E bagoma baani! Mutagaki mbonyoleza.
Mukuba, kundu nangaagwa, haliko ngaki vyuka.
Na kundu nangaba mbwatiiri mu kihulu,
haliko Nahano agaaba akiri mulengeerwe gwani.
9 Nâli gweti ngayifunda mu byaha imbere lya Nahano,
kyanatuma agandakarira.
Kundu kwokwo, agaki mbulanira imbere lyaꞌbatwi beꞌmaaja.
Ee! Agandeetera ngiisi íbingwaniini.
Hanatame, anandwale mu mulengeerwe,
halinde na mbone ngiisi kwo angololera íbihengamiri.
10 Yago gooshi, abagoma baani bagagabona, banateerwe neꞌshoni.
Si bo bâli kizi deta, mbu: «Rurema Nahamwinyu, alyagagi hayi?»
Kundu bakadeta kwokwo, ngaki bona ngiisi kwo bagaagwa.
Banakizi libatwa-libatwa, nga bidaka bya mu njira.
Hisiraheeri ataaha
11 E Bahisiraheeri! Mu siku ízâye yije, inzitiro za mu twaya twinyu zigashubi yubakululwa.
Kiri neꞌmbibi zeꞌkihugo kiinyu zigayajabulwa.
12 Yikyo kyanya, abandu biinyu bagayiji mùgalukira.
Bagalyoka i Hasuriya, halinde mu twaya tweꞌMiisiri, kiri ku lwiji Hefuraati.
Baganalyoka ku nyaaja, na ku migazi íri hala.
13 Ikihugo kigaashaka, kinabe kimaata,
mukuba ábakoli tuuziri mwo, keera babihuuka bweneene.
Abandu bahuuna Rurema
14 E Nahano! Ukizi langa abandu baawe.
Si biryagagi bibuzi byawe.
Na bwo bikoli rambiri byonyene mu lubako, ukizi bilanga neꞌngoni yawe.
Leka bikizi ragirira ubwasi, áhayeziri i Bashaani neꞌGiryadi
nga kwo byâli kizi gira yaho keera.
15 E Nahano, utuyereke kandi ibitangaaza byawe,
nga kwo wâli kizi bigira, mu kutulyosa mu buja i Miisiri.
16 Yibyo bitangaaza, ikyanya ibinyamahanga bigabibona,
lyo bigateerwa neꞌshoni hiꞌgulu lyoꞌbukaholwe bwabo.
Bagakizi biika ukuboko ku kanwa,
iri banaziba amatwiri.
17 Yibyo binyamahanga, bigakizi yibulula mu luvu, nga mujoka.
Binalyoke mu tuhonga twabo, mu kuyiji juguma imbere lya Rurema Nahamwitu.
Bagagwatwa neꞌkyoba imbere lyage.
18 Aahago! Hayi ho twangashubi bona ugundi Rurema úkushushiri!
Si wehe naaho, we gweti úgakoga ibyaha byaꞌbandu!
Ee! Abandu baawe ábasigiiri, utagweti ugakizi loleekeza ibyaha byabo.
Utanayamiri ugarakarira abandu baawe halinde imyaka neꞌmyakuula.
Haliko, usiimiri ukuyerekana urukundo úlutâye male.
19 Uganashubi tuyuvwirwa indengeerwa.
Ibyaha biitu ugabilibata-libata mwiꞌdako lyaꞌmagulu gaawe,
ukabuli bilasha mu kalingi keꞌnyaaja.
20 Ugatuyereka ngiisi kwo uli mwemeera,
unakizi tukunda ku rukundo úlutâye male.
Kwokwo, kwo ukalagaania bashokuluza biitu
Hiburahimu, na Yakobo ukulyokera keera.