1 Dokopa nambame kandeopa, Sipisipi Ŋaŋa dokome wakaiya jepae kalange dutupanya wambao doko taka lea. Dopa piamopa, ema pingi kitomende dutupanya mendeme lao pituu, “Kanja ipu” lao wii lea doko kaiti toka lele piamopa sio. 2  Sak 1:8; 6:3Dokopa osa kyeo lapae mende ipao katea. Osa dokonya akali mende yanda minatae petea doko kiŋi balu mende maiya. Maitiamopa baa yanda pyoo ita minala paanya pea.

3 Peamopa, Sipisipi Ŋaŋa dokome wakaiya jepae lapo pyoo doko taka leamopa, ema pingi lapo pyoo dokome lao pituu, “Ipu” leamo sio. 4  Sak 1:8; 6:2Dokopa osa kate pyapae mende epea dokonya akali mende petea. Akali dokome yuunya endakali dupa mona setao katenge doko kaeyapala, mende pyaa-pyaa pyoo katena lao, konjuwa andake mende baa maiya.

5  Sak 6:2Maitiamopa, Sipisipi Ŋaŋa dokome wakaiya jepae tepo pyoo doko taka leamopa, ema pingi tepo pyoo dokome lao pituu, “Kanja ipu” leamo sio. Dokopa osa pumbutapae mende ipao katea. Osa dokonya petea akali dokonya kingimi sekele mende minia. 6 Dokopa nambame siopa, ema pingi kitomende dutupanya kaina-kaina dupanya-kaita pii mende lea dokome dapa lea: “Silipa muni mendaimi* Silipa muni mendaimi latae kalyamo doko, muni etete andake mende lao latae kalyamo. wita dii kapo mendai sambapenge. Silipa muni mendaimi bali dii kapo tepoma sambapengeaka. Dopaka doko, welepi, waenepi dupa koeyasala naeyapengena” lea.

7 Dopa leamopa, Sipisipi Ŋaŋa dokome wakaiya jepae kitomende pyoo doko taka leamopa, ema pingi kitomende pyoo dokome lao pituu, “Kanja ipu” leamo sio. 8  Esek 14:21Dokopa osa kala yelo mende ipao katea. Osa dokonya mende pituu epea dokonya kenge doko Kumingi lenge. Endakali kumapae dupa katengema panda dokome baa watao epea. Baame yuu pitaka kitomende pyoo lita petala, dokonya mende doko konjuwapi, lopo andakepi, yainapi, mena yanapi kapu dupapi, dupame pyao kumasina lao pupu lapae doko Kumingi doko maiya.

9 Maitiamopa, Sipisipi Ŋaŋa dokome wakaiya jepae yungi pyoo doko taka leamopa, Gotenya pii dokopa, Sipisipi Ŋaŋa dokonya lao pii dokopa, dolapo endakali mendapuame lao paneaminosa pyao kumasiami dupanya imambu dupa alta pundipundi dokonya kateamino kandeo. 10 Dokaitame puu lao, lao pituu, “Akali Andake, emba kuni nasingi, kiningi pii lenge. Isa yuu dakenya endakali palelyamino dupame naimanya taeyoko miniamino dokonya embame andukupa yapatala yanu pyatepe?” leami. 11 Dopa leaminopa, dokaita mendai-mendai lao yonge pee londe, kyeo lapae mendapu maiya. Maitala dokaita lamaiyoo, “Nyakama pyao kumasiaminoliaka pyoo, nyakamanya kalai tole pingi, Kristene kaiminingi mendatupa apata pyao kumasepenge dutupa pyao kumasoo etapena, gii kuki mendalapo apata koto nyoo malisalapa” lea.

12  Ais 13:10; Joele 2:10,31; 3:15; Matyu 24:29; Make 13:24-25; Luku 21:25; Rev 11:13; 16:18Dokopa Sipisipi Ŋaŋa dokome wakaiya jepae tokange pyoo doko taka leamopa, titiwali andake mende miniamo kandeo. Dokopa lapalapa iti pumbutapaeme wasepae joo niki doko pumbuteamopa, kana doko pitaka taeyoko pyoo kate pia. 13  Ais 34:4Poo yale mende lelya dokome piki ita dupa ema-ema pilyamopa, dii wambu napingi lyilya dupa kondao isa yuunya kopo lengeli pyoo, kaitinya bui dupa pitaka kondao isa yuunya kopo lea. 14  Rev 16:20Dopa piamopa, kaiti doko pepa yoko lakengeli pyoo lakao nyokonyia. Dokopa yuu mandapi, yuu ailenepi, dupa pitakame nyakamanya singi panda dupa yakinatala yukuu peami. 15  Ais 2:19,21Peaminopa yuunya kiŋipi, akali kenge singipi, amii isingi mupapi, yuunya kamongopi, akali kyetopi, kalai akalipi, mee endakalipi, dupa pitaka yuu manda dupanya kanandapi, kana singi kainapi, dupanya pao yalo piami. 16  Osea 10:8; Luku 23:30Dopa petala dokaitame yuu mandapi, kanapi dupa lamaiyoo, “Kiŋi toko dokonya petenge akali dokome naima nakandao, Sipisipi Ŋaŋa dokonya imbu kaenge doko naima-kisa naipaowaka pina, nyakama tanapala naima sanga pyalapa. 17  Joele 2:11; Mal 3:2Sipisipi Ŋaŋa dokonya imbu kaeyapenge gii andake doko ipatelyamona, endakali apimi toeya katapala kapa pao wanditape?” leami.