1 Jisasame lao pituu, “Kingdom kaiti-kisa singi doko dapale: Gii mendepa akali mendeme baanya enda watapae pyala ipatoo lateamopa, wanaku mapukae akalita mendatupame nyakamanya lama dupa minao baa kandanyemana latala peami. 2  Wanaku mapukae dutupanya yungi masepae epe palenge. Yungi dutupa masepae epe napalenge. 3  Wanaku masepae epe napalenge dutupame nyakamanya lama dupa minao pao pituu, wele wakao mendatupa kamuu namandeami. 4  Wanaku masepae epe palenge dutupame nyakamanya lama dupa minao pao pituu, wele wakao mendatupa kamuu mandyoo peami. 5  Akali enda kelyea doko yapa naepeamosa, wanaku mapukae dutupa lemonguti latala luu paleami. 6  Palipiaminopa, kuka andatombe dokonya wii mende lea dokome lao pituu, ‘Akali enda kelyalamo doko ae epelyamona, nyakama kandanyalapale ipupa’ lea. 7  Dopa leamopa, wanaku mapukae dutupa pitaka sakatatala, nyakamanya lama dupa depa leami. 8  Dokopa wanaku masepae epe napalenge dutupame wanaku masepae epe palenge dutupa lamaiyoo, ‘Naimanya lama datupa konjalanya pilyamona, nyakamanya wele dupanya mendatupa naima dyepa’ leami. 9  Dopa leaminopa, wanaku masepae epe palenge dutupame pii yanu pyakamaiyoo, ‘Wele datupame naimapi, nyakamapi pitaka kapa napapome-lamona, wele salimi lengema dupa-kisa nyakama waka sambala pupa’ leami. 10  Dokopa wanaku dutupa wele sambala pateaminopa, akali enda kelyea doko epea. Epeamopa wanaku depa latae peteami dutupa baa-pipa enda watapae dokonya nee nalanya andakote kolandeami. Kolandateaminopa kaitini doko pai leami. 11  Luku 13:25Maitakao wanaku mapukae yangi dutupa ipupala lao pituu, ‘Kamongo, Kamongo, naimanya kaitini lumbakapoko’ leami. 12  Dokopa baame yanu pyao, ‘Nambame nyakama kiningi langilyo: Nambame nyakama nakandengena’ lea. 13  Dopana, Akalinya Ikiningi doko gii andukupa ipatape lao nyakamame masala naelyaminona, nyakama kandao isoo kalyepape” lea.

14  Luku 19:11-27“Akalinya Ikiningi ipupenge doko, akali mende baa yuu londati mendakaita patoo latala, baanya kalai akali dupa wii lao nyepala, baanya oapi dupa pitaka kandao isoo katekena leamo dopale. 15  Baanya kalai akali dupame mana kandengemali pyoo kalai pyaamino lao akali dokome masetala, muni mendatupa mokosoo maiya. Mende silipa muni yungi maiya. Mende silipa muni lapoma maiya. Mende silipa muni mendai maiya. Maiyu petala baa paanya masia dokonya pea. 16  Pateamopa silipa muni yungi nyia akali dokome pupala, muni dutupame minao kalai petala, silipa muni yungi konda pyoo nyia. 17  Dopaka pyoo, silipa muni lapoma nyia akali dokome silipa muni lapoma konda pyoo nyiaka. 18  Dopaka doko, silipa muni mendai nyia akali doko pupala, baanya akali andake dokonya muni doko yuu koko yuli pia.

19  “Yuu gii longo pateamopa, kalai akali dutupanya akali andake doko pilyetala, muni maiya dutupame aipa pyekeamipi lao kanjanya epea. 20  Ipateamopa silipa muni yungi nyia akali dokome yungi konda pyoo minao ipupala lao pituu, ‘Akali Andake, embame namba silipa muni yungi diino dokonya, nambame yungi konda pyoo nyekeona kanda’ lea. 21  Dopa leamopa, baanya akali andake dokome baa lamaiyoo, ‘Emba kalai akali epe dokome, nambame leoli pyoo yaka pyekee-lamo! Muni kuki dio dutupa leoli pyoo, embame auu pyoo isii-lamo dokonya, nambame emba longo isoo kata latoana, embapa nambapa mona setao katambana ipu’ lea. 22  Dokopa silipa muni lapoma nyia akali doko apata ipupala lao pituu, ‘Akali Andake, embame namba silipa muni lapoma diino dokonya, nambame lapoma konda pyoo nyekeona kanda’ lea. 23  Dopa leamopa, baanya akali andake dokome baa lamaiyoo, ‘Emba kalai akali epe dokome, nambame leoli pyoo yaka pyekee-lamo! Muni kuki dio dolapo leoli pyoo, embame auu pyoo isii-lamo dokonya, nambame emba longo isoo kata latoana, embapa nambapa mona setao katambana ipu’ lea. 24  Dokopa silipa muni mendai nyia akali doko apata ipupala lao pituu, ‘Akali Andake, emba akali tomba nelyenopa nambame kandenge. Embame wakamanya ee waingi pokatae dupanya nee yukuu mandenge. Wakamanya ee wai lyandatae dupanya dii lyao mandengeaka. 25  Dopa pingi dokonya namba paka kaeyapala, embanya silipa muni doko nambame yuu koko yuli piona, muni doko dakena kanda’ lea. 26  Dopa leamopa akali andake dokome baanya pii yanu pyakamaiyoo, ‘Emba kalai akali koo, maka-maka kaeyapae-lamo. Nambame wakamanya ee waingi pokatae dupanya nee yukuu mandyoo, wakamanya ee wai lyandatae dupanya dii lyao mandengeaka-lumu doko, 27  wakao mendatupa apata nyema ipatenopa lao, nambanya muni doko beŋenya setakateno! 28  Silipa muni mendai baa-kisa silyamo doko nyepala, silipa muni akalita setelyamo akali doko maiyepa. 29  Matyu 13:12; Make 4:25; Luku 8:18Aipumape, longo lao singi endakali doko baa konda pyoo maita. Maitamopa baa-kisa longoaka seta. Dopaka doko, nasingi endakali doko-kisa kuki seta dutupa baa-kisa nasina lao tange nyokonyeta. 30  Matyu 8:12; 22:13; Luku 13:28Dopana, nyakamame kalai akali koo-lamo dake kamalya iminjetae dokonya soo pyale lapa. Panda dokonya endakali dupa ee lao, nenge giti-gato lao nao katatamina’ ” lea.

31  Matyu 16:27; 19:28“Tanga Akalinya Ikiningi doko baanya tii pipae dokonya pituu, enjele Gotenya latae dupa pitaka-pipa ipata. Ipupala baanya kiŋi toko tii pipae dokonya pitita. 32  Dokopa akali tata dupa pitaka baanya enombanya kambu pyatami. Dopa petataminopa, sipisipi setao katenge mendeme sipisipipi, memepi yapao wakale katasingili pyoo, baame endakali dupa yapao wakale kataseta. 33  Dopa pyoo pituu, baame sipisipi dupa baanya kingi tolaetena katena lata. Meme dupa baanya kingi koeyatena katena lata. 34  Dokopa kingi tolaetena katatami dokaita kiŋi dokome lamaiyoo, ‘Nambanya Takange dokome nyakama auu pisetae. Baanya kingdom doko nyakama ditona latala, yuupa kaitipa dolapo tee pia dokopa depa laanya setekea doko nyakama etete nyalapale ipupa. 35  Aipumape, namba lopo kaeyopa, nyakamame namba nee diami. Endaki nanu kaeyopa, nyakamame namba endaki kamuu diami. Opone epeopa, nyakamame namba nyoo setao paleami. 36  Yonge pee napyoo kateopa, nyakamame namba yonge pee diami. Yaina siopa, nyakamame namba kanja epeami. Anjetae paleopa, nyakamame namba kanja epeamina’ lata. 37  Dopa latamopa, endakali tolatae dupame yanu pyao, ‘Kamongo, emba andukupa lopo kaeyenopa, naimame kandatala nee diama? Andukupa endaki nanu kaeyenopa, naimame emba endaki kamuu diama? 38  Andukupa opone epeenopa, naimame kandatala emba nyoo setao paleama? Andukupa yonge pee napyoo kateenopa, naimame emba yonge pee diama? 39  Andukupa yaina siinopapi, anjetae paleenopapi, naimame emba kanja epeamape?’ latami. 40  Dopa lataminopa kiŋi dokome dokaitanya pii yanu pyakamaiyoo, ‘Nambame nyakama kiningi langilyo: Nambanya kaiminingi datupanya kenge nasingi mende nyakamame nisiamino dokome, namba nisiaminosaka piana’ lata.

41  “Dopa latala baame kingi koeyatena katatami dokaita lamaiyoo, ‘Nyakama watao pyatae dupa namba yakinatala, Satanepi, baanya enjelepi dupanya itate tao kalyu katenge depa laanya setakamaiya dokonya pupa. 42  Aipumape, namba lopo kaeyopa, nyakamame namba nee nandiami. Endaki nanu kaeyopa, nyakamame namba endaki kamuu nandiami. 43  Opone epeopa, nyakamame namba nyoo setao napaleami. Yonge pee napyoo kateopa, nyakamame namba yonge pee nandiami. Yaina siopapi, anjetae paleopapi, nyakamame namba kanja naepeamina’ lata. 44  Dopa latamopa dokaitame yanu pyao, ‘Kamongo, andukupa emba lopo kaeyenopapi, endaki nanu kaeyenopapi, opone epeenopapi, yonge pee napyoo kateenopapi, yaina siinopapi, anjetae paleenopapi, naimame kandatala nisala naeyamape?’ latami. 45  Dopa lataminopa kiŋi dokome dokaitanya pii yanu pyakamaiyoo, ‘Nambame nyakama kiningi langilyo: Nyakamame endakali datupanya kenge nasingi mende nisala naeyamino dokome, namba nisala naeyaminosaka piana’ lata. 46  Dan 12:2Endakali kingi koeyatena katatami dokaita tanda nenge panda dokonya etao patami. Dopaka doko, endakali tolatae dupa lete etete katenge panda dokonya etao patamina” Jisasame lea.