1  Matyu 21:33-46; Luku 20:9-19 Ais 5:1-2Jisasame kongali pii mendapu dokaita tee pyao lamaiyoo, “Akali mendeme yuu mende kakopatala, waene ee pokea. Pokatala dii lyao nyepala waene ipange nyalanya dii dupa indyepenge yuli mende tombao wasia. Wasetala ee doko kandao isoo pitipenge anda ketae mende pia. Dopa petala ee pokenge akali mendatupa baame lamaitala, waene dii mendatupa tange nyepengena, ee doko isoo katekena lea. Dopa latala baa yuu londati mendakaita pao katea. 2  Waene wambu pingi gii doko epeamopa, baanya kalai akali mende ee isakamaingi dupa kateami dokonya pupala, waene dii mendapu lyao peekena lao nyala pena lea. 3  Kalai akali doko pateamopa, ee isakamaingi dupame baa minatala pyao indiami. Dopa petala baa mee pena leami. 4  Dokopa ee tange dokome kalai akali mende pena lea. Kalai akali doko pateamopa, ee isakamaingi dupame baa kaname aiyomba pyao lombapala, mana koo elya pipae mendapu baa-kisa minatala pena leami. 5  Dokopa kalai akali mende apata pena lateamopa, doko pyao kumasiami. Dokopa baame kalai akali longo mendapu apata pena leamopa, yangi dupa pyao indyepala, yangi dupa pyao kumasiami. 6  Ee tange dokonya ikiningi mendai iki, baanya mona setenge doko katea. Ee tange dokome lao pituu, ‘Nambanya ikiningi doko anda-anda semaiyaminona’ latala, etao dokonya baanya ikiningi doko ee isakamaingi dupa kateami dokonya pena lea. 7  Wane doko epeamopa, ee isakamaingi dupame nyakama-lapo laloo pyoo, ‘Wane dakeme takangenya moeya dupa nyepengena, moeya dupa naimanya jetana, baa pyao kumasemana ipupa’ leami. 8  Dopa latala, wane doko minatala pyao kumasiami. Pyao kumasetala, baa waene ee dokonya kamalya pyale leami. 9  Dopa piami dokonya, waene ee tange dokome aipa pita? Baa ipupala, ee isakamaingi dupa pyao kumasetala, waene ee doko akali waka mendapuame isoo katekena lao maita. 10-11  Sam 118:22-23‘Anda pingi dupame anda pipenge kana mende koeyapae-lamo latala yakineami doko kana mupa jetelyamo. Kana mupa jetelyamo doko Kamongome pipya dokonya, naimame eteteaka auu kaeyao sanya kandelyamanona’ lao Gotenya pii pepa pyapae singi dokonya silyamo dake nyakamame itaki napiamipi?” lea.

12 Dokopa Juumanya isingi akali dupame kongali pii doko nyakama lao lalumuna lao sepala, baa anjemana lao kaitini kutiami. Kutiamiaka doko, endakali kambu doko paka kaeyapala, baa yakinatala peami.

13  Matyu 22:15-22; Luku 20:20-26Jisasame pii mende kopeta latamo dokonya baa mangenya minamana latala, Parasi mendapupi, Erote tata mendapupi, dupa baa katea dokonya pena leami. 14 Akali dupa pupala baa lamaiyoo, “Mana Lenge, embame endakali mende mona setapala, mende maka kaeyala naenge. Endakali kenge singipi, nasingipi dupanya mendeme emba mende latamini-lao paka nakaeyao, kiningi pii doko lao, Gotenya mana dupa tolao mana lengena lao naimame masilyamano. Dopana, Sisa doko takisa maipengena lao loome latae singipi nasingi? 15 Naimame baa takisa maipengepe, daape?” leami. Dopa leaminopa, Jisasame dupa mana tolatae miningi manemane pilyamino lao kandatala dokaita lamaiyoo, “Aipuma nyakamame namba makande pilyami? Muni konde mende kandatoo, nyoo pealapa” lea. 16 Dokopa dokaitame muni konde mende nyoo maitiaminopa, baame dokaita lamaiyoo, “Muni konde dakenya apinya lenge-lyaapi, kengepi dupa kalyape?” lea. Dopa leamopa dokaitame baa lamaiyoo, “Sisanya kalyamona” leami. 17 Dokopa Jisasame dokaitanya pii yanu pyakamaiyoo, “Sisanya dupa Sisa tange maiyakamaiyepape. Gotenya dupa Gote tange maiyakamaiyepape” lea. Jisasame dopa leamopa dokaitame baa paka kaeyao walu leami.

18  Matyu 22:23-33; Luku 20:27-40 Ap 23:8Endakali kumapae dupa sakatala naeyatamina lengema, Sadyusi dupa Jisasa katea dokonya ipupala baa lamaiyoo, 19  Diut 25:5“Mana Lenge, Mosesame naimanya mana mende dapa lao pepa pyanya setekea-pyaa: ‘Akali mendeme enda nyepala wane manja naeyao kumatamo doko, baanya kaiminingi dokome enda walyakae doko pisetala, kaiminingi dokonya lao wane manjakamaipengena’ laanya setekea-pyaa. 20 Dopana, kaiminingi kalange kateami dutupanya kaiminingi mupa doko enda nyepala, wane manja naeyao baa kumia. 21 Kumateamopa kaiminingi lapo dokome enda walyakae doko pisetala, wane manja naeyaowaka baa kumia. Kaiminingi tepo dokome enda walyakae dokoaka pisetala, wane manja naeyaowaka baa kumia. 22 Kaiminingi kalange dutupa pitakame enda dokoaka pisetala, wane manja naeyaowaka dutupa kumiami. Dutupa pitaka kumao ete dokonya enda doko kumiaka. 23 Kaiminingi kalange dutupa pitakame enda mendai dokoaka nyiami dokonya, endakali kumapae dupa sakatatami gii dokopa enda doko apinya jetape?” lao tipa piami.

24 Dokopa Jisasame dokaitanya pii yanu pyakamaiyoo, “Nyakamame Gotenya pii pepa pyapae singi doko masala naeyao, Gotenya kyeto doko masala naeyaowaka pingima. Tenge dokonya nyakamame kopeta lelyamino. 25  Endakali kumapae dupa malunya sakatatami gii dokopa, akali dupa enda nyala naeyao, wanaku dupa akali nyala paa naeyao, enjele kaiti-kisa katenge dupa katengemali pyoo katatami. 26-27  Eks 3:6Ita saka mendenya ita yuli teana lao Mosesanya buku dokonya pepa pyapae singi doko itaki napiamipi? Atome dokonya Goteme Mosesa lamaiyoo, ‘Abraamepi, Aisakepi, Jekopepi dutupanya Gote doko nambana’ lea. Baa kumapae dupanya Gote daa. Baa saka katenge dupanya Gote. Dopana, Goteme endakali kumapae dupa sakatasala naeyatana lao nyakamame lelyamino doko etete kopeta lelyaminona” lea.

28  Matyu 22:34-40; Luku 10:25-28Mosesanya loo mana nyepae dupanya mende ipao katea dokome Sadyusi dupame Jisasa pii yanda pimaiyami dupa sepa, Jisasame dokaitanya pii auu pyoo yanu pyakamaiya dupa sepaka pia. Dopa petala akali dokome Jisasa tipa pyoo, “Mana setapae dupa pitakanya anduku etete mupape?” lea. 29  Diut 6:4-5Dopa leamopa Jisasame baanya pii yanu pyakamaiyoo, “Mana setapae dupa pitakanya etete mupa doko langitoo: ‘Nyakama Israele dupame salapape! Naimanya Kamongo Gote doko baa mendai iki kalyamo. 30  Embanya monapi, embanya imambupi, embanya masingipi, embanya kyetopi, dutupa pitakame embanya Kamongo Gote doko auu kaeyape.’ Mana setapae doko etete mupa doko. 31  Lep 19:18Mana setapae lapo pyoo dake dopaleaka: ‘Emba tange auu kaengeli pyoo, embanya patali maki dupa auu kaeyape.’ Mana setapae dolapo ita minao, mana setapae waka mende alyasale nasilyamona” lea. 32  Diut 4:35Dopa leamopa Mosesanya loo mana nyepae dokome baa lamaiyoo, “Mana Lenge, doko kiningi. Gote baa mendai iki kalyamona, waka mende nakalyamona lelyeno doko, embame kiningi lelyeno. 33  Osea 6:6Monapi, masingipi, imambupi, kyetopi dutupa pitakame Gote auu kaenge dokopi, tange auu kaengeli pyoo patali maki dupa auu kaenge dokopi, mana setapae lapoma dolapome itatenya tao mulyina lao opaa yangengepi, kundi maingipi, dupa pitaka ita miningina” lea. 34 Akali dokome masetala auu pyoo yanu piamo doko Jisasame kandatala baa lamaiyoo, “Gotenya kingdom dokonya emba londatili nakalyenona” lea. Dopa lateamopa, endakali mendaipi mendeme baa pii mende dee tipa pyaanya paka kaeyami.

35  Matyu 22:41-46; Luku 20:41-44Jisasame lotuu anda nee nyetae kamapu dokonya mana lao pituu, “Mosesanya loo mana nyepae dupame Kraisa doko Dapitanya ikiningina lengema doko, aipa pyoo kandatala lengema? 36  Sam 110:1Oli Spiritame masepae maiyamopa Dapitame dapa lea: ‘Kamongome nambanya Kamongo doko lamaiyoo, “Emba nambanya kingi tolaetena piti. Dokonya pititinopa, nambame embanya yandapipi dupa embanya moko setenge toko jina latona” leana’ lea. 37  Dapitame Kraisa doko Kamongona lea-lumu doko, kaitini andukunya-kaita Kraisa doko Dapitanya ikiningipi?” lea. Jisasame pii lea doko endakali kambu andake kateami dupame auu kaeyao siami.

38  Matyu 23:5-7; Luku 11:43; 20:45-46Dokopa Jisasame dokaita mana lamaiyoo pituu dapa lea: “Mosesanya loo mana nyepae dupa nyakamame wandyoo kalyepape. Dokaita yonge pee londe pyoo petala kaitini paeyalanya auu kaengema. Maketa dupanya endakali dupame dokaita mambo pyao kingi nyimi laka lao masingima. 39  Lotuu anda dupanya toko enomba nyoo dupanya pitimu laka lao masingima. Nee andake nelyami dupanya enomba nyoo pitimu laka lao masingimaka. 40  Dokaitame enda walyakae dupa minakasetala, yuu andapi dupa nyingima. Endakali waka dupame dokaita epena lao masina latala, loma londe pyoo singima. Akali dupa-kisa tenge setatamopa, dupa tanda etete andake nyetamina” lea.

41  Luku 21:1-4Dopa latala, lotuu anda nee nyetae dokonya opaa pyandenge penge dokonya Jisasa tengesa pitipala, endakali kambu dupame aipa pyoo muni pyandelyamipi lao kandatae petea. Dokopa yuunya kamongo longome muni longo lao pyandeami. 42 Dopa piaminopa, enda walyakae daa jepae mende ipupala, muni konde etete yakane lapoma pyandea. 43 Dokopa Jisasame baanya disaipolo dupa epena latala lamaiyoo, “Nambame nyakama kiningi langilyo: Opaa pyandenge penge dokonya enda walyakae daa jepae dakeme muni pyandalamo dokome, endakali waka dupame muni pyandalamino dupa pitaka ita minao pyandalamo. 44  Endakali dokaitame nyakamanya muni longo sipya dupanya kakana nyoo pyandalamino. Dopa piminopa, enda daa jepae dakeme baa tange napenge sipya dupa pitaka pyandalamona” lea.