1 Pasopa nee andake nenge gii doko ipanya tengesa piamopa, isa yuu dake yakinatala Takange katenge dokonya pupenge gii doko ipatelyamona lao Jisasame masia. Dopa lao masetala, isa yuu dakenya tange, endakali Jisasanya latae dupa auu kaeya doko auu kaeyataeyaka katao pao baa kumia. 2 Alemandi nee nao peteaminopa, Saimone Iskariota ikiningi Judasa dokome yandapipi dupanya kinginya Jisasa maina lao, Sataneme baanya mona lungu petea. 3 Takangeme dupa pitaka baanya kinginya yakineana lao Jisasame masia. Baa Gote-kisa katao epeona, Gote katenge dokonya pilyotona lao masiaka. 4 Dopa lao masetala, Jisasa nee nao pituu sakatatala, baanya yonge pee kisa pingi dupa lyokanya setea. Dopa petala baame tauwele mende nyepala matapu pia. 5 Petala baame endaki kai lao disa mendenya pisetala, tee pyao baanya disaipolo dupanya moko wasa pyatapu, tauwele matapu pia dokome kunao nepata pyakamaiya. 6 Dopa pyoo pao Saimone Pita petea dokonya pyakameamopa, Pitame baa lamaiyoo, “Kamongo, embame nambanya moko wasa pyakalanya pilyipi?” lea. 7 Dokopa Jisasame baanya pii yanu pyakamaiyoo, “Nambame pilyo dake indupa embame masala naelyeno. Dopaka doko, tanga embame masetena” lea. 8 Dokopa Pitame baa lamaiyoo, “Embame nambanya moko wasa napyakapengena, tanga-tangapi napyakatena” lea. Dopa leamopa Jisasame baanya pii yanu pyakamaiyoo, “Nambame embanya moko wasa napyakato doko, emba nambanya daana” lea. 9 Dokopa Saimone Pitame baa lamaiyoo, “Kamongo, dopa-tamo doko, embame nambanya moko iki wasa pyakala naenya, kingipi aiyombapi dupa apata wasa pyaka” lea. 10 Dopa leamopa Jisasame baa lamaiyoo, “Endakali mende yonge pitaka wasa pyatae doko-kisa kuni nasingi dokonya, baa moko iki wasa pyapenge. Nyakama wasa pyatae kalyaminoaka doko, nyakama pitaka daana” lea. 11  “Nyakama pitaka daana” lea doko, baa yandapipi dupanya kinginya maipenge akali doko, dokona lao masetala lea.

12  Luku 22:27Jisasame baanya disaipolo dupanya moko wasa pyakamaiyoo etapala, baanya yonge pee kisa pingi dupa nyoo petala, baa isa petea. Isa pitipala baame dokaita lamaiyoo, “Nambame nyakamanya pyakalo dokonya tenge doko nyakamame masilyamipi? 13  Nyakamame namba Mana Lenge lata, Kamongo lata pilyamino doko namba dokoakana, nyakamame tolao lelyamino. 14  Namba nyakamanya Kamongo, Mana Lenge dokome nyakamanya moko wasa pyakato doko, nyakamame dopaka pyoo nyakama-lapo mendenya moko wasa pyaa-pyaa pyoo katapenge. 15  Nyakamame mana mendai dokoaka minao katataminopa lao, nambame nyakamanya pyakalo dokome makande mende setao pyakalo. 16  Matyu 10:24; Luku 6:40; Jone 15:20Nambame nyakama etete kiningi langilyo: Kalai akali mendeme baanya isingi akali doko ita naminingi. Wai minao penge endakali mendeme wai minao pena lenge endakali doko ita naminingiaka. 17  Nambame pii langilyo dupa nyepala, nyakamame dopaka pyoo katatamino doko, Goteme nyakama auu piseta. 18  Sam 41:9Nambame pii lelyo doko nyakama pitaka lao laa naelyo. Nambame endakali yapao nyio dupa nambame masilyo. Dopaka doko, Gotenya pii pepa pyapae singi dokonya, ‘Namba-pipa breta nao peteambano dokome namba pyalanya baanya moko sandange minalyiana’* Moko sandange minalyiana lelyamo doko, baanya yandapipi jia doko lao lelyamo. lapae singi doko angi jina lao lelyo. 19  Pii dutupa angi jetamopa, nyakamame namba akali doko-lamo lao masalapale lao, pii dutupa angi jala naeyamupa wambao nambame pii dutupa nyakama langilyo. 20  Matyu 10:40; Make 9:37; Luku 9:48; 10:16Nambame nyakama etete kiningi langilyo: Nambame pena lelyo endakali dupa auu kaeyao lanyilya endakali dokome namba lanyilyamosaka pingi. Namba auu kaeyao lanyilya endakali dokome namba puu lea Akali doko lanyilyamosaka pingina” lea.

21  Matyu 26:20-25; Make 14:17-21; Luku 22:21-23Jisasame pii dutupa latala, baa mona kenda kaeyapae etete andake mende nyepala lao panao, “Nambame nyakama etete kiningi langilyo: Nyakamanya mendeme namba yandapipi dupanya kinginya maiyapomona” lea. 22 Dopa lateamopa, disaipolo dupame nyakamanya mende doko api lao lelyape lao tatake kaeyapala, mende kanda-kanda piami. 23 Dopa piaminopa Jisasanya disaipolo dupanya mende, baanya mona setenge doko, baa-kisa semai latae petea. 24 Peteamopa Saimone Pitame doko api lao lelyape lao, semai latae petea akali dokome tipa pina lao aiyombame makande pia. 25 Dokopa Jisasa-kisa semai latae petea akali dokome Jisasa lamaiyoo, “Kamongo, doko apipi?” lea. 26 Dopa leamopa Jisasame yanu pyao, “Breta konjepae mende disanya supu silyamo dokonya poeyanyetala nambame maiyapo akali dokona” lea. Dopa latala baame breta konjepae mende disanya supu sia dokonya poeyanyetala, Saimone ikiningi Judasa Iskariota doko maiya. 27 Dokopa Judasame breta konjepae doko nyiamopa, Satane baa-kisa landa pia. Dopa peteamopa Jisasame baa lamaiyoo, “Embame pyaanya pilyino doko yapa pii” lea. 28 Jisasame dopa lao Judasa lamaiya doko, nee nao peteami akali dupanya mendaipi mendeme aipa lao lelyape lao masala naeyami. 29 Judasame muni bokosa doko isingi dokonyana, nee andake napenge dokonya nee daa jeta mendapu sambala pena lelyape, pande endakali daa jepae dupa nisoo oapi mendapu maiya pena lelyape lao yangi dupame masiami. 30 Dopa lao masiaminopa, breta konjepae doko Judasame nyepala, yapa kamaka kolalyia. Yuu kuiyetae kateamopa baa kamaka kolalyia.

31 Judasa kamaka kolalyeteamopa Jisasame lao pituu, “Indupa Akalinya Ikiningi doko kenge andake nyepelyamo. Akalinya Ikiningi doko-kisa Gote kenge andake nyepelyamoaka. 32  Akalinya Ikiningi doko-kisa Gote kenge andake nyepelyamo dokonya, Akalinya Ikiningi doko Gote-kisa katatamopa, Goteme baa indupaka kenge andake maiyapomo. 33  Jone 7:34Wane paluma, namba gii kuki mendatupa iki nyakama-pipa tole kalyamano. Namba patatopa nyakamame namba kutatamiaka doko, namba pelyo dokonya nyakama kapa pao naipatamina lao nambame Juu dupa lamaiyoliaka pyoo indupa nyakama langilyo. 34  Jone 15:12,17; 1 Jone 3:23; 2 Jone 5Mana enenge mende nambame nyakamanya setekelyo doko dake: Nyakama-lapo mende auu kae-kae pyoo kalyepape. Nambame nyakama auu kaelyoli pyoo, nyakama-lapo mende auu kae-kae pyoo kalyepape. 35  Nyakama-lapo mende auu kae-kae pyoo katatamino doko, nyakama nambanya disaipolo-lamo lao endakali dupa pitakame masetamina” lea.

36  Matyu 26:31-35; Make 14:27-31; Luku 22:31-34Dokopa Saimone Pitame Jisasa lamaiyoo, “Kamongo, emba anja pelyepe?” lea. Dopa leamopa Jisasame baanya pii yanu pyakamaiyoo, “Namba pelyo dokonya indupa embame kapa pao namba watao naipapeno. Dopaka doko, tanga embame namba watao ipatena” lea. 37 Dopa leamopa Pitame baa lamaiyoo, “Kamongo, aipuma indupa nambame kapa pao emba watao naipapo? Emba kumapenge dokonya namba alo pyoo kumatoana” lea. 38 Dokopa Jisasame baanya pii yanu pyakamaiyoo, “Namba kumapenge dokonya kiningi emba alo pyoo kumatepe? Nambame emba etete kiningi langilyo: Yaka pauli pii laa naeyatamopa, paa tepomasa embame namba nakandengena laapenona” lea.