1 Embame* 1 Ti 4:1 dake masepe: yuu etalanya pitamo dokopa kenda pipae etete koo dupa ipata. 2 Doko,* Lo 1:29-31 endakali dupame nyakama tange iki lao masoo muni putiti kayao, alyasale joo kalyamanona lao masoo, pii luiyapae dupa lao katatami. Dupame Gote kilya kandao, endangi takangepanya pii nepakamaiyoo, yaka pilino laanya masala nayao, koaka pyoo katatami. 3 Dupame endakali yango dupa auu nakayao, imbu kayatayaka katao, nambonambo pyoo, pyuani kayatamino dupa pyoaka katao, endakali pyao koyasoo, mana epe dupa yanda pimaitami. 4 Dee dupame endakali yango dupa yandapipi dupanya kingilyaka maiyoo, kopeta masingi dupa pupae lao watao minao, luiyawaka katao, Gote auu nakaenya endakalimi auu kaenge dupaka watao payao katatami. 5 Dupame* Mt 7:15,21; 24:4-5,24; Lo 2:19-20; Kl 2:23; Ta 1:16 Gote watao miningi endakali paele pitamiaka doko, ketae iki watao minatala angi naminao mee pitamina, embame endakali dopale dupa wandyuu katape. 6 Endakali* Ta 1:11 dopale dupanya mendapuame anda mendapuanya andiki andiki pyoo kolandatala enda mona napalenge dupanya masingi kakunyingima. Enda dupame nyakamanya koo dupa andakena lao masetala nea kaelyaminopa, nyipu laka lao masingi tata tata koo dupame pyalya lao nyingi. 7 Enda* Ap 17:21 dupame koteaka lao mana tata tata dupa nyingimaka doko, dupame kiningi pii doko kapa pao masala nayapengema. 8 Wamba* Eke 7:11,22; Jo 8:32; 1 Ti 2:4; 6:5; 2 Ti 2:25 akali Janisapa Jambatisapame Mosesenya kaita lyokao kateambinoliaka pyoo endakali dupame kiningi pii doko kaita lyokelyamino. Dupanya masingi dupa etete koyapumopa masoo miningi dokonya pakuatala lombapae soo kalyamino. 9 Dopaka doko, dupanya mana doko kapa pao andake nanjeta. Doko aipuma? Wamba akali Janisapa Jambatisapanya kyakaenge mana doko kandeaminoli pyoo, dupanya kyakaenge mana doko endakali dupa pitakame kandatami.

10 Dopaka* 1 Ko 4:9; 13:13 doko, nambame mana leopi, mana miniopi, kalai pio tengepi, Gote lao masoo minao kateopi, yapa maka nakayopi, endakali dupa auu kayopi, kyoto joo kateopi mana dutupa embame watao minii. 11 Endakali* Wee 34:19; Ap 13:14-52; 14:1-7,8-20; 2 Ko 11:23-27 dupame namba watao piamipi tanda diamipi dupa embame masilino. Andioko tangepi, Aikoniame tangepi, Lisata tangepi dupame namba-kisa mana koo longo minao watao piaminopa tanda nao kateo doko masilinoaka. Dupame dopa piaminopa Kamongo dokome dutupa pitakanya namba pyoo nyia. 12 Kataisa* Mt 16:24; Jo 15:20; Ap 14:22; Lo 8:36; 1 Te 3:4-5 Jisasapa pakatae katao Gotenya mana doko watao minamana lao masetamino endakali dupa pitaka yandapipi dupame watao pyatami. 13 Endakali* Ta 1:10 koo pingipi minakasingi endakalipi dupame koo dupa pima-pima pyoo pao nyakama tange kyakapala, endakali waka dupa kyakasetamiaka.

14 Dopaka* 1 Ti 6:20; 2 Ti 2:2 doko, embame mana nyoo kyoto joo masoo minao kateeno dupa mee minawaka katape. Doko, emba mana langiamano endakali dutupa embame masilino. 15 Embame* Jo 5:39; Ap 16:1; 2 Ko 3:14-18; 2 Ti 1:5 wane kolesa pituu indupa tuu lao Gotenya pii pepa pyapae singi dupa masoo kalyeno doko masilino. Kataisa Jisasa lao masoo miningi dokonya-kaita emba pyoo nyepae kalyale lao Gotenya pii pepa pyapae singi dupame emba kapa pao mana langingi. 16 Gotenya* Lo 15:4; 2 Pi 1:20-21 pii pepa pyapae silyamo dupa pitaka baame akali mendapuanya mona sakatasakamaiyamopa dupame piami-pyaa. Pii dupame endakali dupa mana lamaita, dupanya koo dupa laitaka peta, dupa tolao paena lao tolaseta, mana tolatae doko minina lao mana lamaita pyaanya yaka jingi. 17 Dopana,* 2 Ti 2:21 Goteme baanya endakali dupa kapa pisetamopa dupame kalai epe dupa pitaka kapa pao pipenge.