1 Na n‑yaꞌa xaꞌa, te ɨnka vuelta n‑dandeꞌa Jesús mee‑ia nuu se n‑dakuaꞌa‑ia. Xaꞌa n‑kuu yuꞌu ndute mar, mar nani Tiberias. 2 Ijan n‑ka nataka Simón Spedru xiꞌin Tomás, se n‑ka xo danani‑s Cuati, xiꞌin Natanael, se ñuu nani Caná distrito Galilea, xiꞌin uu daꞌya yɨɨ Zebedeo, xiꞌin uu ka se n‑dakuaꞌa Jesús. 3 N‑jaꞌan Simón Spedru nuu‑s:

—Jɨꞌɨn‑r, jɨn tava‑r chaka.

N‑ka jaꞌan‑s:

—Jɨꞌɨn koio mee‑r tuku.

Ka xeꞌen‑s te n‑ka keé‑s barcu. Te xakuaa ijan, ñayo‑s n‑ka tava ni ɨɨn chaka. 4 Neꞌe datne, nujuiin Jesús yuꞌu ndute, ko ña n‑ka najini ñaꞌa se n‑dakuaꞌa‑ia xa mee‑ia kuu‑ia. 5 N‑jaꞌan Jesús nuu‑s:

—Sekuechi, ¿n‑ka niꞌi‑n chaka u?

N‑ka jaꞌan‑s:

—Ni ɨɨn‑tɨ.

6 N‑jaꞌan‑ia:

—Dakeé koio ñunu nuu ndute diñi kuaꞌa barcu, te tnɨɨ koio‑n chaka.

Duꞌa n‑ka kida‑s, te ña n‑ka kundee‑s xa natava koio‑s ñunu, xaxeꞌe xa kueꞌe xa kueꞌe chaka n‑ka keé xiti ñunu. 7 Se n‑dakuaꞌa Jesús, se yo n‑xemani‑ia, n‑jaꞌan‑s nuu Spedru:

—Xtoꞌo‑ro kuu‑ia.

Na n‑teku Simón Spedru xa se ijan kuu Xtoꞌo‑s, yachi n‑ndɨu nuu‑s daꞌma‑s, chi xa n‑dita‑s daꞌma‑s xa tnɨɨ‑s chaka, te n‑keé‑s nuu ndute, n‑kida nadari‑s xa kexio‑s yundute. 8 Dava ka‑s n‑ka dakaka barcu xa xee koio‑s nde yundute. Ñatu yo xika, vaa ɨɨn cientu ni metru. N‑ka natava‑s ñunu n‑chitu chaka. 9 Na n‑ka nane‑s barcu yundute, n‑ka xini‑s kayu ñuꞌu te xá kaꞌya chaka, te io tuꞌa tila tuku. 10 N‑jaꞌan Jesús nuu‑s:

—Kaneꞌe ɨɨn uu chaka neꞌe. Kɨtɨ dijan n‑ka tnɨɨ‑n vitna.

11 N‑keé Simón Spedru barcu, te ñuꞌu‑s ñunu n‑keé nuu ñuꞌu. Chaka naꞌnu n‑chitu xiti ñunu. Ɨɨn cientu uu diko uxi uni‑tɨ. Ko juini ñuꞌu kueꞌe xa kueꞌe‑tɨ, ko ñatu n‑taꞌnde ñunu. 12 N‑jaꞌan Jesús nuu‑s:

—Neꞌe koio, na kadi ini‑ro.

Ni ɨɨn se n‑dakuaꞌa‑ia ña n‑juini xa kajan tnuꞌu‑s jundu kuu‑ia, chi n‑ka kutnuni ini‑s xa Xtoꞌo‑s kuu se ijan. 13 N‑kuyatni Jesús nuu kayu ñuꞌu, te n‑tnɨɨ‑ia tila, te n‑dakexio‑ia tila nuu‑s. Te dani n‑kida‑ia chaka.

14 Vuelta yaꞌa kuu vuelta kuu uni, xa n‑nadandeꞌa Jesús mee‑ia nuu se n‑dakuaꞌa‑ia, na n‑yaꞌa xa n‑nandoto‑ia nuu n‑kuu‑ia ndɨyɨ.

15 Na n‑yaꞌa xa n‑ka xadi ini‑s, te n‑xijan tnuꞌu Jesús nuu Simón Spedru:

—Simón, daꞌya yɨɨ Jonás, ¿xemani ñaꞌa ka mee‑n dada se yaꞌa u?

N‑jaꞌan‑s nuu‑ia:

—Joon, Xtoꞌo‑da, naꞌa mee‑n xa xemani ñaꞌa‑da.

N‑jaꞌan‑ia nuu‑s:

—Ná ka kuu tkachi kuechi, ka kuu ñayiu jandixa ñaꞌa mee‑r. Juñaꞌa xa kax koio tkachi kuechi‑r.

16 N‑xijan tnuꞌu‑ia nuu‑s vuelta kuu uu:

—Simón, daꞌya yɨɨ Jonás, ¿xemani ñaꞌa‑n a?

N‑jaꞌan‑s nuu‑ia:

—Joon, Xtoꞌo‑da, naꞌa mee‑n xa xemani ñaꞌa‑da.

N‑jaꞌan‑ia nuu‑s:

—Junuu tkachi‑r.

17 N‑xijan tnuꞌu‑ia‑s vuelta kuu uni:

—Simón, daꞌya yɨɨ Jonás, ¿xemani ñaꞌa‑n a?

N‑tnau ini Spedru, xaxeꞌe xa n‑xijan tnuꞌu‑ia‑s vuelta kuu uni: “¿Xemani ñaꞌa‑n a?” N‑jaꞌan‑s nuu‑ia:

—Xtoꞌo‑da, naꞌa mee‑n ntdantuꞌu. Naꞌa‑n xa xemani ñaꞌa‑da.

N‑jaꞌan Jesús nuu‑s:

—Juñaꞌa xa kax koio tkachi‑r. 18 Xandaa kuu xa jaꞌan‑r. Na luchi ka‑n, n‑ndukutu‑n daꞌma‑n, te n‑xikonuu‑n davaꞌa nga nuu n‑juini‑n. Ko na xee xa kuxaꞌnu‑n, diko nga kuita ndaꞌa‑n, te ndadakutu ñaꞌa ɨnka ñayiu, te kandeka ñaꞌa‑i jɨꞌɨn, nuu ma tna ini‑n xa jɨꞌɨn‑n.

19 Te duꞌa jaꞌan Jesús nanda kuu hora kuú Spedru. Hora ijan kada Spedru xa kutnuni ini koio ñayiu xa kunxaꞌnu ka Ianyuux. Te n‑jaꞌan‑ia nuu‑s:

—¡Kunduu naꞌi xiꞌin mee‑r!

20 N‑konenuu Spedru, te n‑xini‑s se yo n‑xemani Jesús ndijun ñaꞌa‑s. Se ijan kuu se n‑xo nukoo diñi Jesús, hora n‑xaxdini‑ia xiꞌin se n‑dakuaꞌa‑ia ɨnka xakuaa ijan. Hora ijan, n‑xijan tnuꞌu se ijan nuu‑ia: “Xtoꞌo‑da, ¿ndeda‑da kuu se diko ñaꞌa?”

21 Te n‑xini Spedru se ijan xa ndijun ñaꞌa‑s, te n‑xijan tnuꞌu‑s nuu Jesús:

—Xtoꞌo‑da, ¿te nax yaꞌa mee‑s?

22 N‑jaꞌan Jesús nuu Spedru:

—Nux juini‑r xa ndoo naꞌi‑s nde na ndixi‑r, te maxku kɨ ini mee‑n xaxeꞌe‑s. ¡Kunduu naꞌi mee‑n xiꞌin mee‑r!

23 Xijan kuu xa n‑ka tekutnuꞌu ñani‑ro, kuꞌa‑ro xa ma kuú se ijan, se n‑dakuaꞌa Jesús. Ko ña n‑jaꞌan Jesús xa ma kuú‑s. N‑jaꞌan‑ia: “Nux juini‑r xa ndoo naꞌi‑s nde na ndixi‑r, te maxku kɨ ini mee‑n xaxeꞌe‑s.”

24 Se ijan, se n‑dakuaꞌa Jesús kuu‑s, se jaꞌan ndaa xaxeꞌe xaꞌa, se n‑kidavaꞌa tnuꞌu yaꞌa kuu‑s. Te xnaꞌa‑da xa jaꞌan‑s xa kuu xandaa.

25 Te io kueꞌe ɨnka xa n‑kida Jesús. Nux n‑yodotnuni ɨɨn ɨɨn n‑kuu, te xani ini‑da xa yo kueꞌe xa kueꞌe libru koo, xa ni ma kueꞌe ñuñayiu n‑kuu. Amén. Duꞌa na koo.