Jopgo Elifasgo po wei ponobo po wali
6
(Dąį 6-7)
Jop agai homugo sęgę genuai me elalubao
1 Tama te Jop agai Elifasgo po wei ponoyu, e tama wali,
2 “Hobede mu, tiali goli, ma eno
te tigidali homu sęgę dali, te tigidali nai dabe,
te skel me deliba muyu da,
3 teda te dwai nai dabego sęgęgo
te tamu ąį sanide elalubo
masigi kemigo sęgę aiyaba ilaibao.
Tama tibaso, eno wado elama, haniani po dabe obao.
4 God tigidali bomo elalubo,
te agai ena te enego enani ene
te dwai nabi tede elalubo.
Tama te dwai nabi eno tigi tomoba pelama,
tama eno homu dwali.
Godigo haniani nai taga palali ena wi emainu,” wali.
5 “Te kibu donki dali, te kibu
bulmakau sigo augwa tuabo nosai
elalubaso, te hǫą wabo meni.
6 Tiali goli, dago pusu menia nai meba
elalubo, dago te nai subigila tuaibawe? Menima.
Hasia dago tamu bolo munama, tama dago tubo da.
Ma, te ba ge gani pusu ebo dawe? Mu menima.
7 Eno haligago te tobage nai wei mu meni.
Eno gedude te nai dwai mu da,” wali. * Te ves 5-7de Jopgo te tiwai po begelama, wali, te Elifasgo wali pogo aga tau sabo sę dwasianu me ebeo, te pusu menisąwai nai tubo tiwai yali. Tama tibaso, te aga sęgę dabede po me tama pusabo homu ebao.
8 “Eno wei mu ebo, Godigo eno gedu
haluasa po wabo odama,
tama agai eno emainu wali sę dabe emainao.
9 Eno godolo ebo da, God agai ena sągągo agalama,
tama elama, isilimai homu eba.
10 Ma, te ena genuai sęgę tolobo da hagela ebo,
teda ena dwagi yai homu elama, sasamano bilaiba.
Magi baso meni, eno koneani,
tigidali sogo mu ena God dologode bidali,
aga te dwagi yai kolesaga eyu,
doloba pai kolesaga naga ebo God dao.
11 Eno bomo tigidali sia sali,
tama eno mena dwagi yai nai enaba
ma pedalobo tonaluaibawe?
Ena bididuabo page da, mu meni.
Tama magi baso ena homu nagame elama bidaiba?
Te mu dwagi yai da, eno bidibo ula sia siyu da.
12 Mena tama tibo nago homugo ena bomo masigi dali,
bras dali si tiwai dawe? Mu meni.
13 Eno bomo mu sia sali, tama eno mena sę ma eyu,
ena ma tau somainu ebo usu menio,” wali.
14 “Bidi te genuai sęgę elalubo sogo da,
augwa abagi mu dabe pąde elalubo dao,
ma agai God tudiba sąwai badi,
me aga God dologode me bidibadi.
15 Tiali goli, dage eno abagi dabe,
dagego ena ili po bugagia mu ola mobao.
Dage te ąį gamia wa pai elalubo,
te tulubage tulisąma ebadi elalubo tiwai dao.
16 Te tulubage side da, te wę te ąį gamiadu soabo dao.
17 Tiali goli, te poi pibo side da,
te ąį gamia dabe wa pai mu elalubo dao.
18 Me sogo side bidi dabe augwa bulu tagalama,
gasa buluba augwa wa hulu sabilibo
kibu kamel dali pabo sogo,
tama augwali wę menia sabo sogo,
augwali sunumi tagalama,
te wę gamiaba gegegi pabo dao.
Tiali goli, wę gamiade wę mu meni ebo dao.
Tibaso, augwali wę geme elalubo badi
udada bilibadi, augwali isibo dao.
19-20 Te bidi hani te hanu
Tema bidi dali, Seba bulu bidi dabe,
augwaligo me tiwai sę naga ebo dao.
Augwaligo homugo te wę gamiade wę elalubao olama,
augwa kibu kamel dabe teba sela pelama,
te wę tumai homu elama, teba odasa pabo dao.
Tiali goli, augwali te wę sula saibaso, noma sabo dao.
Tama tibaso, augwali dwai homu ebo dao.
21 Eno homugo dage sela te wę gamia
sula sai tiwai dao.
Eno homugo dagego ena tau sainu asali.
Tiali goli, dagego suali,
ena mu dolai mu bidibo suali,
tama tibaso, dage wi genuai mu yali.
22 Mena tama tiali? Polobadu eno dagebolo
ena dobola somainogo
te boi bidiba doado bage mao
wabo sogo me elaluai dawe?
O ma, eno dagebolo gasa bidi dabebolo
mone momainu, te bidi dabe hanaluama,
ena tau somainu yai dawe?
23 Ma, eno dagebolo boi bidi dabego
nogode ma somainu dagebolo hanalu wai dawe?
Ma, ena te dwai kingo nogode abelemainu yaliwe?
Mu menima,”
Jopgo te po wali.
24 “Tibadi polo ma, dagego ena olama ma,
tama eno koneama, te eno dwai sę dabe yali
koneaibao.
Tibaso da, eno pedauwali pania selama,
dagego po wabo naga odaibao.
25 Tama dagego po mu yaibaso da,
teda eno te po oda selama, eno homu kone
palama,
mu da homu elama, wali paibao.
Tiali goli, dagego olo ili po naga weyu da.
Eno dwai sę me yai meni.
26 E sęgęgo ena mu dolali.
Tama tibaso, eno po dodolama obao,
tama dagego homugo, eno po
olo wali bola bilibo tiwai yali.
Tama dagego homugo dagego ena dodolaibawe?
27 Menima. Dagego kas gagali elama,
te tiana wai dabe dego mu sogowe
weyu suainu yabo bage dao.
Tama duga abagi solo maketde munama,
mone sainu yabo usu.
28 Mu tama, dagego ena bugagia sulama, osayama,
eno dagebolo ili po me wagobe ma.
29 Dagego te tobage po dali, kolesaga dali si tagama,
tama doloba pai kolesaga elama, eno kolesaga
osayama.
Dagego ena aiyaba elalugi, eno magi dwai sę me ebe.
30 Dagego homugo eno po dolo meni homu ebowe?
Tama dagego homugo eno te dwai kolesaga menawe,
te dwagi yai kolesaga dali si dagalogobewe, ebawe?
Te bage?”
Jopgo te po wai.
*6:7: Te ves 5-7de Jopgo te tiwai po begelama, wali, te Elifasgo wali pogo aga tau sabo sę dwasianu me ebeo, te pusu menisąwai nai tubo tiwai yali. Tama tibaso, te aga sęgę dabede po me tama pusabo homu ebao.