1 Te Tigidali Bomo Elalubo Genuai Bidigo po te Sekaraiabolo mawai. 2 Godigo te po wali, “Eno te Jerusalem dabe godolo mu ebaso, tama eno augwali tau sabo homu ebao. Eno augwali godolo mu elama, te augwaligo boi bidi dabede eno haliga sębę ebo dao. 3 Te ena ma aselama, ena te Jerusalemde bidaibao, te eno taun mu da. Tama Jerusalem, te Genuai Bidi te Tigidali Bomo Elalubo Bidigo bulu du da, te augwaligo nogi eyu Te Genuai Bidigo Tedali Gasagi Yai Bulu da waibao. Te gasa hani we bidi augwaligo te eno we bidi dabe sulama, te augwaligo tama po waibao, ‘Suao, te Jerusalem augwaligo Genuai Bidi wali mu pabo dao,’ te tama po waibao. 4 Te wąbi hwįbo me te sęgę dabe te taunde me pedalisąbadi, tama te we bidi dabe monu dabe mu pedelama, te dono dabe tolama bilalueibao. Tama augwali te taun pedai tigidali badu dugulalu toma nabo sę yaibao. 5 Tama te dwasianu wai puluba dabe te taunde pągąna pelama bidalu, tama augwali e gagali eladu bidalueibao,” Genuai Bidigo te po wali.

6 Te Tigidali Bomo Elalubo Genuai Bidigo e po me wali, “Te me bidibo we bidi dabe augwali te dwasianu hani naga bidibao, tama augwaligo homugo eno te po wali sę dabe pedalugobe da homu yali bogo. Tiali goli ena Genuai Bidi Tigidali Bomo Elalubo Bidigo, eno te tiwai homu me egobeo. Menio. Eno tigidali sę ebo usu yaibao. 7-8 Te boi bidi dabego eno we bidi dabe augwali selama, te giliga pedalubo badu me te giliga dega sigulubo badu te tǫ kantri dabeba bidigi palali. Tama eno te we bidi dabe ma sigi pelama, te augwali ma odasa aselama, te augwali Jerusalemba ma bidagasaibao. Te augwali eno we bidi dabe bidalu, te ena augwaligo God bidaibao. Te augwali eno doloba pai kolesagago sesemane sogo tonalueibao,” wali.

9 Te Tigidali Bomo Elalubo Genuai Bidigo e po me wali, “Dage dilibi budulama, sę bomo yao. Te eno be sę hodolobo sogo, te eno po pusubo bidi profet dabego eno po pusali. Augwaligo pedauwalide wali po homu kone palao. Tialima, megi me te tobage deli po naga odobao. 10 Te profet bidi dabego po pusisąbadi yali sogo, te bidi dabe augwaligo te sę yabo bidi dabe abeliyu, ma te sę yabo kibu dabe me abelebo usu isąwai elaluali. Tama me eno augwa abagi hasi boi bidi ilibo sę ilama, te augwali bugagia bidabo usu meni yai elaluai dao. 11 Tialima megi da, eno gasa tobage kolesaga te bidalubo dwasianu hani we bidi dali yaibao wali. 12 Te eno augwali haliga dua tegaluama bidibo sę ilama, te augwa wai gi dabe bulumainu yaibao. Te tulubage hauwa tulama, te augwaligo wain ni du dabe walama, te nai dabe me wiegi yai holaibao. Eno te tigidali wiegi yai sę te dwasianu bidibo hani pedali dali yaibao. 13 Dage Juda dabe me Israel dabego, odao. Polobadu te gasa hani dabego te dage dolobo sulama, tama augwaligo augwa boi bidi dabeba te tiwai po walali, ‘Dago homugo te dage mu dolomainao homu ebao. Te Juda dabe me Israel dabe dolali tiwai emainogo homu ebao.’ Tialima megi da, eno dage Juda me Israel dabe dobola ma selama, te dageba wiegi yai sę yaibao. Te gasa hani dabego dageba te tama tebo sę ebo sulama, te augwaligo augwa abagi dabeba te tama po walaibao, ‘Dago homugo dage te Juda dabe me Israel dabe bugagia bidibo tiwai gilama emainogo homu ebao,’ waibao. Tibaso dage wi me elamuo, dage bomo elama naga dolalubo usu dao,” Genuai Bidigo te po wali.

14 Tigidali Bomo Elalubo Genuai Bidigo te tama po wali, “Polobadu dagego wąį nǫų dabego ena haliga sębę yabo sę ilibaso, te eno augwaliba dwai dene mabo homu elama, te eno homu me hasegelibeo. Menio. Eno augwali dolobo sę naga yai dao. 15 Tiali goli megi da, eno te Jerusalem dabe me Juda dabe te wiegi yai bugagia ilabo homu ebao. Tibaso dage te bomo elalu, dolaluao,” te po wali. 16 “Tama dagego e tobage kolesaga dabe iyąo. Dage tigidaligo te mu po naga gasa bidi dabe dali waiyąo. Tama dagego po te po tų kotde te mu po naga weyu, bugagia dodolobaso da, te po silaibao. [Ef 4:25] 17 Dagego dwai sę ebo kolesaga te gasa we bidi dabe augwaliba yabo homu me elamuo. Te dage po tų kotde dologi pabo sogo, dagego te tibo po munu me pusulamuo. Eno te tibo po wabo kolesaga, me te po tų kot po geme dualubo kolesaga, me te wado po weyu hwįbo kolesaga ebo te eno godolo mu me ebo meni dao,” wali.

18 Tama Genuai Bidi Tigidali Bomo Elalubo Bidigo gasa po me ena Sekaraiabolo mawai dao. 19 Agai te tama po wai, “Dagego me sogo side te polua me si me si 4 poluade, me te polua a nagade, me te polua a naga me si 7 poluade, me te nogo si poluade te nai tubo osogo habu selali, te dageba pedelali sęgę homu kone paliyu tiali. Tiali goli, te sęgę dabe kone palobo genuai side hasegelama, te tigidali Juda dabego wiegi yai homu pemene yabo si pedelaibao. Tialima dagego te mu po wabo godolo homu elama, te gasa we bidi dabe dali bugagia tegaluama bidibo kolesaga yao,” te po wai dao.

20 Genuai Bidi Tigidali Bomo Elalubo Bidigo po me weyu, te tiwai po wali, “Nosali genuai taun hauwa we bidi dabe te Jerusalemba aselawaibao. 21 Te taun me delide bidali we bidi dabe augwaligo te gasa taun we bidi augwaliba te tiwai po walaibao, ‘Da te Jerusalemba pelama, te Genuai Bidi Te Tigidali Bomo Elalubo Bidiba lotu wagi pelama, te agabolo hanalu, te dabolo wiegi yai sę bugagia ilao po wagi pobao. Dage da dali asiąo,’ waibao. 22 Te genuai bomai tǫ kantri hauwa we bidi dabe te Genuai Bidi Tigidali Bomo Elalubo Bidiba lotu wagasu, te Jerusalemba asaibao, tama agabolo hanalu, te augwaliba me wiegi yai sę bugagia yao po waibao. 23 Te sogo te nogo si bidi, te haniani po wabo bage, te digibulu dabedu asama, te Juda bidi me deli pageabi elama tolalu, tama augwaligo te tiwai po waibao, ‘Dago te tiwai odali, te God dage dali bidibao wali. Tibaso, da me dage Juda bage dali deli hani pedelaibao homu ebao,’ te po waibao,” Genuai Bidigo te po wali.