1 Ena dali hasia te po wali te ensel bidi aga ma aselama, ena augwaligo te godege piai bidi hodolo ąǫ yagasali. 2 Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao. 3 Tama ni oliv si te gol lam ni dage pąde dolaluali, te me badu me badu me elalubao,” eno te po wali. [Ped 11:4]

4 Eno sulama tama eno enselbolo e tama po hanalu wali, “Genuai Bidi, eno te suali nai page magi nai mu dawe?” 5 Tama agai enabolo e tama po walali, “Nago konebe, agawe?” Tama eno te po wali, “Genuai Bidi, eno konebeo.”

6 Tama tialima enselgo enabolo Genuai Bidigo te po te polalubo gavman bidi Serubabelbolo pusa mao po wali. Genuai Bidigo te po wali, “Nago naga bomogo o naga ami dabego bomogo te sę dabe ebo usu egobeo. Menio. Eno Mobo Bidi Spiritgo bomo nage dali bidaibao, tama te bomo deligo naga nago te sę yaibao. [Esr 5:2] 7 Tialima, genuai nai dabe te bulu du tiwaigo nago sunumi palia sobaso da, teda eno tigidali sela sąwaibao. Tama nago eno be ma sę yaibao. Tama nago namba wan masigi aga pesagede mubo si da, teda te we bidigo hai bomona weyu e tama po waibao, ‘Te da, wiegi yai be mu dao,’ augwaligo te po waibao,” wali.

8 Tialima Genuai Bidigo enabolo gasa po me pusa mani. 9 Agai te po wali, “Serubabelgo eno be sę yabo digi tǫ polo dodolai dao, tama aga digi polo sę yaibao. Tama eno be sęa silibo si da, teda eno we bidi tigidaligo ena digi nage augwaliba taga palai yabao homugo koneaibao. 10 Augwaligo sę polo siligi pisąma ebo suali, tama tibaso augwali homu sęgę yali. Tiali goli augwaligo Serubabelgo te be sę dodolabo ain yai string tolama, tama eno be sę gagalobo sulama, tama augwali wiegi yai homu pemene mu yaibao,” wali. [Ped 5:6]

Tama ensel bidigo enabolo e tama po wali, “Te nogo a naga olama me badu nogo si, te 7 lam te Genuai Bidigo gedu magi iliyu te yali dao. Agai tigidali tǫ sese tama subo dao,” wali. 11 Tama eno agabolo hanalu wali, “Te ni oliv te lam si dali badu si bogo badu dolaluali, ma te page mena tama dawe? [Ped 11:4] 12 Tama te ni oliv nologo si te gol paip pąde munalubo te page magi nai dawe, me te oliv nigo wel te paip si tomoba geasa dulubao, te page mena tama dawe?” wali.

13 Tama agai enabolo e tama po hanalu wali, “Nago konebe, agawe?” Tama eno te po wali, “Genuai Bidi, eno konebeo.” 14 Tialima agai te po wali, “Te da, te Genuai Bidigo bidi si tigidali tǫde genuai bidi si te tǫde agai sę emainu magi ilai bidi si tiwai dao, te augwali si tobolude wel gelama, magi ilai bidi si tiwai dao, te agai sę emainogo,” te ensel bidigo te po wali.