Jopgo Po Asęani Elalubo Buku
Hasia nedebo tau sabo po
Jopgo bukude te bidi me deligo te wiegi yai kolesaga dabe ebo po pusali, tiali goli aga te genuai sęgę salio. Agai wai dabe tigidali isibadi, tama agai kibu bulmakau hani tigidali hagala silali. Tama nosali aga tigide gasi gegali. Tialima, Jop aga haliga sęgę genuai dali bididubadi, tama aga abagi dabe sela aga dali hodobo te hobede eyu, bidagasainu asali. Tama Jop agai te abagi dabe dali agaba te pedelali sęgę pagede bobobage po hauwa pusalio.
Te Jop aga abagi dabego te Israel hani dabego poloba elaluali homu kolesagade po pusali. Augwaligo homugo te wiegi yai kolesaga ebo bidi dabebolo te Godigo wiegi yai sę naga ebo da homu yali. Tama Godigo sęgę te bidi me deliba mabo si da, te tiwai sę ola mobaso, te bidigo te sęgę saide te Godigo aga kolesaga dodolobo sę eyu eba, te homu ebo dao. Tama tialima, aga abagi selago Jopbolo te tama po wali “Te nago dwai sęgę sela sąyu da, te Godigo aga polobadu wiegi yai sę ilali tiwai ma emainogo yaibao,” homu eyu, aga abagi dabego tama po wali. Tiali goli, Jopgo te tama homu konea pali, te aga wiegi yai doloba pai bidi da, te homu yai, te agai mena dwai sę yali pagede te Godigo agaba te tiwai sęgę pedalumainu yali dawe? Te tama homu agai yali.
Jopgo homu hauwa eyu, te Godigo agabolo ebo sę dabe te homu eyu, te agai hanalubo po genuai elaluali, “God agai menagi yai kolesaga mu elalubawe? Te agai doloba pai kolesaga naga elalubo dawe? Te konealubo po dąų wabo kolesaga eyu, te God dologode elalubo te menagi yai nai mu te we bidi dabego bidibo ula pagede elalubo dawe?” Jopgo agai konealubo homu Godiba dąų te me tagalobeo. Tialima, agai te boma pai hanalubo po te Godiba wabo, te aga wi eyu me wabeo. Jopgo aga te wiegi yai nogi te ma sabo homu elama, te Godigo gedude doloba pai bidi ma bidabo homu godolo mu yalio.
Godigo Jopgo te boma pai hanalu wali po wei dolo me ponobeo, tiali goli agai Jopba te agai genuai bomo me kolesaga koneabo sę ola mayu, waselai. Tama Jopgo Godigo te po wabo odobo sogo, agai te aga haliga sębę yalide, me te agai po dwai dabe te Godiba walide, te aga konea ma paliyu, ge neyu yalio.
Te buku silagasobode wali po, Godigo te Jopba wiegi yai sę ma ilali po weyu, tama Godigo te Jop aga abagi dabeba wado ilibo po wali. Te augwaligo Jopgo tolali sęgę dabe pagede po pusali homu kolesaga te mu geda mubo po wali. Te bukude dabolo e tiwai po ola mani, dago te homu eyu, dago te Godigo homu koneani sę, me te agai kolesaga tigidali dago konea pali homu me elamuo. God aga Genuai Bidi, tama agai homude konea pali sę me tego te da tǫde bidigo homu kolesaga tigidali aiyaba mu elaluai elalubo dao.
Te dwai sęgęgo te bidi Jop gegelama, dene mani
1
(Dąį 1-3)
God dali, dwai haubo tobolu bidi Satan dali, augwali sigo Jopgo dwagi yai kolesaga po miani
1 Te sia ge asobo badu, te tǫ kantri nogi Us, tede bidi me deli bidali, aga nogi Jop dao. Te bidi Jop aga Godigo gedude dwagi yai doloba pai bidi mu bidai, dwai kolesaga mu meni yai dao. Aga lotu po weyu, Godigo po dologode naga biliyu, tama agai po wali peyu yai. Tama tiyu, agai dwai sę ebo hagela homu yai. 2 Aga wego ogwa nogo a naga olama, me badu nogo si ogwa ame nai, wegi sela ame nai dao. 3 Tama agai kibu sipsip 7,000, tama kibu kamel 3,000, tama sę yabo kibu bulmakau 1,000, tama kibu donki so 500 tama bidai dao. Tama agai sę ebo we bidi hauwa mu bidai. Tama te we bidi dabego te bidi Jop nogi ugwaba mu sai dao, tama tiyu, agai nogi ugwade mu elaluyu, te sia asobo badu bidi dabego nogi aiya mu ilali.
4 Te deli deli Jopgo ogwa dabego, me sogo sogo augwa bede moni nai mu tuabo sogo bodolu weyu, tama yali. Te ogwa dabe deligo te nai tuabo sogo bodolu weyu da, aga ama dabe me aga abe dabe tama te nai tuagasa po weyu yai. 5 Tama te wai pulubago nai ula tubo si ela silibo si da, teda augwali sisi elaluama, te Jopgo augwali i olama, aselama, te aga wai dabe Godigo gedude dwagi yai ma emainogo te ofa nai mayu yai. Aga kigamu hulide mu hodaluama, te nai sese bugagia mu demainu ebo dao. Te bidi agai te nai ofa aga wai dabe deli delide usu nama ulubo dao. Augwaligo te nai da tula silibo si, Jopgo tama sę naga ebo dao. Magi baso meni, agai te homugo tibo dao, agai wai dego dwai sę eyu, augwa homude Godibolo dwai po me waliwe weyu, tibo dao. Tama te kolesaga Jopgo hauwa sogo idu geai dao.
6 Me sogo te Godigo ensel mobo bidi dabe augwali Genuai Bidigo geduba sisinagasali. Te dwai haubo tobolu bidi me teba asali, te Godigo gedu, te Satan dao. * Te Hibru pogo te nogi Satan te page dao, te tǫde we bidide kisilibo po wabo bidi dao. 7 Tama tibaso, Genuai Bidigo te Satan hanaluyu, te po wali, “Nage menade bidama asaliwe?” wali. Te Satango te po wei ponoyu, te po wali, “Ena te tǫ deli badu naga bidibo menio. Ena te tǫ tigidali bulu badu bilama, tama ena e asobao,” wali. 8 Tama Godigo aga hanaluyu, te po wali, “Nago eno sę ebo bidi me sualiwe, te Jop, ma meniwe? Jop aga te dwagi yai doloba pai bidi dao, eno gedude dwai sę me ebo menio. Agai ena dologode bidiyu, enade lotu po weyu ebo dao, tama eno tigidali po wali pabo dao. Agai dwai kolesaga mu hagela homu ebo dao. Te tǫde tigidali bulu badu te bidi tiwai menio,” wali. 9 Tama te po obaso, te Satango te po wei ponoyu, te po wali, “Nago homugo te Jop nage wi eyu, nage dologode olo dali elaluaibawe? Nago nogode nai me sisąbo si da, magi yaibawe? Eno homugo da, meni yaibao. 10 Magi baso meni. Aga nago obo tomode bidiyu, tama nago aga bugagia tonaluyu, aga wai puluba dabe, me aga nai dabe bugagia tonalubo dao. Me nago tigidali sogo aga dali dwagi yai sę ilibo dao. Tama nago aga bulmakau kibu hauwa mu usu elama mani, augwali tedela pelama, te bidibo bulu usu numainogo tiali. [Ped 12:10] 11 Tama ma, nago agai te nai dolama, sela sąbo si da, teda nago suaibao, agai nago gesabidide dwai po waibao,” Satan haubo bidigo te po wai.
12 Tama Genuai Bidi agai Satanbolo te po wali, “Odao, eno agai te nai dabe tigidali nago nogoba mobao. Tagalao, nago te naide magi sę me yabo homu ebaso da, teda eyu naga yao. Tiali goli, nago Jop tigide dwai sę me deli bolo me elamuo,” wali. Te dwai Satango Godigo te po odama, tama aga taga pali.
Satango Jop hasia gagaliyu, usu sali
13 Me sogo be posobode, te Jop aga wai dabe te augwa gomunai bidigo beba deliba sisinani, te moni nai tumainu yali. 14 Tama Jop aga sę ebo bidi me te Jop bidibo madiba aselama, agabolo e po walali, “Dago te bulmakau kibu dabe giba odasa pai dao, te gi tǫ elemainu. Tama te kibu donki dabe augwali pagede nosai tutu bilali. 15 Tama, polo tama te Sabea bage aselama, te donki kibu dabe dali, bulmakau kibu dabe dali si wi sela pali. Tama augwaligo nago sę bidi dabe sese ela muna silali. Ena enaduba deli tama wi aselama, nagebolo e wagasobao,” te po wali. 16 Te bidigo po odubadi yaide, gasa sę bidi me aselama, e po wagasali, “Be kulu weyu yaide, te be sele genuai elama, tama te kibu sipsip dali, te kibu tonaluali bidi dali, sese ela silalio. Enaduba deli wi aselama, nageba e po wagasobao,” wali. 17 Te bidigo po odubadi yaide, gasa sę bidi me sabolagaselama, te po wali, “Te Kaldia bidi hani sela aselama, te kibu kamel dabe wi sela peyu yaide, te sę bidi dabe ela muna silalio. Ena deli aselama, nagebolo e wagasobao,” wali. 18 Te bidigo po odubadi yaide, gasa sę bidi me sabolagasiyu, te po wali, “Nago wai dabe augwali nago gomunai ogwago beba sisinama, genuai nai ulama, tubadi yaide, 19 polo tama, mone wali olo kemidu gagalasa asiyu, te be dega polama, nago wai dabe sese elama, isilalio. Enaduba deli te sęde geda munama, tama nagebolo e wagasobao,” te sę bidigo te po wali.
20 Jopgo te po odama, moni homu sęgę elama, aga ugwa pįsilama, tama aga tobolu nisi tologali, te aga homu dene ola mayu tiali. Tama aga bogoli si tǫba bulama, Godiba gedu haluasa po wali. 21 Tama Jopgo te po wali, “Ena idago ame nani sogo, eno magi nai me sela asai menio. Tama ena isibo sogo, te tiwaidu naga paibao. Genuai Bidi aga digi ena te nai dabe mawai dao. Tama aga digi te nai dabe ma te sela sąna silali dao. Tama tibaso, eno agai nogi ugwaba mu sobao,” wali.
22 Mu tama, te dwai sęgęgo Jop hwa sali. Tiali goli, agai dwai sęgę elama, Godibolo sębę yai po me wabeo.