1 Te king Sedekaia agai homugo te Babilon king bidigo aga tonalubo hagela yali, tama teyu, aga te Babilon hanigo king aga dologode munu ma bidigobe homu yali. Tama tialima, te king Sedekaia agai kibu be te te 9 yia, te ugwadu polua nogo si, te 10 mun, tama te king bidi bidali, tama te nogo si wabo poluade te dei nogo si dei, te Babilon king Nebukatnesargo te agai te tigidali ami soldia bidi dabe selama, tama te Jerusalem bulu taun bologobea sagaselama, tama augwaligo te taun sainogo te boi hwįani. Tama augwaligo te Jerusalem taun bologobea selama, tama augwaligo te tǫ selama, te taun obo pąde munama, tama du ilali, tama augwali teba doligiluama, boi hwįainogo tama tiai dao. [Jer 21:1-10; 34:1-5; Ese 24:2] 2 Tama augwaligo te taun Jerusalem bologobealudubadi yaide, te kibu be deli selama, te hap yia, te polua nogo a olama, te me badu nogo deli, te 6 mun tama bidali, te kibu bede te Sedekaia aga te king bidi bidali kibu be te 11 yia. 3 Tama te kibu be tomode te 4 polua, dei 9 wabode, te Jerusalem taunde bidali we bidi dabe te nasi dwai mu yali, magi baso meni, augwaligo tuabo nai sia sali. * Te Hibru pogo te pedai badu te polua namba meni. Tiali goli, te buku Jer Dąį 52:6, tede te po wali, te sę dabe te me si me si namba wabo poluade pedalai dao. 4 Tama te sogo te Babilon hanigo te masigigo nigai genuai obo banis te me badu pedai badu deli auluama, te Jerusalem taun tomoba augwali pai. Tialima, te king Sedekaia dali, te Jerusalemde bidibo ami soldia bidi dabe dali, augwaligo homugo wi painu, tama be hulide augwali te kingo giba pabo tųdu peyu, tama te augwaligo te taun tagalama, te obo banis si unulali nogo habu badu te elalubo tųdu augwali pai. Te umabo Babilon hani bidi dabe augwaligo te Jerusalem taun bulu bologobea sabo sę me elalubo suali, tiali goli te Jerusalem taun ami soldia bidi dabe augwali tama te Jerusalem taun tagalama, tama augwali te wę Jordan wę elalubo odogoba pabo tųdu wali pali. [Ese 33:21] 5 Tiali goli, te Babilon ami soldia bidi dabego te king Sedekaia pobeasa pelama, tama augwaligo aga pageba sabaligi pelama, te Jeriko hanu pąde te tǫ malu pesage elalubo madigi augwaligo aga nogo tuali. Tama tibaso, te king Sedekaiago ami soldia bidi dabego aga tagalama, tama augwali wi pela silali. 6 Tama tialima, te Babilon hani ami bidi dabego te king Sedekaia nogo bono dunama, tama augwaligo aga te Babilon bulu king bidi pageba odasa pali. Te tama tiali sogo, te Babilon king bidi aga te Ripla hanude bidibadi da. Te king Nebukatnesargo te king Sedekaia sulama, tama te po wali, “Te king Sedekaia, naga digi te kolesaga geda muanigo da, teda te nage dwai dene mu sao,” wali. 7 Te Babilon hani ami bidi dabego te king Sedekaiago ogwa dabe me oda sali, tama augwaligo te Ripla hanuba augwali odasa asali. Tama te bulude te king Nebukatnesargo te po wai, tama te augwaligo te king Sedekaiago ogwa dabe te augwaligo te augwa aya Sedekaiago gedugo tonalubadi yaide, augwaligo ela muani. Tama te kingo te po wali, tama augwaligo te king Sedekaiago gedu ge si dia sąyani. Tama augwaligo aga nogo sągą dabe te aligabo bonogo dunama, tama te Babilon buluba kalabusiba mugi pali. [Ese 12:13]

8 Te Babilon king bidi Nebukatnesar aga te Babilonde king bidi bidibadi, agai kibu be te bidi sese deli pąde, te 19 yia, aga king bidi bidama, tama te nogo a wabo poluago dei te nogo a olama, te me badu nogogo si, te 7 dei, megi e kibu be tomode tama, te king Nebukatnesar te Babilon king bidigo aga sę ebo gavman ofisa bidi me deli, aga te Jerusalem buluba asali. Te bidi Nebusaradan agai te king tonalubo ami soldia bidi dabe tonalubo tobolu bidi dao. 9 Tama agai te Genuai Bidigo tempel be me, tama me te Juda hanigo king bidigo be me, tama me te Jerusalemde bidibo genuai bidi dabego be dabe tigidali sia tulama, tama siago dela pela silali. Te Babilon hani augwaligo mu te be me tulube. [1 Kin 9:8] 10 Tama te Babilon ami soldia bidi dabe tigidali, augwaligo te bidi Nebusaradan dali naga bidai hani naga da, augwaligo te masigi obo togolama, te Jerusalem taun bologobea sali moni masigi obo banis auluali. 11 Tama te Nebusaradango agai te taun Jerusalem bulude bidali we bidi dabe dali, te gasa hani we bidi dabe dali oda sali, tama augwali te odasa pelama, te Babilon buluba kalabusiba mugi pali. Tama me te Juda hani dabe te boi hwįbo sogo te Jerusalem bulu tagalama, wi peyu, te Babilon hani dabego bidibo pesageba osogo bidigi pali we bidi dabe me, agai te augwali selama, tama agai augwali te Babilon buluba odasa pelama, augwali hadabu iligi pali. 12 Tialima, me badu Juda hani we bidi dabe augwali te me badu te tigidali doado bage dabe meni yai we bidi dabe, tama te augwali te bidi Nebusaradango augwali tagalama, tama augwali bidaluyu, tama augwaligo te wain gi dabe me, me te gasa gasa gi dabe me augwaligo tonaluali.

13 Tama te Babilon hani bidi dabe augwaligo te Genuai Bidigo tempel beba pelama, tama augwaligo te brasgo nigali moni pos si me, tama me te bidi dabego te bras selama, nogogo nigali wilkar dabe me, tama te wę tubo dwasianu tank te wilkar ugwadu daide muani nai dabe me tigidali, te augwaligo auluama sąyani, tama augwaligo te tigidali te bras dabe te Babilon buluba selasa pali. [1 Kin 7:15-26; 2 Sto 3:15-17; 4:2-5] 14 Tama te Babilon hani bidi dabe augwaligo te nai bulanabo kamugi kenage dage me, tama me te savol me, tama me te lam sole sula sabo nai dabe me, tama me te dwagi yai hanu holoyu, denami ebo pauda ulubo plet pou dabe me, tama me badu te gasa doado bage dabe me, te Genuai Bidigo tempel bede muani te brasgo nigali doado bage dabe tigidali, te augwaligo sela silali. [1 Kin 7:45; 2 Sto 4:16] 15 Tama te bidi Nebusaradan agai te bidi dabego te nogogo te gol me te silva selama nigali wiegi yai nai dabe me sali, tama me te sia sabo plet pou me, tama me te ofa nai ulubo te kaneme mubo dis pou dabe me sali.

16 Polobadu te king Solomongo sę ebo bidi dabego te bras dabe selama nigali bobobage genuai pos side, tama te genuai tank ąį muani me, te dwasianu wilkarde te dwasianu tank wę dabe ugwadu muani. Tama te king Solomongo te po wai, tama augwaligo te doado bage dabe te Genuai Bidigo tempel beba muao wali. Tiali goli, megi te Babilon hani bidi dabe augwaligo te nai dabe auluama, tede muani bras dabe augwaligo sali, tama te brasgo sęgę te bidigo skelim ebo usu me ebe, te hauwa mu elaluali. 17 Te bidi dabe augwaligo polobadu te brasgo nigali pos si te augwaligo hasia nigali ususi elama naga pos si nigali. Te bobobage yali usu te 8 mita usu. Te augwaligo te pos si toboluba mubo au ebo nai nigali, te dwasianu genuai gagawai, tama te au ebo nai bobobage usu te 1 mita tama te 30 sentimita usu. Tama augwaligo te bras selama, te dwagi yai te au yai nigali, te tiwai te sųgų gegebo wago au yali tiwai mu, me te ni du pomigranet dabe te ni dugo au yali tiwai au yali, te augwaligo te pos side tama augwaligo te au yai nigali. Tama augwaligo te brasgo nigai ni pomigranet du dabe selama, tama te wa umben gege pabo au yali. Tama augwaligo te au yai doado bage selama, tama te brasgo nigai bobobage pos tobolu side tama augwaligo au yai nai munama, tama te pos si tobolude bagulali.

18 Te bidi Nebusaradan, te bidi aga te Babilon bulude polalubo tobolu gavman ofisa bidi deli da, tama agai te tobolu pris bidi Seraia sali, tama me te Sefanaia me sali, te bidi te Seraia tudi badu bidiyu sę ebo bidi da, tama me te gasa pris bidi sela, te bidi sela te Godigo tempel be tų tonalubo bidi sela dao, te bidi selama, agai kalabus ilali. 19 Tama te Jerusalem bulude bidibo ami soldia tonalubo gavman ofisa bidi me agai sali. Tama me te agai te Juda hanigo king bidi dabe te kolesaga ola mabo bidi dabe te a naga sali. Te bidi hani dabe augwali te Jerusalem bulude bidibadi, te agai te augwali nogo tuali. Tama agai te Juda hani bidi dabego ami soldia bidi dabego tobolu gavman ofisa bidigo kuskus bidi te agai sali, te bidi agai sę te ami soldia bidi nigabo bidi dabe te agai sabo sę ebo bidi da. Tama agai suali, ma te Jerusalem bulude te kuskus bidi tau sabo bidi sese sela bidi bidibo suali, tama agai te bidi dabe me sali. 20 Tama tialima, te bidi Nebusaradango agai te sali bidi dabe tigidali te Babilon king bidi aga te Ripla hanude bidiboba odasa pali. 21 Te Hamat hanigo tǫ, te Ripla hanude, tama te kingo te po wai, tama augwaligo te bidi dabe elama, isilao wali. Tama te Babilon hani bidi dabego e tama tiali, tama nosali te augwaligo te gasa Juda hani bidi dabe selasa pelama, te Juda tǫ tagalama, te Babilon buluba hadabu egi pali.

22 Tama te king Nebukatnesargo agai te Juda bidi Gedalia dąį ilama, tama agai te Babilon hani bidi dabego te Juda hani siyu, te me badu we bidi dabe te Juda hani dabe augwa bulu tǫde me bidibadi taga soali we bidi dabe tonaluao olama, te bidi Gedalia dąį ilali. Gedalia aga aya Ahikamgo ogwa da, tama te aga wąį nǫų bidi te Safan dao. 23 Te me badu Juda ami gavman ofisa tobolu bidi ebadi, me te Juda hanigo ami soldia bidi dabe augwali, te bidi dabe augwali te gasa bulu mede polobadu bidada pali. Tama augwaligo e tama po odobo sogo, tama te Babilon king bidigo te bidi Gedalia dąį ilama, tama te bidigo te Juda hanigo tǫ tonaluao wali, augwaligo te bidi Gedalia te Mispa bulude bidibo sugi pali. Te gavman ofisa bidi dabe nogi e tama da, me Netaniago ogwa Ismael da, tama me te bidi Johanan, te bidi te Kareago ogwa, tama me te Seraia, te Seraia aga aya Tanhumetgo ogwa da, te bidi aga bulu Netofa, me te Maka tǫ page bidi Jesania da. 24 Tama te bidi Gedaliago augwali sulama, augwalibolo e tama po wali, nogo guni sisiyu muyu, te po wali, “Mu tama dao, dagego te Babilon hani bidi dabe augwali sulama, dage wi me egio. Mu menio. Dage te e tǫde tama bidiyu, tama te Babilon hanigo king bidi dologode tama bidao, tama tialima dage bugagia mu bidaibao,” wali.

25 Te bidi Ismael aga te bidi te Netaniago ogwa da, tama te aga wąį nǫų bidi te nogi Elisama da. Tama te bidi aga te Juda hanigo king bidi augwali deli hani bidi dao. Tama tialima, te megi te kibu bede te nogo a olama, te me badu nogogo si me da sigi soabo poluade, te bidi agai te nogo si bidi selama, tama augwali te Mispa buluba asama, tama augwaligo te bidi Gedalia ela muani. Tama augwaligo te bidi aga dali bidali Juda hani bidi dabe me ela muani, tama me te Babilon hani ami soldia bidi dabe me, te bidi Gedalia dali te Mispa bulude bidali ami soldia bidi dabe me, augwali ela muai dao. 26 Tama tede nosali, te tigidali Juda hani bidi dabe augwali te bulu pedaide bidali bidi dabe, te ami gavman ofisa bidi dabe me, augwali tigidali te Babilon hani bidi dabe sula peyu, wi mu yali. Tama teyu, augwali tigidali te wi pelama, te Isip buluba bidigi pali. [Jer 43:5-7]

27 Te Juda hanigo king bidi Jehoiakin aga te Babilon bulude hadabu bede bidali kibu be e tama bidali, te 37 kibu be usu nama bidali, tama te 37 kibu be wabo te Evil Merodak aga te Babilon hanigo king bidi nigali. Tama te kibu bede te polua te nogo si olama, te sągągo si wabo polua, te 27 dei, Evil Merodak agai te king Jehoiakin hobede eyu, tama agai aga te kalabuside bidali tagala palali. 28 Tama te bidi Evil Merodak agai te king Jehoiakin dali te dwagi yai kolesaga eyu, tama agai agabolo te genuai nogi mayu, tama aga namba mayu yali, tama te tialigo te gasa king bidi dabe te king Jehoiakin aga dali te Babilon bulude kalabus bidali augwaligo namba me aiyaba elaluali. 29 Tama teyu, te king Jehoiakin agai te kalabus bidigo bulubo ogwa ma bulube. Tama tigidali sogo te Babilon hani king bidi dali nai tuyu bidai, tama aga te nai tuyu bidada pelama, te king Jehoiakin isibo bodoluba usu nigi pali. 30 Te Babilon king bidigo te po wai, tama te tigidali sogo augwaligo mone me, te tigidali doado bage dabe me, te king bidi Jehoiakin mayu bidali, te bidi Jehoiakin aga bugagia bidimainu. Augwaligo tama tidi peduama, tama te king Jehoiakin isibo bodoluba usu nigi pai dao.