1 Elisago te me badu profet hani dali bidiyu, tama augwali tonaluali. Tama me sogo deli te profet bidi dabe augwaligo agabolo e tiwai po tama wali, “Dago te be dwasianu mu dao, tama da usu egobeo. 2 Nago da tigidali te Jordan węba tama ni togogi pabo usu yaibawe? Tama dago gesi be me sę yaio, dago te be Jordan wę sesegede sę yaibao,” wali.

Tama Elisago te po wai, “Usu dao, dagego be sę yao.”

3 Tama profet bidi me deligo agabolo e tama hanalu wali, “Mu tamao, genuai bidi, dago homugo nage da dali asao.”

Tama Elisa agai te po wali, “Usu dao, ena dage dali asaibao,” wali.

4 Awe, tama aga augwali dali pali. Augwali te Jordan węba sabolama, tama te augwaligo te ni gelebo gagalali. 5 Tama augwali te sę eyu bidali, tama profet bidi me deligo agai sigi hwą ge osaga peyu, te Jordan węba tula pali. Tama te profet bidi agai aga te sigi hwą agai sabo usu ebe, tama agai e tiwai i Elisabolo tama wali, “Genuai bidio, homu dene mu dao, ena gasa bidigo hwą osogo sesalio, tama megi te hwą węba tula palio,” wali.

6 Tama Elisa, te Godigo profetgo, e tiwai po tama hanalu wali, “Te hwą menade tula paliwe?” Tama profetgo te Elisabolo te hwą tula pali pesage ola mani. Awe, tama Elisago ni nologo dwasianu toga selama, tama te węba sąyani, tama te hwą wędu aiyadu edaba pedalu gulama, ąį daide pilali. 7 Tama Elisago te po wali, “Megi da, nago te hwą sao,” wali. Tama te profetgo aga dulama, aga nogogo te hwą sali.

8 Te Siria king bidigo aga ami bidi dali aselama, te Israel bidi dabe augwali dali boi hwįagasainu yai. Tama kingo te aga sę ebo gavman ofisa bidi dabe dali po miai, tama te ofisa bage augwalibolo te kem nigilama, bidabo pesage nigigi pomainu augwalibolo po ola mani. 9 Tialima, Elisa, te Godigo profet bidigo, agai te Siria bidi dabego kem nigilama bidabo pesage te agai koneai, tama agai te Israel king bidibolo po konelani, tama me te Israel kingbolo te po dali tama wali, “Dage te Siria bage augwali bidibo pesage pąba pigio,” wali. “Tama dage Siria bage augwali bidibo madigi pąba peyu da, teda augwaligo dage dolaibao,” wali. 10 Tama te Israel king bidigo te po odama, tama te agai te soldia ami bidi meba tagala palama, te ami bidi dabego te Siria bagego kem nigilama bidabo pesage sugi pomainu tagala pali. Tama te Siria bage teba te buluba pedalobo sogo, augwaligo suali, ma te Israelgo ami bidi te pesagede bidibo suai. Tama tibaso, augwaligo kem nigilama bidabo pesage nigibo usu meni. Te tobage kolesaga hauwa sogo mu pedalali.

11 Tama Siria king bidigo te tobage sę pedalubaso, agai homu kolesaga hauwa sogo mu eyu, moni homu elama bidali. Tama tibaso, agai aga sę ebo gavman ofisa bidi dabe augwali agai i olama, tama augwali asobo si, e tiwai po tama hanalu wali, “Enabolo wao,” wali, “da hani niwai bidi me deligo te Israel hani king bidi tigidali sogo tau siduai dawe?” wali.

12 Tama aga sę ebo gavman ofisa bidi me deligo te po wei ponoyu, e tama wali, “King, da hani bidi me deligo te Israel king bidi tau me sai menio, mu menio. Tialima, Elisa deli digi dao, te Israel bage augwaligo profet bidi. Te profet bidi agai te tigidali nai dabe, dago homugo yaibao wabo sę dabe me, agai koneama, te aga Israel king bidibolo ola mabo dao. Elisago nago te tigidali po wabo te agai konea palio, naga te pibo be habude bidiyu wabo po me, me nage te geme wabo po me, te Elisago konea palio,” wali.

13 Tama kingo te aga sę ebo gavman ofisa bidi augwalibolo e tiwai po tama wali, “Dage pelama, te Elisa mena badu pedai badu bidibo wenama, kegegi pao,” wali. “Tama dagego te ami soldia bidi dabe selama, tama dagego te nogo tulama, kegasa asiąo,” wali. Augwaligo tama kegegi pelama, tama Elisa aga te Dotan hanude bidibo sualio. 14 Tama tibaso, kingo te umabo ami soldia bidi dąį ilama, tama agai te bidi duabo hos kibu me, me te karis kibu dali, tama augwali te Dotan hanuba tagala palali. Tama augwali hulide sabolama, tama te augwaligo te taun bobegela sali.

15 Tama kigamu hulide mu Elisago sę ebo bidi hodaluama, tama aga buluba teda soali, tama agai subadi yaide, te Siria ami bidi dali, te hos kibu me, me te karis kibu me, tama augwali augwa te nai dabe dali asama, te taun bobegela saiali. Tama aga pelama, tama te Elisabolo e tama po walali, “Genuai bidio, te Siria bidi dabe augwali asama, da nǫ bagua sai yabuo,” wali. “Megi tama dago magi yagawe?” te po hanalu wali.

16 Tialima, Elisago agabolo te po wali, “Wi egio, tagalao,” wali. “Tialima, mu tama, augwaligo umabo ami bidi bidibo, tiali goli dago me, te da tau sabo hani te genuai mu dao,” wali. 17 Awe, tama Elisago agai e tama God dolo gedu haluasa po wai, “Genuai Bidi, nago te bidi gedu pedelao, tama agai te eno te po wali bidi hani agai sumainao.” Tama tialima, te Elisago sę ebo bidi te agai gedu te Genuai Bidigo pedelama, tama te sę bidi agai suali, ma te gasa hos kibu me, te karis kibu me, te augwali asama, te Elisa bidibo bulu duba usu na sai yali. Te hos kibu me, me te karis kibu me, te bidi dabe me, augwali te isi bogoli ula gagawai mu tiwai pedelai.

18 Awe, tama te Siria bidi dabe augwali asama, te Elisa pageabi yai hagede yai. Tama Elisago e tama God dolo gedu haluasa po wali, ““Genuai Bidio, eno homugo nago te Siria hani augwaligo gedu te hulia palama, tama augwaligo bugagia tonalubo usu me igio,” wali. Tama tialima, Genuai Bidigo tama augwaligo gedu hwidilali.

19 Tama Elisa aga pelama, te Siria bage augwali bidiboba pelama, tama augwalibolo e tama po wali, “Tialima, dage kekede asalio,” wali. “E tų da, tea dage te hanuba pabo dage usu egobeo, te duga homugo soainu yali taunba sabalogobeo. Usu dao. Dage ena wali asiąo, tama eno dage odasa pelama, tama dagego te kegebo sę ebo bidi bidibo madigi sabolagameo,” wali. Awe, tama augwali aga wali pali, tama agai augwali odasa pelama, te Samaria taunba tagaligi pali.

20 Tama augwali te taun tomoba pela silali, awe, Elisago e tama gedu haluasa po wali, “Genuai Bidi, nago te Siria bage augwali gedu ma pedelama, ma usu ilao,” wali, “tama augwaligo gedugo bugagia usu nama tonomainao.” Tama Genuai Bidigo augwaligo gedu ma usu ilali. Tama augwaligo e tama suali, ma te augwali te Samaria taun tomode bidibo suali.

21 Te Israel king bidigo sualima, te Siria bidi dabe te taun tomode bidibo sulama, tama agai te Elisabolo e tama hanalu wali, “Genuai bidi, tialima eno augwali elama, isilagawe, a?”

22 Tiali goli, Elisago te po wali, “Menio. Elegio,” wali. “Tama nago te hwįbo sogo te boi bidi dabe tuao wali, nago augwali me elama, isilibo menio. Tama teyu, nago te hani augwali nago eligio. Menio. Tama dago augwali nai bugagia mao, tama augwali augwa king pageba nosali sabalu,” wali. 23 Tama tibaso, te Israel king bidigo moni nai mu dodolama, tama te Siria bage augwali mani. Augwaligo te nai dabe me, te ąį dabe me, tula silama, tama agai augwali augwa te Siria king bidi pageba tagala palali. Tama te sogo te Siria bage augwaligo te Israel bage augwali dali munu ma hwįagasobe.

24 Me badu kibu be sia sali, tama te Benhadat, Siriago king bidi, agai te tigidali soldia ami bidi sisinama, tama augwali pelama, tama te Samaria taun bobegela sali, tama augwaligo te Samaria hani bidi dabe dali hwįainu tama tiai. 25 Tama te sogo te Samaria bage augwali nai menia sai, te nasi ebo bodolude da, tialima te Siria bage augwaligo bobobage sogo mu te taun bobegela selama bidali. Tama Samaria bage augwaligo te nai me te taun tomoba magasobe. Tama tialima, bidi me deli aga homugo te donki kibu tobolu abela tuainu da, teda mone bidi sese sigo abelao wali, 80 kina. Tama tialima, bidi me deli aga 250 gram sęgę ba di tiwai tubo nai ge abelainogo da, teda agai te ni yabe si podolai, te 5 kina, te monego abelemainao.

26 Me sogo deli te Israel king bidi aga te taun moni masigigo nigai obo banis te ugwadu te daide pai, tama we me deligo aga i weyu, e tama wali, “Eno king, nago ena tau sao,” wali.

27 Tama kingo e tama po wei ponani, “Tialima, Genuai Bidi Godigo nage tau sabo usu esiąbasowe, tialima eno mena tama nage tau saibawe? Nago homugo eno te sia gagawai nai wit me, me te wain wę, te nai si eno bede me munalubaso, nage tau somainu obawe, a?” 28 Awe, tama kingo aga hanalu wali, “Nago homugo eno mena tama nage tau somainu obawe?”

Tama te wego te po wei ponoyu, e tama wali, “Ena dali, te e wego aga dali, dadi sigo e tama po olama dąų wai, tama dadi sigo te po wai, hasia eno ogwa bolo elama tuaibao wai, tama nosali dadi sigo te agai wai elama, tuaibao wai. 29 Tama tialima, dadi sigo te eno wai elama, tama dadi sigo te wai nogelama, tuai dao,” wali. “Tama nosali eno te po wai, ‘Megi da, nago wai te dadi sigo elama, tuinao,’ wali. Tiali goli, agai wai elebeo. Menio. Tama agai aga wai dualigi pali,” te wego te po wali. [Bom 28:57]

30 Kingo te po odali, tama aga holobo ugwa pisą yali, magi baso, te agai haligade sęgę mu yai. Tama aga te taun obo banis ugwa badu daide dolalua pai, tama me te tigidali we bidi augwaligo te agai homu dene eyu holobo ugwa holama, bilibo tigidali we bidi augwaligo usu nama suali, king agai holobo ugwa dologode kęai elalubo suai. 31 Tama kingo te po wai, “Elisa aga te dago e sęgę yabo te agai page dao. Megi tama e bubugade eno te agai mage togoluyu, aga tobolu sąwaibao, tama megi aga isaibao,” wali, “tialima, eno homugo te eno tama tisąyu da, teda Godigo agai ena elama, isilimainao.” 32 Kingo te po tama olama, tama agai te Elisa eligi pao olama, tama agai bidi me deli tagala palali.

Te sogo Elisa aga dali, te Samaria tobolu bidi dabe dali, tama te aga bede te aga dali bidai. Te bidi te kingo tagala palai bidi, te bidi aga sabalisiąbadi, te Elisago e tama po te tobolu bidi dabebolo e tama po ola mawai, “Dago king bidi, aga bidi ela mubo bidi dao. Tama megi agai te bidi me deli ena dogoni togomainu tagala palali dao. Tialima, te sogo te bidi asama sabalobaso da, tama dagego te be tų dąų olama, paiąo,” wali, “tama aga e be tomoba asobo usu egobeo. Tama te nosali te king aga me te bidi wali tama asobao,” wali.

33 Elisago po odubadi yaide, tama te kingo tagala palali bidi sabolagasobadi yaide, te king bidi tama asama, sabolagasali. Tama kingo * Te Hibru pogo te “king” po meni, tiali goli te dago homugo te po te kingo te Elisabolo wali te po dao. Elisabolo e tiwai po tama wai, “Genuai Bidi aga digi te bodolu sogo dwai mu da tigide pedalai dao,” wali. “Tama dago agai da nai me deli tau somaio olama, tama magi baso dago aga me tonaluaibawe?” wali.