1 Te Israel me Siria te tǫ pedai kantri si munu ma boi hwįsąbadi, te bugagia mu bidada pali, te kibu be si yai dao. 2 Te sela wabo kibu bede, Jehosafat, te Juda king, aga pelama, te Israel king Ahap sugi palio. 3 Tama Ahapgo te Israel ami polalubo ofisa bidi dabe augwaliba te tama po wali, “Dagego koneani, te Gileat tǫ pedaide te Ramot taun te dago taun elaluai, tiali goli te Siria dabego sali. Te magi baso dago dena te taun te Siria dabe kingo nogode ma sabo sę me deli ebe dawe?” wali. 4 Tama Jehosafat sabolama, tama Ahapgo agabolo te tiwai po wali, “Eno te taun Ramot ma sainu boi hwįgi pabo homu ebao. Nage ena dali asobaso usu dawe, ma meniwe?” Tama Jehosafatgo te tiwai po wei ponani, “Ena nago homu wali asabo dola sai naga elalubao. Te eno ami bidi dabe, me te hos dabe dola selama, te nage tau sabo homu naga elalubao. 5 Tialima, hasia bolo dago te yainu ebo sęde Genuai Bidigo homude mena tiwai ebo dago koneainogo inao,” wali.

6 Tialima, Ahapgo te profet bidi dabe asomainu i wali. Te bidi sese nogo si sągą si, te 400 profet bidi dabe sabalubaso, te Ahapgo augwaliba te tiwai po hanalu wali, “Eno te Ramot taun ma sainu boi hwįgi pobaso usu yaibawe, ma meniwe?” Te augwaligo te tiwai po wei ponani, “Te usu da, nage pagameo. Genuai Bidigo nage tau sobaso, te nago augwali aiyaba elalueibao,” wali.

7 Tiali goli, Jehosafatgo Ahapbolo te tiwai hanalu wali, “Te Genuai Bidigo geme dualali po pusubo profet bidi me deli elalubawe, ma meniwe? Te bidibaso da, te Genuai Bidigo mena homu elalubo dago koneainu, agaba hanalu wainao,” wali. 8 Tama Ahapgo agaba te tama po wai, “Te profet me deli bidibao, aga nogi Mikaia, te Imlago ogwa da. Tiali goli, eno te bidi godolo homu me isąwai, magi baso meni, agai te wiegi yai profet po enabolo me pususąbaso. Sesemane sogo agai te dwai sę naga enaba pedelabo po wabo dao,” wali. Tialima, Jehosafatgo te po agaba wali, “Nago te tobage po me olamuo.” 9 Tialima, Ahapgo aga ofisa bidi me deli i olama, asobo si agabolo te tama po walali, “Nage polo tama pelama, te Mikaia, Imlago ogwa, odasa asao,” te po wai.

10 King Ahap de king Jehosafat augwali si te kingo gudubo ugwa au elama, te augwali si augwa sia kingde dugulaluai. Augwaligo te augwali sigo dugabo sia sai te taun Samaria genuai obo sunumi bulu badu muani, te tǫ malu dolo yai pesage tǫ me deli, te bidi dabego te wit dili bo dabe sela sąnama, te nai ge sabo madi, te badu elaluali. Tama te profet dabego te nosali badu pedelabo nai po olama, te profet te king sibolo pusubo sę yalio. 11 Sedekaia, te Kenango ogwa, aga me deli te bidi sese nogo si, sągągo si, 400 profet dabe tomode bidali bidi. Agai te ain dage selama, te bulmakau gąų tiwai nigali. Te aga toboluba munama asu, te Ahapba te tiwai po wali, “Genuai Bidigo te tiwai po wali, nago te Siria dabe dali boi hwįnama, te augwali aiyaba elalueibao. Te tiwai nago augwali te kau gąų komgo augwali enana pidubadi, te augwali silibo siba mu usu naibao,” te po wai. 12 Te gasa profet dabego me te tiwai deli po naga wali. Augwaligo te tama po wai, “Nago te Ramotba hwįgi pobaso, te mu tama, nago te taun saibao. Genuai Bidigo nage tau sobaso, te nago augwali aiyaba elalueibao,” wali.

13 Te ofisa bidi, Ahapgo te Mikaia sigi pomainu tagala palali bidi, agai te Mikaia odasa asali. Augwali si te kingba sabalisiąbadi, ofisago Mikaiaba te tama po wai, “Tigidali profetgo po weyu, kingo hwįbaso, te boi bidi aiyaba elalueibao wali. Tama tialima, nago me nago wiegi yai kolesaga eyu, wiegi yai po naga te kingba mao,” te po wai. 14 Tialima, Mikaiago ofisa bidiba te tama po wai, “Te Sesemane Sogo Bidibo Genuai Bidigo nogide, eno mu po nageba obao, mena po Genuai Bidigo enaba mani, te po naga eno pusaibao,” wali.

15 Te Mikaia pelama, te king Ahapba sabalubo si da, teda Ahapgo agaba te tama po hanalu wali, “Mikaia, te dago Ramot taun ma sainu hwįgi pobaso usu yaibawe, ma meniwe?” Tama Mikaiago te kingba posobo po wabo homu ebo po te tiwai wai, “Magia! Te usu da, nago hwįgi pelama da, te taun nago saibao. Genuai Bidigo nage tau sobaso, te nago augwali aiyaba elalueibao,” wali. 16 Tiali goli, Ahapgo agaba te tama po wali, “Tibo po tagalao. Sesemane sogo eno nagebolo weyu, te nago Genuai Bidigo nogide mu po naga omainogo yai. Nisu sogo nago po odaibawe?” wali. 17 Tialima, Mikaiago Ahapba te tiwai po wali, “Eno suali, te Israel ami bidi dabe te bulu du dabede bidalua pelawali, te kibu sipsip augwa tonalubo bidi wasman meni yai tiwai elaluali. Tama eno odali, Genuai Bidigo te po wai, te bidi dabe augwa tobolu bidi meni yai. Augwa te hwįbo tagalama, te augwa buluba ma pelama, te bugagia bidibaso usu yaibao,” Mikaiago te po wali. [Nam 27:17; Mt 9:36; Mk 6:34 ] 18 King Ahapgo te po odama, agai te king Jehosafatbolo te tiwai po wali, “Tes, te megi da, eno nagebolo walio. Te profetgo enabolo wiegi yai po me wagobeo. Sesemane sogo agai enaba te dwai nai naga pedelabo po naga wabo dao,” wali.

19 Tialima, Mikaiago po wadolama weyu, te tama po wai, “Tialima, megi da, eno homu nago olo bugagia munama, odao, te eno nagebolo te Genuai Bidigo enabolo ola mani nai dabede po waibao. Eno suali, te dagalude Genuai Bidi te aga dugulalubo sia saide dugulaluali, te tigidali mobo bidi ensel dabe aga pąde dolalubo suai dao. 20 Te Genuai Bidigo augwaliba te tama po hanalu wai, ‘Dego mu te Ahap te Ramotba pelama, isimainu geanigi paibawe?’ Tama te deli deli mobo bidi enselgo augwa konealubo homude po te Genuai Bidiba pusai. 21 Augwaligo te tiwai idubadi, te noma bidi mobo me deli Genuai Bidi pąba pelama, te tama po wai, ‘Ena da, ena pelama, aga geanigi paibao,’ te po wai. 22 Te Genuai Bidigo agaba hanalu wai, ‘Nago te Ahap mena tama tųba geanobo po waibawe?’ Tialima, te mobo noma bidigo Genuai Bidiba te tama po wali, ‘Te ena pelama, te Ahap aga profet dabego digi aga tibo po momainogo ilaibao.’ Tama Genuai Bidigo te noma mobo bidibolo te tiwai po wali, ‘Nage pelama, aga geanobo po wagi pao, te agai nago poba homu mueibao,’ Genuai Bidigo te po wai,” Mikaiago te tiwai wali. 23 Tama Mikaiago po dolo tama te Ahapba te tiwai po wali, “Genuai Bidigo homugo nage dolomainu homu elama, tama agai te noma mobo bidi tagala palama, tama naga te profet bidi tigidaligo nage te poba homu dąų omainu, tibo po ola mabo tiwai yali dao,” wali.

24 Profet Sedekaia, te Kenango ogwago, Mikaiago Ahapba te pusali po odama, te aga Mikaia pąba pelama, tama aga naboge badu nogo sawaligo eliyu, te tama po wai, “Te Genuai Bidigo Noma Mobo Bidigo ena magi elama tagalama, te nageba solama, tama nagebolo te po maniwe?” 25 Te Mikaiago Sedekaiago po te tiwai wei ponani, “Nosali te boi bidi dabe asu, te da Israel aiyaba elalubaso, te naga digi wi peyu, te be me deli habu tomoba geme dula sigi paibao. Te tebo sogo naga nago koneaibao, Genuai Bidigo digi enaba te po mobaso, eno te po pusai yabo, te homu nago yagameo,” Mikaiago te po wali.

26 Tialima, king Ahapgo aga ofisa bidi me deliba te tiwai po wali, “Te Mikaia pageabi elama, aga te Emonba sela pao, te polalubo kiap bidi da, me te eno ogwa Joasba pao. 27 Tama nago eno te po augwali siba mao, ‘Eno homugo dage sigo te bidi kalabusiba ma mumainu homu ebao. Te aga dwasianu tubo nai bret me wę naga mao, tama te boi hwįbo silama, ena ma asobo siba usu nao,’ te po wao,” wali. 28 Tama Mikaiago Ahapba te tiwai po ma wali, “Nage te dolobo sęgo gegesiąma, te nage asobaso da, teda Genuai Bidigo enabolo te po mabe da homu yagameo,” wali. Tama Mikaiago te tama po ma wali, “Dage tigidali hani we bidigo te po bugagia odao,” wali.

29 Tialima, nosali Ahap, te Israel king, me Jehosafat, te Juda king, sigo te ami bidi dabe selama, te Siria dabe dali te taun Ramot, te Gileat bulu tǫ pedaiba boi hwįgi palio. 30 Te boi hwįsąbadi yaide, Ahapgo Jehosafatba te tiwai po wali, “Te dago boi hwįgi pabo sogo, te eno kingo gudubo ugwa hasegelama, te gasa ugwa mueibao, te boi bidi dabego ena king da te konea pidali weyu, te tiwai yaibao. Tialima, nago da, te kingo ugwa au elama muao,” wali. Tibaso, king Ahapgo te gasa ugwa gudama, te augwa si boi hwįgi peyu palio.

31 Te sogo naga tama, te Siria kingo te 32 kepten bidi dabe i wali, te ami augwali te karisde dolalu hwįbo bidi dabe augwaliba te tama po wali, “Dagego te Israel kingba naga boi hwįąo, te dagego gasa bidi dabeba me hwįnamo dao,” wali. 32 Te augwali boi hwįani sogo, te kepten dabego te king Jehosafat sulama, augwaligo Israel king Ahap mu dao, te homu yai. Te augwaligo aga dali boi hwįgi painu yali, tialima Jehosafatgo bomonama i obaso, 33 tama augwaligo te tiwai koneai, aga te Israel king meni da homu yai. Tama augwaligo aga dali hwįbo tagalalio.

34 Te ami bidi dabe augwa hwįbo sę idubadi, te Siria ami bidi me deligo te ene te enesigi balibiba nanama, te enesigi kegelama, te Israel dabe bidibo pedaiba enanio. Te enego te Ahap dolali, te aga tigi te hwįbo nai olo mesegelisąwai elaluali badu dolalio. Tama Ahapgo aga karis guni tolasa pabo bidibolo te tama po walali, “Ena dolalio. Te karis polo begelama, te hwįbo pesage tagalao,” wali. 35 Tialima, te Siria ami bidi dabe me Israel ami bidi augwa te boi hwįbo bomo mu ebaso, Ahapgo te hwįbo pesage taga soabo usu ebeo. Aga te karisde naga bididuai, te aga ami bidi dabego aga tonalubo sę yai. Tama agai Siria dabeba tonaludualio. Tama Ahapgo kaneme duludu, te aga karis sawali ni nami mesegelali. Aga te tiwai bididubadi, te be pio muba usu nigi pelama, te aga isai dao. 36 Te giliga iba degasa dulubo pąde igi pabo si da, teda te Israel ami bidi dabe, me Juda ami bidi dabego te tiwai i walio, “Da tigidali te dena bulu tǫ pedai kantriba, me te dena bulu dabeba pela silinao,” walio.

37 King Ahap isai baso da, teda augwaligo aga tigi te Samariaba sela pelama, te augwaligo gų pageba pubulalio. 38 Tama augwaligo aga karis te Samaria dwasianu sigi ąįba sela pelama, wę telagi pai. Te węde te penani ebo we dabe augwa te ąį paubo da. Te yowi dabe asu, agai kaneme tuagasali, tama te tama tiali sęgo te Genuai Bidigo pusali poba mu usu nai dao. 39 Te king Ahapgo gasa sę dabe tigidali yali po, te tiwai nogi wabo bukude te po elalubo, Te Israel King Dabego Yali Sę Po Buku Dao. Te bukude te wiegi yai genuai be agai sęnama, te elefan hasa kelego au ilali po wali, te me agai te taun dabe obo masigi banis dąų walobo sę me yali po wai dao. 40 Ahap isai baso da, teda augwaligo aga tigi pubulama da, te aga ogwa Ahasiago te aga ayago pesage selama, te king pedelalio.

41 Te kibu be me si me si Ahap te Israel king bidali side, Jehosafat, te Asago ogwa, te Juda king pedelai dao. 42 Jehosafatgo kibu be te 35 kibu be elalubadi, te sogo aga king pedelali, tama aga te Jerusalemde king bidibadi, te kibu be bidi sese deli olama, a naga bidai. Jehosafatgo ida, te Asuba, te Silhigo wai dao. 43 Jehosafatgo te aga aya Asago yali kolesaga tigidali bugagia wali pali, te agai wiegi yai doloba pai kolesaga Genuai Bidigo gedude yali. Tialima, agai isąwani sę me deli te tiwai, agai te tibo godiba lotu wabo pesage dolobeo. Tibaso, te we bidi augwaligo te ofa ebo sę me, te wiegi yai denami hano ilibo pauda me, te pesage ulubo sę iduai dao. 44 Te Jehosafat king bidali sogo, te tǫ kantri Israel de Juda tǫ kantri si te munu me boi hwįbeo. Menio. Jehosafatgo te Israel king dali nogo menama, te augwali bugagia hodobo bidai.

45 Te king Jehosafatgo te gasa sę tigidali yali po, te tiwai nogi wabo bukude elalubao, Te Juda Kingo Yali Sę Po Buku Dao. Te bukude wali po te tigidali bomai sę agai yali po wali, te agai gasa tǫ kantri dabeba boi hwįgi pali po dabe wali dao. 46 Polobadu Asa, te Jehosafatgo ayago te tibo godiba lotu wabo pesagede te penani kolesaga ebo sę bidi dabe ela gudulali. Tiali goli, te meba me elalubaso, te Jehosafatgo augwali tigidali mu dola silai dao.

47 Te sogo te tǫ kantri pedai Idom te king elalubeo. Te Juda kingo naga te bidi dąį ilama, te Idom dabe tonalumainu yalio.

48 King Jehosafatgo po obaso, te sę bidi dabego genuai sip te tǫ kantri Ofirba gol sigi pabo sip dabe nigali. Tiali goli, augwali pabeo, magi baso meni, te sip dabe te saut badu tamu ąį nambisde elaluali taun Esiongeberde dolali. 49 Te nosali, Ahasia, te Israel kingo, te Jehosafatgo sip dolali po te tiwai odama, tama agai Jehosafatba te tama po wali, “Te nago sip dabe ma tagala palabo homu ebaso da, teda eno boskru bidi dabe te nago boskru bidi dabe dali pomainu yaibao,” wali. Tialima, Jehosafatgo hagela homu yai dao.

50 Nosali Jehosafat isibaso, te augwaligo aga te aga wąį nǫųgo gų pagede pubulali, te Devitgo Taunde elaluali. Te Jehoram, te aga ogwago, te agai sę yali pesage selama, te king pedelai dao.

51 Te nogo si olama, sągągo a naga me si, te tama kibu be te Jehosafat te Juda king bidali kibu bede, Ahasia, te Ahapgo ogwa, te Israel king pedelali. Te aga Samariade te kibu be si tama bidalio. 52 Agai te aga aya me ida sigo yali dwai kolesaga tiwai eyu, te Jeroboam, te Nebatgo ogwa, agai me te Israel dabe dwai sę eboba kegali king dao. Ahasiago Genuai Bidi gedude dwai sę eyu, 53 agai te tibo god Balba lotu wabo sę yai. Te tiali kolesagade agai te God, te Israelgo Genuai Bidi, agaba haliga sębę dwai ilali, te aga aya Ahapba dwai haliga yali tiwai yai dao.