Hebreo'su
a'inga tevaen'cho
1
Chigaja tise Dutssi'yei'ccu a'inga afa
1 Tayopi Chigaja ccushaya'chone ingi tayopi'su israe'su coenzandeccunga condase'ñacca. Nane Chiga Aya'fama afasundeccuma in'jaensi tsendeccu tsu condase'fa. Cca'i Chiga Aya'fama afasundeccuma'qque ccaningae in'jaensi tsendeccu'qque tsane ti'tsse condase'fa. 2 Chigaja tayopi tsendeccui'ccu condasepa ja'ñojan Tise Dutssi'yema moen cuintsu inginga condaseye. Tseyi me'ttia'ye Chigaja Dutssi'yema oshaensi tsu osha'cho andeni, sefacconi jinqque'suve agattoen. Toya'caen Chigaja pa'cco agattoen'choma Dutssi'yenga afesi tise tsu pa'ccone na'su. 3 Dutssi'yeja tsa'caen an'biamba tise joccapitssia aya'fai'ccu tsu osha'choma tansintsse manda'je. Chigaja a'tatssipa joccapitssiasi tise'qque tsa'caen joccapitssia tsu. Ma'caen Chiga jincho'nijan tise'qque tsa'caeñi tsu jincho. A'i egae tsincon'chone ccushaeña'choma nanimba tsu tiseja Chiga sefacconi ansundepa Chiga tansinfanga dyaipa Chigai'ccu manda'je.
Chiga Dutssi'yeja ti'tsse'tssia tsu
4 Tiseja Chigama sefacconi'su shondosundeccuma ti'tsse'tssia've dapa can'jen. Nane tise inise Chigama sefacconi'su shondosundeccu inisema ti'tsse'tssia'caen tsu tiseja tsendeccuma ti'tsse'tssia. Tiseja Chiga Dutssi'ye tsu, Chiga Quitsa tisema tsa'caen inisiansi. 5 Nane Chigaja Tisema sefacconi'su shondosundeccuma qquen afambipa Dutssi'yema tsu afa:
Que qui ña Dutssi'ye.
Ja'ño gi quema atte.
Toya'caen Tisema sefacconi'su shondosundeccuma qquen afambi:
Ña gi tise yaya.
Tiseja ña Dutssi'ye tsu.
6 Tsa'ma Chiga Quitsaja Tise Dutssi'yeveyi va andeni moemba attepa su:
In'jan gi cuintsu poiyi'cco ñama sefacconi'su shondosundeccu tisema ñotsse afa'faye.
7 Chigaja Tisema sefacconi'su shondosundeccune qquen afa:
Ñama sefacconi'su shondosundeccuja fingiancan'fa tsu.
Ña manda moensi quia'me ja'fa.
Ñama fuitesundeccuja si'ngia'can'fa tsu.
Ña mandasi dyo'tsse tson'fa.
8 Tsa'ma Dutssi'yene tsu Chigaja qquen su:
Que qui Chiga.
Tsangae joccapitssia na'suve dapa qui manda'je.
Quini'ccopave dapa qui
ñotsse tansintsse manda'je.
9 Ñotssiaveyi in'jamba qui egama chi'ga.
Tsa'cansi Chiga Quitsa, que Chigaja, quema na'suve ccutsiansi qui
queja poiyi'cco nasundeccuma ti'tsse avujatssi.
10 Toya'caen tsu su:
Na'su, me'ttia'ye ñotsse ñoñamba qui va andeve agattoen.
Sefacconi jincho'cho'qque que tivei'ccu agattoen'cho tsu.
11 Ande, sefacco'qque tsu pasaya.
Tsa'ma queja tsangae qui jinchoya.
Nane ondiccu'je tssoruve daqquia'caen tsu
sefacco ande'qque pasa'faya.
12 A'i tssoru sarupama ompangoemba joqquitssianqquia'caen qui
que agattoen'choma pasaeña.
Ondiccu'jema cambianqquia'caen qui
tayo'suma pansaemba cuna agattoen'chove cambiaña.
Tsa'ma Queja ccaningae daya'bi.
A'ija coenza ccashe'yeve dapa pa'fa.
Tsa'ma Queja tsa'caen dambipa tsangae qui canse.
13 Toya'caen ni fae'ccoeyi'qque Chigaja Tisema sefacconi'su shondosundeccunga qquen afambi:
Ñai'ccu fae'ngae na'suve dapa
ña tansinfanga dyaija
ñajan quema iyiccayesundeccuma patsusi
que tsu'tte tsosiccunga ccuiqquia'caen oshambipa quema paña'faya'ngae.
14 Nane poiyi'cco Chigama sefacconi'su shondosundeccuja Chigama fuitesundeccu tsu. Chigaja tise'pama ttu'sepa qquendya'pama moenqquia'caen a'ima fuite'faye moen. Majan Chiga ccushaeña'chove isuya'chondeccuma fuite'faye tsu manda.
Ccushaeña'choma cati'fajama