16
Agar Ismaelve isu'cho
1 Abram pushe Saraija du'shuve isuye oshambi. Tsa'ma tise'be sema'su pushesuve an'bian, egipto'su pushesu, Agar, qquen inisecho'choma. 2 Tsa'caen an'biamba asi'ttaemba Abramnga su:
—Que canjan, Na'su Chiga se'pisi gi ñajan du'shuve me'cho. Tsa'camba gi in'jan que ña sema'su pushesui'ccu can'jen'ninda tsu osha'ta ñambe du'shuve isuya'bi.
Tsa'caen susi Abramjan Sarai suqquia'caen in'jan. 3 Tsonsi Abram pushe Saraija Egipto ande'su pushesu Agarma tise tsa'ndu Abramnga afe cuintsu tisei'ccu fae'ngae can'jeñe. Tsa'caen afesi tsu Abramjan diez canqque'fave Canaán andeni can'jen. 4 Abram tsa'caen Agari'ccu can'jensi surive da. Tsa'caen dapa Agarja tise na'su Saraima patsu qquen in'jamba quinsepoemba can'boen. 5 Tsa'caen in'jansi attepa Saraija Abramma su:
—Que qui shacapa Agar ñama patsu'chone. Nane ña gi tisema quenga afe fae'ngae can'jeñe. Tsa'ma ja'ño surie dapa tiseja ñama patsu qquen in'jan. Tsa'cansi Na'su Chiga tsu atesu majan tsu shacapa–que, tsambi'ta ña.
6 Tsama pañamba Abramjan su:
—Que canjan, va pushesuja quembe sema'su tsu. Tisema ma'caen tsoñe in'jan'da tsa'caen tsonjan.
Tsa'caen susi Saraija Agarma tsain'bitsse egae tsincoñe ashaen. Tsa'caen tsinconsi Agarja ccuyin ja. 7 Tsa'ma Na'su Chigama sefacconi'su shondo'suja pushesu a'i menia jayipa Shur tsaiqui'su tsa'ccu sombo'je'ttini can'jen'choma cachuipa 8 iñajampaña:
—Agar, Saraimbe sema'su, ¿mane qui ji? Toya'caen, ¿mani qui jayi?
Agarja pañamba su:
—Ña na'su Saraine gi ccuyapa jayi.
9 Tsonsi Na'su Chigama shondo'suja su:
—Toequi que na'suni japa tisema ñotsse pañajan.
10 Toya'caen tsu Na'su Chigama shondo'suja su:
“Tsain'bitsse gi atapoeña que dushundeccuma.
Nane majañi'qque agattoye osha'faya'bi tsu.
11 Tayo qui suri. Tsandie du'shuve isupa qui Ismael qquen inisiaña.
Nane Na'su Chiga que ina'jen'choma pañamba in'jansi qui tsa'caen inisiaña.
12 Tiseja tsampi'su cavayoa'caen injansuya tsu.
Cca'indeccuma iyicca'yesi tsu ccane'qque tisema iyicca'ye'faya.
Nane tise antian se'pi'ni'qque toya tsu tiseja tise'pa utufani can'jeña.”
13 Tsonsi Agarja Na'su Chigama afapa su: “Chiga tsu atte'su.” Nane tayo Chigai'ccu condasepa tsu tiseja su: “Chiga ñama atte'ni'qque gi toya canse.” 14 Tsa'caen tsonsi tsu tsa tsa'ccu posoma inisian'fa Lajairoi poso, “Ñama atte'su Cansian Chigambe poso” qquen su'chove. Tsa posoja Cadesne Beredni ja'je'cho enttingeni.
15 Can'jemba Agar Abram du'shuve isusi Abramjan tisema inisian Ismaelve. 16 Abramjan ochenta y seis canqque'fave an'bian'ni tsu Ismaelma isu.