19
1 Tsomba tse'i tsain'bio a'i Chiga sefacconi bopa afasi gi paña. Qquen tsu quia'me afa'fa:
¡Aleluya! Chiga ingima Ccushaen'suja Osha'choma tsu Oshacho. Tisema ñotsse afa'faya'cho.
2 Tise ñotsse in'jamba tansintsse su'nijan Tisema ñotsse afa'faya'cho.
Ti'tsse'tssia egae tsincon'su pushesuja poi ande'su a'i'ccu egae tsincomba tise'pama'qque daño.
Tsa'cansi tsu Chiga Quitsaja tsambe injama'choma somboemba fi'tti.
Tise Chigambe semasundeccuma fi'ttiqquia'caen ccane'qque Chiga Quitsaja tisema vanaemba fi'tti.
3 Ti'tsse omboe ccase afapa su'fa:
¡Aleluya!
Tsangae tsu tisema oquesi
onfen'baja ansunde'jeya.
4 Tsonsi tsu veinticuatro coenzandeccu, cuatro canse'pa jinchondeccu'qque andenga puntssan ccuipa Chigama ñotsse afa'fa. Nane Chiga Tise na'su dyaipa'choni dyaisi tsu Tisema su'fa:
—Tsangaeyi, ¡Aleluya!
5 Tsonsi na'su dyaipa'cho'ye tsu faesu aya'faja qquen afa:
Ingi Chigama ñotsse afa'faja.
Poiyi'cco que'i
Tise'be semasundeccu
Tisema ñotsse afa'faja.
Poiyi'cco que'i dyoe'sui'ccu
Tisema pañasundeccu,
majan ti'tsse'tssia,
majan utu'ccoa,
Tisema ñotsse afa'faja.
Chigambe Oveja pusheye tson'jen
6 Toya'caen tsain'bio a'i bopa fundoqquia'caen gi paña. Na'en bo'epa jenqquia'caen, tsanda quia'me afaqquia'caen afasi gi qquen paña:
¡Aleluya! Tayo tsu Na'suja mandaye ashaen.
Chiga ingi Na'suja osha'choma tsu oshacho.
7 Jinge avuja'faye.
Avujapa jinge Chigama ñotsse afa'faye.
Tayo tsu napi Chigambe Oveja pusheya'cho.
Tise pushe'qque tayo tsu tisuma ñoña.
8 Ñotssia tototssia sarupama tisenga afesi tsu
giya'tsse a'tatssia've ondiccupa ñoña.
Nane Chigambe aindeccu
tsa'caen ño'ame dapa cansesi
tsa tototssia sarupa tsu
tise'pa ñotsse canse'choma canjaen.
9 Tsonsi sefacconi'su shondo'su ñama su:
—Vama tevaenjan. “¡Poiyi'cco majan Chigambe Oveja pushe'jepa fiestaen'jen'chonga ttuseye'chota tsu avujatssi'faya!”
Toya'caen tsu su:
—Qquen tsu Chiga Quitsaja ñoa'me tansintsse su.
10 Tsonsi gi puntssamba afa'sumbe tsutteccofanga ccarupa dyai tisema ñotsse afaye. Tsa'ma tiseja ñama su:
—Tsa'caen tsonjama. Que, que faenga'su Jesúsma pañamba in'jan'chondeccu'qque Chigambe semasundeccu qui. Ña'qque quei'ccu fae'ngae Chigambe sema'su gi. Chiganga ccarupa ñotsse afaja.
Nane poiyi'cco majan Jesúsve in'jamba tansintsse condase'ta ñoa'me Chigane afasundeccu tsu.
Totoa cavayonga dyaipa jacan'su
11 Tsomba gi Chiga sefacco fettaye'choma attepa totoa cavayoma'qque atte. Cavayonga dyaipa jacan'sumbe iniseja “Tansintsse Su'su.” Toya'caen “Tise Suqquia'caen Tson'su.” Tiseja ñotsse in'jamba tsu a'i injama'choma tansintsse somboen'jen. Ñotsse in'jamba tsu ñotsse mandapa geraen'jen. 12 Tise tso'feja si'nge anchandaqquia'caen chanjun'fa. Tise tsovenga tsain'bitssi otifaccuve otifa'cho. Tisenga tevaen'cho inisema cca'indeccuja atesu'fambi. Nane tisu'yi tsu tsa inisema atesupa in'jan. 13 Tise oppoencho'cho sarupaja anjampai'ccu onjoen'cho. Tisema inisian'choja “Chiga Aya'fa.” 14 Poiyi'cco Chiga sefacconi'su sundarondeccuja tise sepaccofae jiña'fa. Tsendeccu'qque ñotssia tototssia sarupama giya'tsse ondiccupa totoa cavayondeccunga dyaipa jiña'fa. 15 Na'sumbe aya'fa'ye tsuintssia sundaro matichi sombo eje. Tsai'ccu tiseja poi ande'su nasundeccuma iyiccopa patsuya. Ñoa'me tiseja yoshava'ccoi'ccu tsendeccuma quia'me mandaya. O'fa tsajama tsui'je'cho changonga tsui chapianqquia'caen tiseja poimbe injama'choma somboeña. Chiga Quitsa tsu ñoa'me a'ima iyicca'yepa tsa'caen vinoma somboenqquia'caen tise'pa injama'choma somboeña. 16 Tise omba'su ondiccu'jenga, toya'caen tise ttena'gonga'qque tsu qquen faesu iniseve tevaen'cho:
Poi manda'suma Manda'su;
Poi na'sumbe Na'su.
17 Tsomba faesu sefacconi'su shondo'su coejechiganga ccutsu'choma gi atte. Fundondo'e afapa ccompana, pindo, poiyi'cco sefani chhajeqque'suma ttu'sepa su:
—Jipa bopa Chiga an'jen'choma an'faja. 18 Jipa ande na'sumbe nama an'faja. Nane sundaro nasundeccuma, sundarondeccuma'qque qui an'faya. Cavayo, toya'caen tsanga dyaipa jacansundeccuma'qque qui an'faya. Poi a'i, majan nasu'pa, majan na'suve mechoa, majan ti'tsse'tssia, majan utu'ccoa –poimbe nama qui an'faya.
19 Tsomba dyo'ccoa cocoyama gi ccase atte. Poi ande'su nasundeccu, tise'pa sundarondeccui'ccu dyo'ccoa cocoyanga bo'fa. Bopa totoa cavayonga dyai'sui'ccu, tise sundarondeccui'ccu geraencco'fa. 20 Geraenccopa dyo'ccoa cocoyama patsupa indi'fa. Tisene afopoen'suma'qque indi'fa. Tsaja dyo'ccoa cocoyai'ccu fae'ngae jacamba afopa'cho canjaen'chove canjaen'su tsu. Tsa'caen afopa'cho canjaen'choi'ccu tsu cocoya inise tevaen'choi'ccu tevaengesundeccuma qqueña. Toya'caen ñoña'cho cocoyama iñajansundeccuma'qque tsu qqueña. Dyo'ccoa cocoyama, tisene afopoen'suma'qque indipa toya canseveyi si'nge singu'ccunga ttova moen'fa. Tsa singu'ccuja asufrei'ccu juru'je. 21 Toya'caen tise'pa sundarondeccuma'qque tsu fitti'tti. Nane totoa cavayonga dyaipa ja'sumbe aya'fani eje'cho sundaro matichi'ccu tsu tise'pama fitti'tti. Pa'cco pindo, ccompana'qque tte'pputsse tise'pa nama an'fa.
Mil canqque'fave Satanama picco'cho