45
Echö köl fän iten apwüpwülüen ewe king
45.1-17
Ngeni ewe mi emweni chon köl: Ei köl usun ngingin ewe köl itan Kiop. Echö än nöün Kora kewe mwän kölün kait. Echö kölün tong.
1 Lelukei a säsewu ren pworaus mi mürina.
Üpwe apasa ekewe wokisin lon ai we köl fän iten ewe king.
Chönawei a usun nöün eman soumak pen mi molotä.
2 En ka äteöch seni mwän meinisin,
kapasen awom ra pwetete,
iei mine Kot a afeiöchuk fansoun meinisin.
3 En ewe mi pwora, kopwe rietä noum ketilas won wänükum,
ka ling o manaman.
4 Fän om manaman kopwe fetal ngeni win
pwe kopwe peni let, tipefesir me pwüng.
Ren om pöchökül kopwe föri föför mi amwarar.
5 Wokum kewe föün esefich ra ken,
ra fotolong lon luken ekewe chon oputom.
Chon ekewe mwü ra kuf fomw.
6 Om lenien motun king a usun chök än Kot lenien mot,
a nom tori feilfeilachök.
Ka nemeni noum kewe aramas fän pwüng.
7 Ka efich pwüng, nge ka oput mi ngau.
Iei mine Kot, om we Kot a filuketä,
a fang ngonuk pwapwa
lap seni an fang ngeni chienom kewe. ✡ Ipr 1.8-9
8 Ufom kewe meinisin ra pwokus ren pwonnen lö seni ekewe irä mör, aloes me kasia.
Chon ettiki pisekin ettik mi wor saitenir ra apwapwook me lon imwen king mi fout ngeni ngiin äläfant.
9 Nöün ekewe king föpwül ra nom lein ekewe fefin mi nom lon imwom,
nge ewe kiwiin mi ütä lepelifichum
a fout ngeni kolt seni Ofaia.
10 Nei föpwül, kopwe rongorong ai kapas o ekieki usur.
Kopwe manlükala aramasom me chon leimwen semom,
11 mürin, ewe king epwe fokun sani liöchum.
Kopwe tütiu me mwan, pun i om samol.
12 Ekewe aramasen Tirus repwe uwato ar lifang ngonuk,
ekewe aramas mi fokun pisekisek repwe kütta chenir me reöm.
13 Nöün ewe king föpwül a unusen ling me lon rumwan,
üfan kewe ra tür seni terech kolt.
14 Ra emwenala i ren ewe king fän üfan mi sokopat önüan,
ra pwal emwenala chienan kewe föpwül
mi tapwela mürin.
15 Ra feito o tolong lon imwen ewe king
fän pwapwa o mweireir.
16 Noum kewe mwän repwe akasiwili
om kewe lewo lon wisen king.
Ka awiseer pwe repwe nemenem won unusen fanüfan.
17 Üpwe pwärala om iteföüla seni eu täppin aramas tori pwal eu täppin.
Iei mine chon ekewe mwü repwe mwareituk tori feilfeilachök.