1 Iwe, ewe Samol mi Lapalap a apasa, “Ousap föri fän itemi uluulun anü, ousap aüetä uluulun anü ika ür, ousap pwal aüetä eföü fau mi auluul ngeni anü lon fanüemi pwe oupwe fel ngeni. Pun ngang ewe Samol mi Lapalap ämi we Kot. ✡ Lif 19.4; Eks 20.4; Tut 5.8; 16.21-22; 27.1 2 Oupwe apiniöchü ai kewe ränin sapat o meniniti imwei mi pin. Ngang ewe Samol mi Lapalap.

3 Iwe, are oupwe apwönüetä ai kewe pwüüng o aleasochisi ai kewe allük, 4 ngang üpwe ngenikemi üt lon fansoun öch, pwe irän ewe fanü repwe märitä o ua. 5 Iwe, fansoun ämi wichi umwun wiich epwe soposopola tori fansoun ämi kini föün irän wain, nge fansoun ämi kini föün irän wain epwe soposopola tori fansoun ämi fofot. Iwe, epwe wor chomong enemi mongö, oupwe pwal nom lon fanüemi fän kinamwe. ✡ Tut 11.13-15; 28.1-14 6 Üpwe fang ngenikemi kinamwe lon ewe fanü, oupwe konola o annut, nge esap wor eman epwe eniwokusukemi. Üpwe atoaua seni ewe fanü manmwacho, esap pwal chüen fis maun lon fanüemi. 7 Oupwe tapweri chon oputakemi ren ketilas, nge ir repwe kuf remi. 8 Iwe, limman senikemi repwe akufu ipükü, nge ipükü repwe akufu engol ngeröü. Iei usun chon oputakemi repwe kuf remi lon maun. 9 Üpwe ümöümöch ngenikemi, üpwe aupukemi o achomongakemi, üpwe pwal apwönüetä ai pwon ngenikemi. 10 Räsin fanüemi epwe fokun chomong, pwe oupwe chüen mongö mongön ewe ier a la tori oupwe aturala ewe mongö minen lom seni ämi lenien iseis, pwe epwe wor lenien ewe mongö mi fö. 11 Iwe, üpwe imweimw lefilemi lon imwei mi pin, nge üsap oputakemi. 12 Üpwe nonom remi pwe üpwe ämi Kot, nge ämi oupwe nei aramas. ✡ 2.Kor 6.16 13 Ngang ewe Samol mi Lapalap ämi we Kot, üa emwenikemiiwu seni ewe fanü Isip, pwe resap chüen nöünikemi amanau. Iwe, üa kupi ewe waas mi nom won afaremi, pwe oupwe wenetä le fetal.”

14 Iwe, ewe Samol mi Lapalap a apasa, “Are ousap mochen aleasochisi aloi, ousap pwal apwönüetä ai kewe allük meinisin, ngang üpwe apwüngükemi. 15 Are oua oput ai kewe pwüüng o purätiu ai kewe allük, are ousap apwönüetä ai kewe allük meinisin, pwe oua atai ai pwon ngenikemi, 16 iei usun mine üpwe föri ngenikemi: Üpwe awarakaieto womi niuokus watte, fius me pwichikar mi atopwala mesemi o akisikisala pöchökülen inisimi. Iwe, epwe solap ämi fofot, pun chon oputakemi repwe eni uän fotämi. 17 Üpwe ü ngenikemi, nge oupwe kuf ren chon oputakemi. Chokewe mi oputakemi repwe nemenikemi. Iwe, ämi oupwe sü, ngei esap wor eman a tapwerikemi. 18 Lupwen ekei feiengau ra torikemi, nge ousap mochen aleasochisi aloi, üpwe awatteloi ai apwüngükemi fän fisu pokiten ämi tipis. 19 Iwe, üpwe aükätiu ämi lamalamtekia me ülöförea. Üpwe föri pwe üt esap püngütiu won fanüemi, nge ewe fanü epwe pwasapwas o pöchökül usun mächä. 20 Epwe solapmwälila ämi pöchökül le angang ngeni ewe pwül, pun irän fanüemi resap mämäritä, resap pwal ua.

21 Mürin, are oua chüen lükümach ngeniei pwe ousap mochen aleasochisi aloi, üpwe awatteloi ämi riaföü, pwe epwe fän fisu lap seni me mwan pokiten ämi tipis. 22 Iwe, üpwe tinala ekewe manmwacho pwe repwe afeiengauakemi. Repwe niela nöümi semirit o ochei nöümi man, repwe pwal achokisikisikemiila pwe alen fanüemi repwe pönüla.

23 Are üpwe apwüngükemi iei usun, nge ousap kul ngeniei, pwe oua chüen ü ngeniei, 24 mürin ngang üpwe pwal ü ngenikemi o afeiengauakemi fän fisu lap seni me mwan pokiten ämi tipis. 25 Üpwe awarato maun womi, pwe iei chappen ämi atai ewe pwon. Nge are oua sülong lon ämi kewe telinimw, üpwe tinala mätter leimi. Oupwe tolong fän nemenien chon oputakemi. 26 Lupwen üpwe akisikisala enemi mongö, epwe fis pwe engol fefin repwe umuni ener pilawa lon eu chök um. Mürin repwe paunei ewe pilawa o ineti. Iwe, oupwe mongö, nge ousap möt ren.

27 Are iei mwo ai ariaföüükemi, nge ousap mochen aleasochisiei pwe oua chök sopwela le ü ngeniei, 28 mürin üpwe pwal ü ngenikemi lon ai song o püsin emiritikemi fän fisu lap seni me mwan pokiten ämi tipis. 29 Iwe, pokiten watten ämi echik oupwe ochei fituken püsin nöümi ät me nengin. 30 Üpwe atai ämi kewe lenien fel won ekewe leni tekia o pökükisietiu ämi kewe rongen asoren ötüöt. Üpwe pwal moneetä inisin ämi kewe somä won ämi kewe uluulun anümwäl mi tatakis. Iwe, üpwe fokun oputakemi. 31 Üpwe atai ämi kewe telinimw o apönü ämi kewe leni mi pin. Üsap fokun etiwa ämi kewe asor oua keni. 32 Ewer, üpwe fokun ataela fanüemi, pwe chon oputakemi mi lefanüla lon repwe mairü ren. 33 Iwe, üpwe awarato maun womi o atoropasafeilikemi lein ekewe mwü. Fanüemi epwe tala, nge ämi kewe telinimw repwe tatakis. ✡ Tut 28.15-68

34 Mürin, ewe fanü epwe pwapwaiti an kewe ierin asösö lon ükükün fansoun a tala. Lupwen oua oola lon fanüen chon oputakemi, ewe fanü epwe asösö o pwapwaiti an kewe ierin sapat. 35 Iwe, ükükün fansoun ewe fanü a tala lon, ina pwal ükükün fansoun an epwe asösö, pun esap asösö lon ämi kewe ierin sapat, lupwen oua nonom won. 36 Nge üpwe awora niuokus lon leluken chokewe me leimi mi chüen manau lon fanüen chon oputer, pwe repwe sü ren mwataten echö chön irä mi äs ren asepwäl, usun chök eman aramas a sü lupwen maun. Iwe, repwe turula, nge esap wor eman a tapweriir. 37 Eman epwe tumula won eman, usun chök aramas ra tumula ren ar sü lupwen maun, nge esap wor eman a tapweriir. Epwe wor ämi pireir, pwe ousap tongeni ü ngeni chon oputakemi. 38 Iwe, oupwe mäla lein chon ekewe mwü, nge fanüen chon oputakemi epwe oromikemiila. 39 Nge chokewe me leimi mi chüen manau lon fanüen chon oputer, epwe üttüla inisir pokiten ar föföringau, pwal pokiten an semer föföringau.

40 Mürin epwe fis pwe repwe pwärätä ar föföringau, pwal än semer kewe föföringau ra föri ngeniei lon ar ekisolä me ü ngeniei, 41 iei popun ngang üa pwal ü ngeniir o tinirela lon fanüen chon oputer. Iwe, lupwen leluker mi ülöförea epwe tekison pwe ra angei chappen ar tipis, 42 ngang üpwe chechemeni ai pwon ngeni Jakop, ai pwon ngeni Isaak me ai pwon ngeni Apraham, üpwe pwal chechemeni ewe fanü. ✡ Ken 28.13-14; Ken 26.3-4; Ken 17.7-8 43 Nge akom ekewe aramas repwe likitala ewe fanü, pwe ewe fanü epwe pwapwaiti an kewe ierin asösö, lupwen a tala. Iwe, repwe angei chappen ar tipis, pun ra purätiu ai kewe allük o oput ai kewe pwüüng. 44 Nge inamwo are ra nom lon fanüen chon oputer, üsap likitirela, üsap pwal oputeer. Iei mine üsap fokun aroserela o atai ai pwon ngeniir. Pun ngang ewe Samol mi Lapalap ar we Kot. 45 Pun fän äsengesiir üpwe chechemeni ai pwon ngeni ar kewe lewo, chokewe üa emwenirewu seni ewe fanü Isip fän mesen ekewe mwü, pwe üpwe ar Kot. Ngang ewe Samol mi Lapalap.”

46 Iwe, ikkei ekewe allük me pwüüng ewe Samol mi Lapalap a ngeni Moses me won ewe chuk Sinai fän iten ekewe aramasen Israel.