1 Iwe, are eman aramas epwe eäni eu asoren kinamwe, epwe eäni asor eman ätemwän ika eman liafefin seni nöün kow, nge epwe chök eäni asor ngeni ewe Samol mi Lapalap eman man esap wor terin. 2 Iwe, epwe anomu pöün won möküren an we mönün asor o niela leasamalapen ewe imw mangaku ia aramas ra churi Kot ie. Nge ekewe souasor nöün Aaron kewe mwän repwe uti chan ngeni pwelin ünükün ewe rongen asor. 3 Nge seni ewe mönün asoren kinamwe epwe eäni asor won ekkei ngeni ewe Samol mi Lapalap ewe kiris mi pwölüela pisekin lon inisin meinisin, 4 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün. 5 Mürin, nöün Aaron kewe mwän repwe keni me won ewe rongen asor asen ewe asoren kek mi nom won mwüchün ewe ekkei. Ei eu asor ewe Samol mi Lapalap a efich pwoon.

6 Iwe, are eman aramas epwe eäni eu asoren kinamwe ngeni ewe Samol mi Lapalap seni nöün sip eman ätemwän ika eman liafefin, epwe chök eäni asor eman man esap wor terin. 7 Are epwe eäni asor eman sip, epwe uwato fän mesen ewe Samol mi Lapalap, 8 epwe anomu pöün won möküren an we mönün asor o niela mwen ewe imwenfel seni mangaku. Nge nöün Aaron kewe mwän repwe uti chan ngeni pwelin ünükün ewe rongen asor. 9 Iwe, seni ewe mönün asoren kinamwe epwe eäni asor won ekkei ngeni ewe Samol mi Lapalap ekei kinikin: kirisin, unusen kirisin mechan, epwe rei kükü ngeni chülapan, ewe kiris mi pwölüela pisekin lon inisin meinisin, 10 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün. 11 Iwe, ewe souasor epwe keni ekei kinikin me won ewe rongen asor, pwe eu asoren mongö ngeni ewe Samol mi Lapalap.

12 Nge are epwe eäni asor eman kuuch, epwe uwato fän mesen ewe Samol mi Lapalap, 13 epwe anomu pöün won möküran o niela mwen ewe imwenfel seni mangaku. Nge nöün Aaron kewe mwän repwe uti chan ngeni pwelin ünükün ewe rongen asor. 14 Mürin, epwe eäni asor ngeni ewe Samol mi Lapalap seni ewe mönün asor ewe kiris mi pwölüela pisekin lon inisin meinisin, 15 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün. 16 Iwe, ewe souasor epwe keniir won ewe rongen asor pwe eu asoren mongö mi pwoöch. Kirisin ekewe mönün asor meinisin än ewe Samol mi Lapalap. 17 Ousap ochoch kiris ika ün cha. Ei epwe eu allük ngenikemi tori feilfeilachök seni eu täppin aramas tori eu täppin ekis meinisin ia oua nom ie.