1 Iwe, lupwen Josua a fokun chinlap, ewe Samol mi Lapalap a üreni, “Ka fokun chinlapala, nge a chüen wor chomong fanü ousamwo liapeni. 2 Iei ewe fanü ousamwo liapeni: Unusen kinikinin fanüen chon Filistia me chon Kesur. 3 Ewe fanü seni ewe chanpupu Sihor mi nom ötiuen Isip pwere ngeni efeng tori kiännin Ekron, iei fanüen chon Kanaan. Nge mi wor limman sounemenemen chon Filistia, ra nom lon Kasa, Astot, Askelon, Kat me Ekron. Ousamwo pwal liapeni fanüen chon Aw mi nom ör, 4 unusen fanüen chon Kanaan me Meara, fanüen chon Siton tori Afek mi nom arun kiännin fanüen chon Amor, 5 ewe fanüen chon Kepal me unusen ewe fanü Lepanon kükü ngeni ötiu, seni Paal-kat mi nom fäsonun ewe chuk Hermon tori ewe al mi ale ngeni Hamat, 6 pwal ekewe fanüen chon Siton meinisin mi chukuchukutä lefilen Lepanon me Misrefot-maim. Ngang üpwe püsin asüela me mwen ekewe aramasen Israel chon ekewe fanü meinisin. Nge kopwe chök ineti ewe fanü ngeni ekewe chon Israel pwe repwe fanüeni, usun üa fen allük ngonuk. ✡ Num 33.54 7 Iei mine kopwe ineti ei fanü ngeni ekewe tiu ainang me ewe esopun ainangen Manasa, pwe repwe fanüeni.”

8 Iwe, ewe esopun ainangen Manasa me chon ekewe ainangen Rupen me Kat ra fen angei fanüer me ren Moses pekilan ewe chanpupu Jortan me peliötiuan, usun Moses nöün ewe Samol mi Lapalap we chon angang a fen ineti ngeniir. ✡ Num 32.33; Tut 3.12 9 Fanüer a poputä seni Aroer mi nom lepökütiwen ewe lemolun Arnon pwal ewe telinimw mi nom lukalapen ewe lemol me unusen ewe fanü mi sosonöch seni Metepa tori Tipon, 10 fiti ekewe telinimw meinisin än Sihon ewe kingen chon Amor mi nemenem lon Hespon tori kiännin fanüen chon Amon. 11 Ra pwal fanüeni Kiliat me ewe fanüen chon Kesur me chon Makat, unusen ewe chuk Hermon me unusen Pasan tori Saleka. 12 Iei unusen ewe mwün Ok, ätewe a nemenem lon Astarot me Etrei, i amüchülan mwirimwirin chon Refa. Iwe, Moses a akufu ekei aramas o asürela seni fanüer. 13 Nge ekewe aramasen Israel resap asüela chon Kesur me chon Makat seni fanüer. Iei mine ra nonom lein chon Israel tori ikenai.

14 Iwe, Moses esap ngeni chon ewe ainangen Lefi eu fanü pwe repwe fanüeni. Nge repwe angei inetir seni ekewe asor aramas ra uwato pwe repwe kek fän iten ewe Samol mi Lapalap ewe Koten Israel, pun iei usun Kot a fen kapas ngeni Moses. ✡ Tut 18.1

15 Iwe, Moses a ngeni chon ewe ainangen Rupen fanüer a aükük ngeni ükükün ar kewe famili. 16 Iei kinikinin fanüer seni Aroer mi nom lepökütiwen ewe lemolun Arnon, pwal ewe telinimw mi nom lukalapen ewe lemol me unusen ewe fanü mi sosonöch tori Metepa 17 me Hespon fiti wisoposopun kewe meinisin mi nom lon ewe fanü mi sonosonöch, pwal ekewe telinimw Tipon, Pamot-paal me Pet-paalmeon, 18 Jahas, Ketemot me Mefaat, 19 Kiriat-aim, Sipma me Seret-sahar mi nom won palapalatän ewe lemol, 20 Pet-peor, ekewe palen ewe chuk Piska me Pet-jesimot. 21 Ikkei ekewe telinimw meinisin mi nom won ewe fanü mi sosonöch me unusen ewe mwün Sihon ewe kingen chon Amor mi nemenem lon Hespon. Sihon ätewe Moses a akufu fiti ekewe souemwenin Mitian iter Ewi, Rekem, Sur, Hur me Repa. Ir ekewe samolukis nöün Sihon mi nom lon ewe fanü. 22 Iwe, pwal Palaam nöün Peor we mwän ewe soupwe a fitilong lein chokewe ekewe aramasen Israel ra niela. 23 Iwe, ewe chanpupu Jortan kiännin fanüen ekewe aramasen Rupen me pelilotou. Iei fanüen chon ewe ainangen Rupen fiti ar kewe telinimw me wisoposopur a aükük ngeni ükükün ar kewe famili.

24 Iwe, Moses a pwal ngeni chon ewe ainangen Kat fanüer a aükük ngeni ükükün ar kewe famili. 25 Iwe, kinikinin fanüer: Jaser me ekewe telinimwen Kiliat meinisin pwal esopun fanüen chon Amon tori Aroer mi nom ötiuen Rapa, 26 pwal seni Hespon tori Rammat-mispa me Petonim, seni Mahanaim tori kiännin ewe telinimw Tepir. 27 Ra pwal eäni ekewe telinimw lon ewe lemolun Jortan iter Pet-haram, Pet-nimra, Sukkot me Safon, pwal lusun ewe mwün Sihon ewe kingen Hespon. Nge kiännin fanüer me pelilotou ewe chanpupu Jortan, ator ngeni ewe nomun Kaliläa me peliefeng. 28 Iei fanüen chon Kat fiti ar kewe telinimw me wisoposopur a aükük ngeni ükükün ar kewe famili.

29 Iwe, Moses a ngeni esopun chon ewe ainangen Manasa fanüer a aükük ngeni ükükün ar kewe famili. 30 Iwe, fanüer a poputä seni Mahanaim, pachelong unusen Pasan, iei unusen mwün Ok ewe kingen Pasan me ekewe telinimwen Jair meinisin lon Pasan ükükün wone telinimw, 31 pwal esopun Kiliat, Astarot me Etrei ekewe samolun telinimwen mwün Ok lon Pasan. Ikkei inetin esopun mwirimwirin Makir nöün Manasa we mwän a aükük ngeni ükükün ar kewe famili.

32 Ikkei ekewe fanü Moses a aineti me lon ewe maasiesin Moap pekilan ewe chanpupu Jortan ötiuen Jeriko. 33 Nge Moses esap ngeni chon ewe ainangen Lefi eu fanü pwe repwe fanüeni. Pun a üreniir pwe repwe angei inetir seni ekewe asor aramas ra uwato ngeni ewe Samol mi Lapalap ewe Koten Israel. ✡ Num 18.20; Tut 18.2