1 Iwe, ekewe aramasen Israel ra pwal föri mine a ngau me fän mesen ewe Samol mi Lapalap. Iei mine a atolongeer fän nemenien chon Mitian lon ükükün fisu ier. 2 Nge chon Mitian ra fokun nemenemengau ngeniir. Iei mine ekewe aramasen Israel ra opolong lon ekewe pwang mi nom won ekewe chuk, lon ekewe föimw, pwal lon ekewe leni mi pöchökül. 3 Pun iteiten fansoun ekewe chon Israel ra fotuki föün irä, ekewe chon Mitian, chon Amalek me ekewe aramas mi nom ötiu ra feito o maun ngeniir. 4 Iwe, ra asoi fanüer o ataela mine a märitä me won tori ünükün Kasa. Ra pwal angei nöür sip me kow me aas meinisin, nge resap likiti och fän iten chon Israel, pwe repwe manau seni. 5 Pun ra feito fiti nöür man me imwer imw mangaku, usun epwi pwiin lifichimas. Iwe, esap wor eman a tongeni aleaniir me nöür kamel. Iei mine ewe fanü a tala, lupwen ra tolong lon. 6 Iwe, chon Israel ra fokun mwelele pokiten chon Mitian. Iei mine ra siö ngeni ewe Samol mi Lapalap pwe epwe alisiir.

7 Lupwen ekewe aramasen Israel ra siö ngeni ewe Samol mi Lapalap pokiten ekewe chon Mitian, 8 ewe Samol mi Lapalap a tinala rer eman soufos. Iwe, a üreniir, “Iei alon ewe Samol mi Lapalap ewe Koten Israel: Üa emwenikemiiwu seni Isip, ewe leni ia ra nöünikemi amanau ie. 9 Üa angasakemi seni chon Isip, pwal seni chokewe mi ariaföüükemi lon ei fanü. Üa asürela me mwemi o ngenikemi fanüer. 10 Iwe, üa ürenikemi, ‘Ngang ewe Samol mi Lapalap ämi we Kot. Ousap fel ngeni än chon Amor kewe kot, ir chokewe oua fen nonom lon fanüer.’ Nge ämi ousap aüselinga aloi.”

11 Mürin, nöün ewe Samol mi Lapalap chon läng a feito Ofra o mottiu fän ewe irä ook än Joas seni ewe eterekesin Apieser. Nge Kition nöün we mwän a wichiwich umwun wiich lon ewe lenien üchüch wain, pun a aopala seni chon Mitian. 12 Iwe, nöün ewe Samol mi Lapalap we chon läng a pwä ngeni Kition o üreni, “Ewe Samol mi Lapalap a etuk, en sounfiu mi pwora.” 13 Nge Kition a üreni, “Ai Samol, ika ewe Samol mi Lapalap a wesewesen etikem, pwota a fis ngenikem ekewe mettoch? Nge ikafa ekewe föför mi amwarar aia rong seni semelapem kewe, lupwen ra apworausa ngenikem usun än ewe Samol mi Lapalap emwenirewu seni Isip? Nge iei ewe Samol mi Lapalap a pöütikeemila o asechikeemilong lepöün chon Mitian.” 14 Iwe, ewe Samol mi Lapalap a kul ngeni o üreni, “Kopwe feila lon om na pöchökül o angasala chon Israel seni lepöün chon Mitian. Ngang üa tinukela.” 15 Nge Kition a üreni, “Ai Samol, epwe ifa usun ai üpwe tongeni amanaua chon Israel? Nengeni, ai eterekes a chokükün seni meinisin lon ewe ainangen Manasa, nge ngang ese wor manei lon ai famili.” 16 Iwe, ewe Samol mi Lapalap a üreni, “Ngang üpwe etuk, nge en kopwe akufu chon Mitian usun chök om kopwe akufu eman chök aramas.” 17 Nge Kition a üreni, “Are üa küna ümöümöch me reöm, kopwe pwäri ngeniei eu asisil, pwe üpwe silei pwe en ai Samol mi Lapalap ka fos ngeniei. 18 Üa tüngor ngonuk pwe kosap feila seni ikei tori üpwe liwinto reöm o uwato ai asoren mongö ngonuk.” Iwe, a üreni, “Üpwe nonom ikei tori kopwe liwinto.”

19 Iwe, Kition a liwinla leimwan o amolätä eman apanen kuuch, pwal pilawa esap wor iis lon seni ilik paun pilawa mi amas. Mürin, a iseis ewe fituk lon eu pasikit, nge setin a anomu lon eu nape o uweerela ren ewe chon läng mi nom fän ewe irä ook. 20 Iwe, nöün Kot we chon läng a üreni, “Kopwe angei ewe fituk me ewe pilawa esap wor iis lon o iseniir won ei achau, kopwe pwal ninätiu wor setin ewe.” Iwe, a föri iei usun. 21 Mürin, nöün ewe Samol mi Lapalap we chon läng a aitiewu wokun mi nom lepöün o tiki ngeni ewe fituk me ewe pilawa esap wor iis lon. Iwe, a küütä ekkei seni ewe achau o kenala ewe fituk me ewe pilawa. Mürin, ewe chon läng a morukola seni fän mesan. 22 Nge lupwen Kition a mefi pwe i nöün ewe Samol mi Lapalap we chon läng, a üra, “Ai Samol me ai Kot, osupwangei, pun iei üa küna noum we chon läng ren mesei.” 23 Ewe Samol mi Lapalap a üreni, “Kinamwe epwe toruk. Kosap niuokus, pun kosap mäla.” 24 Mürin, Kition a senätä eu rongen asor ngeni ewe Samol mi Lapalap ikenan o aita ngeni: Ewe Samol mi Lapalap i ewe Koten kinamwe. Iwe, tori ikenai ei rongen asor a chüen nom lon Ofra lon fanüen chon ewe eterekesin Apieser.

25 Iwe, lon ewe pwinin ewe Samol mi Lapalap a üreni Kition, “Kopwe angei nöün semom ätemwänin kow, ewe aruomanün ätemwänin kow fisu ierin o ataela än semom rongen asor fän iten ewe anü Paal. Kopwe pwal pöküetiu uluulun ewe anüfefin Asera mi nom ünükün. 26 Kopwe senätä eu rongen asor ngeni ewe Samol mi Lapalap om we Kot won ungen ewe leni mi pöchökül o atettelöchü föün. Mürin kopwe angei ewe aruomanün ätemwänin kow o eäni asoren kek, nge kopwe eäni mwüch uluulun ewe anüfefin Asera kopwe pöküetiu.” 27 Iei mine Kition a filätä engol mwän seni lein nöün chon angang o föri usun mine ewe Samol mi Lapalap a üreni. Iwe, a föri lepwin, nge sap lerän, pun a niuokusiti an famili me mwänin ewe telinimw.

28 Iwe, lupwen mwänin ewe telinimw ra pwätä lesosorusich, ra küna pwe ewe rongen asor fän iten ewe anü Paal a tala, nge uluulun ewe anüfefin Asera mi nom ünükün a pöküpökütiu. Iwe, ewe aruomanün ätemwänin kow a fen kek won ewe rongen asor mi sesetä. 29 Iwe, ra kapasfengen lefiler, “Iö a föri ei sokun?” Nge mürin ar alewoi o akais ra apasa, “Kition nöün Joas we mwän a föri ei.” 30 Mürin, mwänin ewe telinimw ra üreni Joas, “Kopwe emwenawu noum we mwän pwe aipwe niela, pun a ataela ewe rongen asor fän iten ewe anü Paal o pöküetiu uluulun ewe anüfefin Asera mi nom ünükün.” 31 Nge Joas a kapas ngeni chokewe meinisin mi ütä ünükün fän ar song, “Ifa usun, ämi oua mochen fiu fän iten ewe anü Paal? Ika oua mochen peni? Iö epwe fiu fän iten ewe anü Paal epwe ninnila lesosorun lesor. Are Paal eman kot, epwe püsin fiu fän itan, pun an rongen asor a kata.” 32 Iwe, lon ena ränin ra aita ngeni Kition Jerupaal * Jerupaal wewen Paal epwe püsin fiu fän itan, pun ra apasa, “Likiti ngeni ewe anü Paal pwe epwe püsin fiu ngeni Kition, pokiten a ataela an rongen asor.”

33 Mürin, ekewe chon Mitian meinisin, ekewe chon Amalek me ekewe aramas mi nom ötiu ra chufengen, ra pwereto pekiton ewe chanpupu Jortan o nonom lon ewe lemolun Jesreel. 34 Nge Ngünün ewe Samol mi Lapalap a feitiu won Kition. Iwe, a ettiki eu rappwa, pwe chon ewe eterekesin Apieser repwe rong o tapwela mürin. 35 Iwe, Kition a tinala chon künö lemenen ewe fanü Manasa. Nge chon ewe ainangen Manasa ra rong ewe kö o tapwela mürin. Kition a pwal tinala chon künö ren chon ekewe ainangen Aser, Sepulon me Naftali. Iwe, pwal ir ra feila pwe repwe chu ngeniir.

36 Mürin, Kition a üreni Kot, “Are en kopwe angasa Israel rei, usun ka fen apasa, 37 nengeni, iei üa isenätiu och ülöülen sip won ewe lenien wichiwich umwun wiich. Are epwe wor amurenipwin won ewe ülöülen sip echök, nge won unusen ewe pwül epwe pwasapwas, mürin üpwe silei pwe en kopwe angasa Israel rei, usun ka fen apasa.” 38 Iwe, a fis iei usun. Lupwen Kition a pwätä lesosorusichin sorotän ewe rän, a unguti ewe ülöülen sip, nge ükükün ewe koluk a ungutawu seni a aura eu sepi. 39 Mürin, Kition a üreni Kot, “Kose mochen kosap song ngeniei, nge kopwe mwüt ngeniei pwe üpwe pwal kapas fän eu. Kose mochen mwüt ngeniei pwe üpwe föri pwal eu sosot ren ei ülöülen sip. Üa tüngor pwe epwe pwasapwas won ewe chök ülöülen sip, nge won unusen ewe pwül epwe chöchön ren amurenipwin.” 40 Iwe, Kot a föri iei usun lon ewe pwinin. Pun won ewe ülöülen sip a pwasapwas, nge won unusen ewe pwül a chöchön ren amurenipwin.