1 Mürin ekewe chon Israel meinisin ra feil seni Elim. Nge lon engol me limuen ränin aruuen maram mürin ar towu seni Isip ra tori ewe fanüapön Sin a nom lefilen Elim me Sinai. 2 Nge unusen ewe mwichen chon Israel ra lal ngeni Moses me Aaron lon ewe fanüapö. 3 Iwe, ra üreniir, “Amwo aipwe fen mäla ren pöün ewe Samol mi Lapalap lon Isip, lupwen aia mot ngeni ekewe sepien fituk o mongö chomong sokun mongö. Nge ämi oua emwenikeemilong lon ei fanüapö pwe oupwe nikem meinisin ren echik.”

4 Mürin, ewe Samol mi Lapalap a üreni Moses, “Üpwe apüngätiu mongö remi seni läng. Iwe, ekewe aramas repwe towu iteiten rän o ioni ükükün mongön eu chök rän, pwe üpwe sotuniir ika repwe apwönüetä ai allük ika resap. ✡ Joh 6.31 5 Iwe, lon awonuen rän repwe amolätä ionier mongö, nge epwe ükükün mongön ruu rän.” 6 Mürin, Moses me Aaron ra üreni ekewe aramasen Israel meinisin, “Lekuniolei oupwe mefi pwe ewe Samol mi Lapalap i ewe mi emwenikemiiwu seni Isip. 7 Nge lesosor oupwe küna lingen ewe Samol mi Lapalap, pun a rongorong ämi lal ngeni. Pun iö äm pwe oua lal ngenikem?” 8 Moses a pwal üra, “Ewe Samol mi Lapalap epwe ngenikemi fituk lekuniol pwe oupwe ochoch, nge lesosor epwe ngenikemi pilawa ükükün ämi mochen, pun a rongorong ämi lal ngeni. Pun iö äm? Ousap lal ngenikem, pwe oua lal ngeni ewe Samol mi Lapalap.”

9 Mürin, Moses a kapas ngeni Aaron, “Kopwe üreni ekewe aramasen Israel meinisin pwe repwe kanoto fän mesen ewe Samol mi Lapalap, pun a rongorong ar lal.” 10 Iwe, lupwen Aaron a fofos ngeni ekewe aramas, ra kul ngeni ewe fanüapö, nge lon ei otun lingen ewe Samol mi Lapalap a pwä lon ewe kuchu. 11 Iwe, ewe Samol mi Lapalap a üreni Moses, 12 “Üa rongorong än ekewe aramasen Israel lal. Kopwe üreniir, ‘Lefäf oupwe ochoch fituk, nge lesosor oupwe mongö pilawa ükükün mötümi. Mürin oupwe silei pwe ngang ewe Samol mi Lapalap ämi we Kot.’ ”

13 Iwe, lon ewe kuniolun mansüsü iter kweil ra ässito o pwölüela ewe leni ia ra nonom ie. Nge lesosor amurenipwin a nom pwelin ünükün ewe leni. 14 Nge lupwen ewe amurenipwin a morola, a wor won pwülün ewe fanüapö och sättin mettoch mi chächäk usun snow. 15 Iwe, lupwen aramasen Israel ra küna, ra kapasfengen lefiler, “Met ei?” * lon kapasen Ipru man hu Pun resap silei met ewe. Nge Moses a üreniir, “Iei ewe mongö ewe Samol mi Lapalap a fangoto remi pwe oupwe mongö. ✡ 1.Kor 10.3 16 Iei usun ewe Samol mi Lapalap a allük, ‘Oupwe ionifengeni ei mettoch iteiten eman me eman ükükün anan. Oupwe angei ina epwe ükükün masouen esop kalon fän iten eu pöpön mökür lon en me imwan imw mangaku.’ ” 17 Iwe, ekewe aramasen Israel ra föri iei usun. Ra ionifengeni ewe mettoch, ekoch ra ioni chomong, nge ekoch kükün seni. 18 Nge lupwen ra aükük mine ra ioni, a pwä pwe ätewe mi chomong ionian esap wor somwan, nge ätewe mi kükün ionian esap nafangau ionian. Eman me eman a chök ioni ükükün anan. 19 Mürin, Moses a üreniir, “Ousap isoni ekis seni ewe mongö tori lesosor.” ✡ 2.Kor 8.15 20 Nge ekoch me leir resap aüselinga alon Moses, pun ra iseis och tori lesosor. Iwe, ewe mongö a wul o pongau. Nge Moses a song ngeniir. 21 Iteiten lesosor ra ionifengeni ewe mongö, eman me eman ükükün anan. Nge lupwen akkar a pwichikar, a telila ewe mongö.

22 Iwe, lon awonuen rän ra ionifengeni ükükün masouen eu kalon fän iten eman me eman. Nge lupwen ekewe meilapen chon Israel ra feito ren Moses o asile ngeni, 23 Moses a üreniir, “Iei usun mine ewe Samol mi Lapalap a allük pwe lesor eu ränin asösö, eu ränin sapat mi pin fän iten ewe Samol mi Lapalap. Ikenai oupwe umuni mine oua mochen umuni, oupwe pwal kuku mine oua mochen kuku, nge mine a lusun, oupwe iseis ngeni lesor.” ✡ Eks 20.8-11 24 Iei mine ra iseis ener mongö ngeni lesor, usun Moses a allük ngeniir, nge esap pongau, esap pwal wul. 25 Iwe, Moses a üra, “Oupwe eni ei mongö ikenai, pun ikenai ewe ränin sapat fän iten ewe Samol mi Lapalap. Ikenai ousap küna ei mongö me lükün. 26 Lon ükükün wonu rän oupwe ionifengeni ei mongö, nge lon afisuen rän, ewe ränin sapat, esap wor ewe mongö.” 27 Iwe, lon afisuen rän ekoch me lein ekewe aramas ra towu lükün pwe repwe ioni ewe mongö, nge resap künakün. 28 Mürin, ewe Samol mi Lapalap a üreni Moses, “Ifa ükükün fansoun ämi ousap mochen aleasochisi ai kewe allük me pwüüng? 29 Oupwe chechemeni pwe ngang ewe Samol mi Lapalap üa ngenikemi ewe ränin sapat, iei mine üa pwal ngenikemi ükükün mongön ruu rän lon ewe awonuen rän. Nge lon ewe afisuen rän eman me eman leimi epwe chök nom lon lenian, esap wor eman epwe towu seni.” 30 Iei usun ekewe aramas ra asösö lon ewe afisuen rän.

31 Iwe, ekewe chon Israel ra aita ngeni ewe mongö mana. A usun kükün föün irä mi oleolepwech, nge nennan a usun chök nennen okasi mi nofit ngeni chönün chunen. ✡ Num 11.7-8 32 Moses a üra, “Iei usun mine ewe Samol mi Lapalap a allük, ‘Oupwe iseis ei mongö ükükün masouen esop kalon, epwe nom pwe mwirimwirimi repwe küna ei mongö üa amongöü ngenikemi lon fanüapö, lupwen üa emwenikemiiwu seni Isip.’ ” 33 Iei mine Moses a üreni Aaron, “Kopwe angei eu pör, kopwe iseis ükükün masouen esop kalon mana lon o anomu fän mesen ewe Samol mi Lapalap, epwe nom fän iten mwirimwirimi.” ✡ Ipr 9.4 34 Usun mine ewe Samol mi Lapalap a allük ngeni Moses, iei usun Aaron a iseis ewe mongö mwen ekewe allük, pwe epwe nonom ie. 35 Iwe, ekewe aramasen Israel ra mongö ewe mana lon ükükün faik ier tori ra tikeri fanü mi so. Ra mongö ewe mana tori ra ipwelong lon kiännin ewe fanü Kanaan. ✡ Jos 5.12 36 Ewe aükük ra eäni longolong fän iten mettoch mi pwas lon ena fansoun, ina epwe ükükün limu kalon.