1 Mürin, Moses a üra, “Nge ika resap mochen lüküei, resap pwal aüselinga aloi? Met üpwe föri ika repwe apasa, ‘Ewe Samol mi Lapalap esap pwä ngonuk?’ ” 2 Iwe, ewe Samol mi Lapalap a aisini, “Met na mi nom lepoum?” Nge Moses a üra, “Efoch wok.” 3 Iwe, Kot a üreni, “Kopwe aturätiu ena wok lepwül.” Iei mine a aturätiu. Iwe, a wiliti eman serepenit, nge Moses a sü seni. 4 Mürin, ewe Samol mi Lapalap a kapas ngeni Moses, “Kopwe pworotiu o turufi wükün.” Iei mine Moses a pworotiu o turufi, nge a wilisefäliti efoch wok me lepöün. 5 Iwe, ewe Samol mi Lapalap a üreni, “Ren ei repwe lükü pwe ngang ewe Samol mi Lapalap än ar kewe lewo Apraham, Isaak me Jakop we Kot a pwä ngonuk.” 6 Iwe, ewe Samol mi Lapalap a pwal üreni Moses, “Kopwe sökalong poum lon üfom.” Iwe, a sökalong, nge lupwen a sökawu, pöün a rupun pwötür usun chök pwechepwechen snow. 7 Mürin, Kot a üreni, “Kopwe söksefälielong poum lon üfom.” Iwe, a sökalong, nge lupwen a sökawu, pöün a pwal pöchökül usun chök inisin. 8 Iwe, Kot a pwal üreni, “Are resap mochen lükuuk ika ekieki ewe aeuin manaman, eli repwe lükü aruuan. 9 Nge ika resap mochen lükü ekei ruu manaman ika afäli alom, kopwe üfi koluk seni ewe chanpupu Nil o ninätiu won pwül. Iwe, ewe koluk ka üfi epwe wiliti cha me won pwül.”

10 Nge Moses a üreni ewe Samol mi Lapalap, “Ai Samol, sap ngang eman mi sousile kapas seni me lom pwal tori ei fansoun ka kapas ngeniei ngang noum ei chon angang, pwe ngang eman mi angangau le kapas.” 11 Mürin, ewe Samol mi Lapalap a üreni Moses, “Iö a föri awen aramas? Iö a föri pwe aramas resap tongeni kapas ika rongorong? Iö a föri pwe repwe küna mwer ika repwe chun? Sap ngang ewe Samol mi Lapalap? 12 Iei mine kopwe feila, nge ngang üpwe alisuk le kapas o aiti ngonuk mine kopwe eäni fos.” 13 Nge Moses a üreni, “Ai Samol, kose mochen kopwe tinala eman.” 14 Mürin, ewe Samol mi Lapalap a song ngeni Moses o üreni, “Ifa usun, esap nom Aaron pwiüm we seni ewe ainangen Lefi? Üa silei pwe a tongeni angöch le kapas. A fen nom won al pwe epwe feito o churuk, nge lupwen epwe künok, epwe pwapwa lon lelukan. 15 Iwe, en kopwe kapas ngeni o aiti ngeni mine epwe apasa, nge ngang üpwe emwelieliakemi me ruoman o aiti ngenikemi mine oupwe föri. 16 Aaron epwe kapas ngeni aramas fänäsengesum, epwe pwal aweni awom, nge en kopwe usun chök Kot ngeni. 17 Iwe, kopwe angei ei wok pwe kopwe föri ekewe manaman ren.”

18 Mürin, Moses a liwinla ren semen pwülüan itan Setiro o kapas ngeni, “Kose mochen kopwe mwüt ngeniei pwe üpwe liwinla ren aramasei mi nom Isip o pi ika ra chüen manau.” Iwe, Setiro a üreni Moses, “Kopwe feila fän kinamwe.” 19 Nge ewe Samol mi Lapalap a üreni Moses me lon Mitian, “Kopwe liwinla Isip, pun ekewe aramas meinisin mi mochen niikela ra mäla.” 20 Iei mine Moses a angei pwülüan me nöün kana o amoteer won eman aas. Iwe, a liwinla lon ewe fanü Isip. Nge Moses a amwöchü lepöün ewe wokun Kot.

21 Iwe, ewe Samol mi Lapalap a üreni Moses, “Lupwen kopwe liwinla Isip, kopwe pi pwe kopwe föri ekewe manaman meinisin fän mesen Farao üa atufichi ngonuk. Nge ngang üpwe aföreai lelukan pwe esap mwüt ngeni ekewe aramas pwe repwe feila. 22 Mürin, en kopwe kapas ngeni Farao, ‘Iei alon ewe Samol mi Lapalap: Israel nei mwänichi. 23 Iwe, üpwe ürenuk pwe kopwe mwüt ngeni nei we pwe epwe feila o fel ngeniei. Nge ika kosap mwüt ngeni, üpwe niela noum mwänichi.’ ” ✡ Eks 12.29

24 Iwe, lon ar sai, lupwen ra asösö lepwin, ewe Samol mi Lapalap a churi Moses, pun a ekiekin niela. 25 Mürin, Sipora a angei esät sättin fau mi ken o sirkomsaisi nöün ät. Iwe, a angei ünüchen ewe kükün inis, a pachei ngeni pechen Moses o apasa, “Ellet, en eman re reimwen cha ngeniei.” 26 Iei mine ewe Samol mi Lapalap a likitala Moses, lupwen neminewe a apasa, “En eman re reimwen cha,” pun a kapas fän iten ewe sirkomsais.

27 Iwe, ewe Samol mi Lapalap a üreni Aaron, “Kopwe feila lon ewe fanüapö pwe kopwe churi Moses.” Iwe, a feila o churi Moses awenewenen ewe chukun Kot. Iwe, a mitiri. 28 Mürin, Moses a apworausa ngeni Aaron mine ewe Samol mi Lapalap a tini ren, a pwal asile ngeni ekewe manaman meinisin Kot a amwir ngeni pwe epwe föri. 29 Mürin, Moses me Aaron ra feila o amwichafengeni ekewe souakomwen aramasen Israel meinisin. 30 Iwe, Aaron a üreniir meinisin mine ewe Samol mi Lapalap a kapas ngeni Moses. Nge Moses a pwal föri ekewe manaman fän mesen ekewe aramas meinisin. 31 Iwe, ra lükü. Nge lupwen ra rong pwe ewe Samol mi Lapalap a äämwa ekewe aramasen Israel o küna ar riaföü, ra chapetiu o fel ngeni Kot.