1 Ämi nau kana, oupwe aleasochisi sememi me inemi lon ach Samol, pun iei met mi pwüng pwe oupwe föri. ✡ Kol 3.20 2 “Kopwe asamolu semom me inom,” iei ewe aeuin allük a riri ngeni eu pwon, 3 “pwe kopwe feiöch me manauatam won fanüfan.” ✡ Eks 20.12; Tut 5.16

4 Ämi sam me in ousap föri ngeni nöümi kana mine repwe song ren. Nge oupwe tümwünüöchür fän ämi fönöör o öüröürer lon ach Samol. ✡ Kol 3.21

5 Ämi amanau, oupwe aleasochisi ämi samol lon ei fanüfan fän niuokus me chechech. Oupwe föri ei fän wenecharen lelukemi usun chök nge oupwe aleasochisi Kraist. 6 Ousap föri chök ei lupwen ra nenengenikemi pokiten oua mochen ar repwe aitöchükemi, nge seni unusen letipemi oupwe föri letipen Kot usun eman nöün Kraist amanau. 7 Ämi amanau oupwe föri ämi angang fän pwapwa usun ämi oupwe angang ngeni ach Samol, nge sap ngeni aramas. 8 Oupwe chechemeni pwe ach Samol epwe liwini ngeni eman me eman an föför mürina, ese lifilifil ika i eman amanau ika i eman chon ngas. ✡ Kol 3.22-25

9 Ämi samol kana, oupwe pwal föri usun chök ngeni nöümi amanau, oupwe ükütiu le aniuokusur. Oupwe chechemeni pwe ämi me nöümi kewe amanau oua nöün ewe eman chök Samol lon läng, i ewe esap lifilifil aramas. ✡ Tut 10.17; Kol 3.25; 4.1

10 Iwe, iei ai kapasen lesopolan: Oupwe apöchökülakemi lon ach Samol pwal lon pöchökülen an we manaman. 11 Oupwe pwilitalong womi ekewe pisekin maun Kot a ngenikemi, pwe oupwe tongeni üpöchökül ngeni än ewe Tefil angangen atuputup. 12 Pun sisap maun ngeni fituk me cha, nge sia maun ngeni ekewe anün rochopwak mi nom fän läng, ngeni ekewe anüsamol, ngeni ekewe anüsor, pwal ngeni ekewe ngününgau mi nemeni aramas lon ei fanüfan mi rochopwak. 13 Iei mine oupwe pwilitalong womi än Kot kewe pisekin maun iei! Mürin, lupwen epwe war ewe rän mi ngau, oupwe tongeni pworacho ngeni än ewe chon oputemi maun ngenikemi. Iwe, mürin oupwe chök üpöchökül tori lesopolan ämi maun. 14 Iwe, oupwe amolakemi, oupwe peliti ngeni lukalapemi let, oupwe üföüf pwüng pwe iei ämi chechen leupw mi för seni mächä, ✡ Ais 11.5; 59.17 15 nge oupwe ipweipw susun molotä ngeni ämi oupwe aronga ewe Pworausen Manau mi wor kinamwe lon. ✡ Ais 52.7 16 Iteiten fansoun meinisin oupwe lükü Kot pwe ina ämi epetin maun, pwe oupwe tongeni kunu ngeni ekewe föün esefich mi pulopulen ekkei seni ewe Eman mi Ngau. 17 Oupwe angei ewe Manau pwe ina imwemi akau, pwal ewe kapasen Kot pwe ina nöümi ketilas ewe Ngünmifel a ngenikemi. ✡ Ais 59.17 18 Oupwe föri ekei mettoch meinisin lon ämi iotek ngeni Kot pwe epwe alisikemi. Oupwe iotek won met oua föri usun Ngünmifel a emwenikemi. Iei popun ämi oupwe mamasa o tupwöl fansoun meinisin, oupwe iotek fän iten ekewe chon pin meinisin iteiten fansoun meinisin. 19 Oupwe pwal iotek fän itei pwe Kot epwe aiti ngeniei ekewe kapas üpwe apasa lon ai afalafal, pwe üpwe pwora le kapas o asile ngeni aramas monomonen ewe Pworausen Manau. 20 Pun ngang eman chon künö fän iten ei Pworausen Manau, inamwo ika ngang üa nom lon imwen fötek iei. Oupwe iotek pwe üpwe pwora le apasatä ewe Pworausen Manau, pun iei wisei.

21 Tikikus pwiich ei mi achengicheng, pwal i ewe chon angang mi allükülük lon ewe angangen ach Samol epwe apworausa ngenikemi pworausei meinisin, pwe oupwe silei usun met üa föri o pwal usun nonomi. ✡ Föf 20.4; 2.Tim 4.12 22 Ina popun üa tinala i remi, pwe epwe apworausa ngenikemi usun nonomum, epwe pwal apöchöküla letipemi. ✡ Kol 4.7-8

23 Samach Kot me ach Samol Jesus Kraist epwe ngenikemi ämi pwiich lon Kraist kinamwe, chen me lükü. 24 Än Kot ümöümöch epwe nonom remi meinisin ämi mi echeni ach Samol Jesus Kraist ren ewe chen esap ükütiu.