1 Amwo kopwe usun chök eman mongeei ngeniei inei a oupwu.

Mürin, are üpwe churuk me lükün,

üpwe mitiruk,

nge esap wor eman epwe turunufaseei.

2 Iwe, üpwe panukolong lon imwen inei,

lon rumwen ewe mi nöüniei.

Üpwe aünuk wain mi anö,

pwal chönün föün ai apel.

3 Pöüimongum epwe nom fän mökürei,

nge pöüifichum epwe romiei.

4 Oupwe pwon ngeniei, ämi föpwülün Jerusalem,

pwe ousap aosukosuka äm tongfengen.

5 Iö we a feitä seni lon fanüapö

o üllü ngeni ätewe mi wor tongan me ren?

Fän ewe apel üa apwökuk.

Iei ewe leni inom we a nöünuk me ie.

6 Kopwe pwauni lelukom fän itei,

kosap romi eman me lüki.

Pun tong a pöchökül usun mäla,

nge lukomong a afeiengau usun ewe lenien sotup.

Tong a chök kükkü,

nge ngetengetan a fokun sarara.

7 Chomong koluk resap tongeni kunuela tong,

nge chomong lölö resap pwal tongeni amopu.

Are eman mwän a mochen möni tong ren pisekin imwan meinisin,

epwe chök uren takir me ren aramas.

8 A wor rech eman kükün pwiich esamwo tipwük.

Iwe, met sipwe föri fän iten pwiich,

ika eman alüal epwe tüngor pwe epwe pwülüeni?

9 Are pwiich a wewe ngeni eu tit,

sipwe aüetä eu imw tekia seni silifer won.

Nge are a wewe ngeni eu asamalap,

sipwe ti ngeni pap seni setar.

10 Iwe, ngang üa wewe ngeni eu tit,

nge oupwi ra usun chök ekewe imw tekia.

Iei mine üa wiliti me ren ätewe mi wor tongan me rei

usun eman mi küna kinamwe.

11 Iwe, Salomon a eäni eu tanipin wain lon Paal Hamon.

Nge a mwüt ngeni nöün chon tümwün pwe repwe tanipini.

Iwe, iteiten eman me eman a wisen mönätiu engeröü föün moni silifer fän iten uan.

12 Ai tanipin wain wesewesen püsin ai.

Iwe, en Salomon kopwe nöüni ekewe engeröü föün moni silifer,

nge ekewe chon tümwünü uän ewe tanipi repwe angei ruopükü.

13 O en mi wor tongom me rei, ka nonom lon ekewe tanipi,

chiechiom kewe ra aüselinga mweliom.

Kose mochen üpwe pwal aüselinga mweliom.

14 En mi wor tongom me rei, kopwe müttir feito rei usun chök eman chia,

ika eman ätemwänin chia won ekewe chukun irän nofitin mongö.