1 Eman alüal mi tipachem a aüselinga än saman kapasen fön, nge eman mi lamalamtekia esap aüseling ngeni kapasen emirit. 2 Eman aramasöch epwe angei liwinin met a apasa, nge chokewe resap allükülük ra pwapwaiti angangen mwänewüs. 3 Eman mi mamasa kapasen awan a tümwünü manauan, nge eman mi fos chomong a fetal ngeni feiengau. 4 Eman chon chipwang a mwäräkichiti mettoch, nge esap angei och. Nge eman mi achocho le angang epwe tori meinisin mine a mochen. 5 Eman chon pwüng a oput kapas chofana, nge eman aramasangau a föri föför mi äsäw o anioput. 6 Pwüng a tümwünü eman chon wenechar, nge pwüngingau a afeiengaua eman chon tipis. 7 Mi wor aramas ra pwomweni pwomwen chon pisekisek, nge ra wöüngau. Mi pwal wor aramas ra pwomweni pwomwen chon wöüngau, nge ra fokun pisekisek. 8 Eman aramas mi wöümong a tongeni penmanaueni manauan ren wöün, nge esap wor eman a ekiekin afeiengaua eman mi wöüngau. 9 Ekewe chon pwüng ra usun chök eu saram mi fokun tinöch, nge ekewe aramasangau ra usun chök eu lamp mi aiekunukun. 10 Lamalamtekia a afisätä anini, nge chokewe mi angei öüröürer ra tipachem. 11 Eman mi wöümongola fän mecheres wöün epwe müttir kisikisila, nge eman mi ioni ekis me ekis fän weires wöün epwe lapala. 12 Are än eman apilükülük a mang le pwönüetä, i epwe letipengau, nge are än eman mochen a pwönüetä, iei apöchökülen manauan. 13 Eman mi oput kapasen öüröür a püsin afeiengaua manauan, nge eman mi aleasochisi ekewe allük epwe angei liwinin. 14 Än ekewe chon tipachem kapasen kait iei eu puächen manau, pwe ra tongeni alisi aramas ar repwe sü seni feiengauen mäla. 15 Mirit a aworato menin, nge chokewe resap allükülük ra fetal won ewe al mi alelong lon feiengau. 16 Eman aramas mi mirit a föri an angang fän silelap, nge eman mi tiparoch a pwärifeili an umwes. 17 Eman chon künö esap allükülük a atoto osukosuk, nge eman mi allükülük a atoto kinamwe. 18 Eman esap mochen rongorong kapasen fön epwe tolong lon wöüngau me itengau, nge ätewe mi aüseling ngeni kapasen emirit epwe iteüöch. 19 Are än eman aramas mochen a pwönüetä, lelukan a pwapwa, nge ekewe chon tiparoch ra fokun oput ar repwe kul seni mine a ngau. 20 Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengau. 21 Feiengau a tapweri ekewe chon tipis, nge feiöch iei liwinin ekewe chon pwüng. 22 Eman aramasöch a likiti wöün ngeni nöün nöün kana, nge wöün ewe chon tipis epwe tori ekewe chon pwüng. 23 Ewe fanü ekewe chon wöüngau rekärän fotuki a afisätä chomong ua, nge chon pwüngingau ra amwöchü seniir ekewe fanü, pwe resap tongeni angang won. 24 Eman esap apwüngü nöün a oput nöün, nge eman mi tongei nöün a achocho le emiriti. 25 Ekewe chon pwüng a wor ener mongö pwe ra tongeni möt, nge ekewe aramasangau ra echik.