1 Iwe, ewe Samol mi Lapalap a üreni Moses, 2 “Kopwe ngeni ekewe chon Mitian chappen ar föför ngeni chon Israel. Mürin kopwap mäla.” 3 Iwe, Moses a üreni ekewe aramas, “Oupwe amolätä ekoch mwän me leimi, pwe repwe feila maun ngeni ekewe chon Mitian o ngeniir chappen ar föför fän iten ewe Samol mi Lapalap. 4 Oupwe tinala lon maun engeröü mwän seni eu me eu kewe ainangen Israel.” 5 Iei mine ra filätä engeröü mwän seni eu me eu ainang, pwe ükükün engol me ruungeröü re Israel ra molotä ngeni maun. 6 Mürin, Moses a tinirela ngeni maun, pwal Pinehas nöün ewe souasor Eleasar mwän mi uwei ekewe pisek seni ewe imw mi pin, pwal ekewe rappwa ra nöünöü le ettiki ewe tikin asilesilen maun. 7 Iwe, ra maun ngeni ekewe chon Mitian usun ewe Samol mi Lapalap a allük ngeni Moses, o niela mwän meinisin. 8 Ra pwal achu ngeni niier kewe ekewe limman king seni Mitian iter Efi, Rekem, Sur, Hur me Repa. Ra pwal niela Palam nöün Peor we mwän. 9 Iwe, ekewe aramasen Israel ra liapeni ekewe fin Mitian me nöür semirit. Ra pwal angei pwe choon wokur nöür pwiin kow me sip, pwal pisekir meinisin. 10 Nge ra pwal kenala än chon Mitian kewe telinimw me ekewe leni ia ra nonom ie. 11 Iwe, ra angei choon wokur meinisin ra liapeni, pwal ekewe aramas me man, 12 o uweereto ren Moses me ewe souasor Eleasar pwal ren ekewe aramasen Israel meinisin mi nom lon ewe maasiesin Moap arun ewe chanpupu Jortan sasape ngeni Jeriko.

13 Iwe, Moses me ewe souasor Eleasar me ekewe souemwenin ekewe aramas meinisin ra feila lükün ewe ia ra nonom ie, pwe repwe churiir. 14 Nge Moses a song ngeni ekewe meilapen mwichen sounfiu, ir ätekewe mi nemenem won ngeröü me pükü ra liwinto seni maun. 15 Iwe, a üreniir, “Pwota oua amanaua ekana fefin meinisin? 16 Ir chokewe mi chei än Palam aüraür ngeniir, pwal ir popun pwe ekewe aramasen Israel ra kul seni ewe Samol mi Lapalap ren ewe föför ra föri me lon Peor. Iei mine ewe mätter a tori än ewe Samol mi Lapalap mwichen aramas. ✡ Num 25.1-9 17 Iei popun, iei oupwe niela iteiten ät me lein ekewe semirit, pwal iteiten fefin mi tori mwän. 18 Nge oupwe amanaua ekewe nengin meinisin resamwo tori mwän fän itemi. 19 Ämi meinisin mi niela aramas, pwal ämi mi atapa somä, oupwe mwo nonom lükün ewe ia aramas ra nonom ie lon ükükün fisu rän. Oupwe püsin alimöchükemi me ekewe föpwül oua liapeniir lon aülüngatin me afisuen rän. 20 Oupwe pwal limeti iteiten üf, iteiten pisek seni silin man, iteiten mettoch mi för seni ülen kuuch pwal iteiten pisek seni irä.”

21 Iwe, ewe souasor Eleasar a üreni ekewe sounfiu mi liwinto seni maun, “Iei pwüngün ewe allük ewe Samol mi Lapalap a allük ngeni Moses: 22 Mettoch meinisin resap tongeni karala: kolt, silifer, piras, mächä, tin me pilom 23 oupwe limetiir lon ekkei pwe repwe limöch. Nge repwe pwal limelim ren ewe kolukun limelim. Iwe, mettoch meinisin mi tongeni karala oupwe limetiir ren koluk. 24 Oupwe sopuni üfemi lon afisuen rän pwe oupwe limöch. Mürin oupwe tolong lon ewe ia aramas ra nonom ie.”

25 Iwe, ewe Samol mi Lapalap a üreni Moses, 26 “Ämi me ewe souasor Eleasar pwal mwänirelan ekewe familien ewe mwichen aramas oupwe aleani ekewe aramas me man meinisin ra liapeni. 27 Mürin kopwe ineti liaper kewe lon ruu kinikin lefilen ekewe sounfiu mi feila maun me ekewe aramas meinisin. 28 Iwe, seni inetin ekewe sounfiu mi feila maun kopwe aimwüela fän iten ewe Samol mi Lapalap eman seni iteiten limepükü aramas ika kow ika aas ika sip ika kuuch. 29 Kopwe angeir o ngeni ewe souasor Eleasar pwe eu asor ngeni ewe Samol mi Lapalap. 30 Nge seni inetin ekewe aramasen Israel, kopwe aimwüela eman seni iteiten lime aramas ika kow ika aas ika sip ika kuuch ika sokopaten man o ngeni ekewe mwän seni ewe ainangen Lefi mi wisen angang ngeni än ewe Samol mi Lapalap we imwenfel seni mangaku.” 31 Iwe, Moses me ewe souasor Eleasar ra föri usun mine ewe Samol mi Lapalap a allük ngeni Moses.

32 Iwe, iei ükükün unusen liapen ekewe sounfiu: Wonopükü fik me limungeröü sip, 33 fik me ruungeröü kow, 34 wone me eungeröü aas 35 me ilik me ruungeröü föpwül resamwo tori mwän. 36 Iwe, esopun liaper inetin ekewe sounfiu mi feila maun ükükün ülüpükü ilik me fisungeröü limepükü sip. 37 Nge inetin ewe Samol mi Lapalap seni ei ükükün: wonopükü fik me limman sip. 38 Iwe, inetir kow ükükün ilik me wonungeröü. Nge seni ei ükükün, fik me ruoman inetin ewe Samol mi Lapalap. 39 Iwe, inetir aas ükükün ilik ngeröü limepükü. Nge seni ei ükükün, wone me eman inetin ewe Samol mi Lapalap. 40 Iwe, inetir aramas ükükün engol me wonungeröü. Nge seni ei ükükün, ilik me ruoman inetin ewe Samol mi Lapalap. 41 Iwe, Moses a ngeni ewe souasor Eleasar inetin ewe Samol mi Lapalap pwe eu asor fän itan, usun ewe Samol mi Lapalap a allük ngeni.

42 Iwe, esopun liapen ekewe sounfiu Moses a aimwüela pwe inetin ekewe aramasen Israel. 43 Iwe, inetin ekewe aramas ükükün ülüpükü ilik me fisungeröü limepükü sip, 44 ilik me wonungeröü kow, 45 ilik ngeröü limepükü aas 46 me engol me wonungeröü aramas. 47 Iwe, seni esopun liaper inetin ekewe aramasen Israel Moses a angei eman seni iteiten lime aramas ika man o ngeni ekewe mwän seni ewe ainangen Lefi mi wisen tümwünü än ewe Samol mi Lapalap we imwenfel seni mangaku, usun ewe Samol mi Lapalap a allük ngeni Moses.

48 Mürin, ekewe meilap mi nemeni ekewe mwichen sounfiu ra feito ren Moses 49 o üreni, “Äm noum chon angang aia aleani ekewe sonfiu mi nom fän nemenemem, nge esap wor eman a mäla me leim. 50 Iei aia uwato ekewe mettoch seni kolt pwe eu asor fän iten ewe Samol mi Lapalap seni mine eman me eman a angei: lälä me sokun fouten won pau, ring won pau me ierring me sokopaten fout, pwe aipwe eäni asor liwinin manauem ngeni ewe Samol mi Lapalap.” 51 Iwe, Moses me ewe souasor Eleasar ra angei seniir ekewe sokopaten fout seni kolt. 52 Nge ekewe kolt meinisin ekewe meilap mi nemeni ekewe mwichen sounfiu ra eäni asor ngeni ewe Samol mi Lapalap ina epwe ükükün föpükü rüe paun. 53 Nge ekewe sounfiu ra chök en me angei liapan fän püsin itan. 54 Iwe, Moses me ewe souasor Eleasar ra angei ewe kolt seni ekewe meilapen sounfiu o iseis lon ewe imwenfel seni mangaku fän mesen ewe Samol mi Lapalap pwe eu pisekin achem fän iten ekewe aramasen Israel.