23
1 Iwe, Palam a üreni Palak, “Kopwe senätä fän itei fisu rongen asor ikei o uwato füman ätemwänin kow me füman ätemwänin sip.” 2 Iwe, Palak a föri usun mine Palam a üreni. Iwe, Palak me Palam ra eäni asor eman ätemwänin kow me eman ätemwänin sip won eu me eu kewe rongen asor. 3 Mürin, Palam a üreni Palak, “Kopwe ütä lükün om kei asoren kek, nge ngang üpwe feila ekis. Eli ewe Samol mi Lapalap epwe feito o churiei. Iwe, meinisin mine epwe pwäri ngeniei üpwe ürenuk.” Iwe, a feitä won eu chukuchukutä mi amasawa.
Palam a afeiöchü Israel
23.4–24.9
4 Iwe, Kot a churi Palam, nge Palam a üreni, “Üa amolätä fisu rongen asor o eäni asor eman ätemwänin kow me eman ätemwänin sip won eu me eu.” 5 Iwe, ewe Samol mi Lapalap a aiti ngeni Palam mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.” 6 Iei mine Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap meinisin ra nom ren. 7 Mürin, Palam a popuetä an kapasen osuni o üra,
“Palak ewe kingen Moap a emwenieito seni Aram,
seni ewe chuk mi nom ötiu.
A üreniei, ‘Kopwe feito o anümamaua ngeniei ekewe mwirimwirin Jakop, kopwe feito o eniwa ekewe chon Israel.’
8 Ifa usun ai üpwe tongeni anümamaua chokewe Kot esap anümamaueer?
Ifa usun ai üpwe tongeni eniwa chokewe ewe Samol mi Lapalap esap eniweer?
9 Üa küna ekewe chon Israel seni me won ungen ekewe chukuachau mi tekia,
üa nenengeniir seni won ekewe chukutekison.
Üa küna eu mwichen aramas mi imwüla lon lenier,
resap mochen ar repwe wewe ngeni ekewe mwü.
10 Iö a tongeni aleani ekewe mwirimwirin Jakop mi usun pien fanü, nge iö a tongeni aleani eu lerüanün ewe mwichen chon Israel?
Amwo üpwe määni mään ekewe chon pwüng.
Amwo sopolan manauei epwe usun sopolan manauer.”
11 Mürin, Palak a üreni Palam, “Met ei ka föri ngeniei? Üa körukoto pwe kopwe anümamaua chokewe üa oputeer. Nge iei ka chök afeiöchüür.” 12 Iwe, Palam a üra, “Ifa usun, üpwe tongeni apasa och me lükün mine ewe Samol mi Lapalap a aiti ngeniei?”
13 Mürin, Palak a üreni Palam, “Kopwe etieila lon pwal eu leni ia ka tongeni küna ekewe aramas me ie. Pun kopwe chök küna eu kinikin seni ar we mwich, nge sap unuser. Iwe, kopwe anümamaueer ngeniei seni ikenan.” 14 Iwe, a emwenala Palam ngeni ewe lemälen Sofim won ungen ewe chuk Piska. Ikenan a pwal senätä fisu rongen asor o eäni asor eman ätemwänin kow me eman ätemwänin sip won eu me eu kewe rongen asor. 15 Nge Palam a üreni Palak, “Kopwe ütä ikei lükün om kei asoren kek, nge ngang üpwe churi ewe Samol mi Lapalap ikenan.” 16 Iwe, ewe Samol mi Lapalap a churi Palam o aiti ngeni mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.” 17 Iwe, Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap ra nom ren. Iwe, Palak a aisini, “Met ewe Samol mi Lapalap a apasa?” 18 Mürin, Palam a popuetä an kapasen osuni o üra,
“Kopwe ütä, Palak, o rongorong.
Kopwe aüselingaei, en nöün Sipor we mwän.
19 Kot esap eman aramas pwe epwe chofana,
esap pwal i nöün aramas pwe epwe ekieksefäl.
Ifa usun, epwe apasa och, nge esap föri?
Ika epwe pwonei och, nge esap apwönüetä?
20 Ngang üa angei eu allük pwe üpwe afeiöchü chon Israel. Kot a afeiöchüür, nge üsap tongeni sorei.
21 Üsap küna pwe epwe wor feiengau ika osukosuk
ngeni ekewe chon Israel lon ekewe fansoun repwe feito.
Ewe Samol mi Lapalap ar Kot a nom rer,
ra pwärätä fän mweireir pwe i ar king.
22 Kot a emwenirewu seni Isip,
ar pöchökül a usun chök pöchökülen eman ätemwänin kow mi mwacho.
23 Pun esap wor och pöüt ika och rong
epwe küw ekewe chon Israel o afeiengaueer.
Lon ei fansoun repwe apasa usun ekewe aramasen Israel,
‘Nengeni mine Kot a föri fän iter.’
24 Ekewe aramasen Israel ra pwätä usun eman liefefinin laion,
ra öüröürela usun eman ätemwänin laion
esap konola tori epwe asomwala liapan
o ünümi chan chokewe a nirela.”
25 Mürin, Palak a üreni Palam, “Are kosap mochen anümamaueer, kosap pwal afeiöchüür.” 26 Nge Palam a üreni Palak, “Ifa usun, üsap ürenuk pwe meinisin mine ewe Samol mi Lapalap a apasa üpwe fokun föri?”
27 Mürin, Palak a üreni Palam, “Kopwe etto pwe üpwe emwenuk ngeni pwal eu leni. Eli Kot epwe efich om kopwe anümamaueer ngeniei seni ikenan.” 28 Iei mine Palak a emwenätä Palam won ungen ewe chuk Peor ia ra tongeni nenetiuei ewe fanüapö me ie. 29 Iwe, Palam a üreni Palak, “Kopwe senätä ikei fisu rongen asor fän itei o uwato rei füman ätemwänin kow me füman ätemwänin sip.” 30 Iwe, Palak a föri usun mine Palam a üreni. A eäni asor eman ätemwänin kow me eman ätemwänin sip won eu me eu kewe rongen asor.