1 Ewe kolt a toputopula, ewe kolt mi mürina esap chüen molupolup.

Föün ewe imwenfel ra toropasala lon ekewe al.

2 Ekewe alüalün Jerusalem mi aüchea ra wewe ngeni kolt mi mürina me lom,

nge iei ra wewe ngeni sepi seni pwül, förien eman chon för sepi seni pwül.

3 Eman liafefinin wolif a fen oupwu apanan,

nge nei aramas ra chök nöünöün pwäpwä ngeni nöür.

4 Chönawen ekewe mönükol ra pachetä fän fongochur pokiten ar kaka,

ekewe semirit ra tütüngor ener mongö, nge esap wor eman a ngeniir.

5 Chokewe mi örüni mongö mi anö me lom ra mään echik won ekewe al,

nge chokewe mi chök üföüf üf mi ling ra kon lon ioien falang.

6 Än Kot apwüngü nei aramas a kon watte seni an apwüngü Sotom,

ewe telinimw mi tala lon eu chök otun ren pöün Kot. ✡ Ken 19.24

7 Ekewe samolun Jerusalem ra men limöch seni sno o pwechepwech seni milik.

Inisir a pöchökül, ra womisimis o aümanau.

8 Nge iei won meser a chol seni moochen ekkei, esor eman a sileniir won ekewe al.

Ünücher a pwach o pacheri chür, a sissinüng usun amwüch mi pwas.

9 Chokewe mi mäla lon maun ra feiöch seni chokewe mi mäla ren echik,

ir chokewe mi kichüchüla o mäla, pun esap wor ener mongö seni ekewe mälämäl.

10 Ekewe fefin mi fokun tongei nöür ra püsin kukuw nöür semirit.

A fis pwe ina ener mongö lupwen fansoun feiengauen nei aramas. ✡ Tut 28.57; Is 5.10

11 Ewe Samol mi Lapalap a aunusawu an lingeringer, a ninätiu an song mi chou.

A aküüw eu ekkei lon Sion mi kenala longolongun.

12 Kingen ekewe mwü me ekewe chon fanüfan resap lükü,

pwe ekewe chon pälüeni ika chon oputa Juta repwe tongeni tolong lon ekewe asamalapen Jerusalem.

13 Ei a fis pokiten än nöün Jerusalem kewe soufos tipis,

pwal pokiten än nöün kewe souasor föföringau.

Ir chokewe mi niela ekewe chon pwüng.

14 Ra fetal won ekewe al usun chon mesechun,

a fokun limengau üfer ren cha, iei popun esap wor eman a mochen atapeer.

15 Aramas ra kökkö ngeniir, “Oupwe süla, ämi mi limengau! Oupwe süla, oupwe süla! Ousap atapakem.”

Iei mine ra wiliti choisä me chon süsüfeil, nge chon ekewe mwü ra apasa lefiler, “Resap chüen tongeni nom rech.”

16 Ewe Samol mi Lapalap a püsin atoropaseer, esap chüen ekieki usur.

Aramas resap chüen meniniti ekewe souasor, resap pwal aücheani ekewe souakom.

17 Sa weires le nenefetalei ika eman epwe alisikich, nge esap wor lomotan.

Sa akawitiwiti ach alilis seni eu mwü esap tongeni amanauakich.

18 Ekewe chon oputakich ra operikich pwe sisap tongeni fetal won ach kewe al.

Sopolan manauach a arapoto. Ränin manauach ra lea, pun fansoun ach mäla a torikich.

19 Ekewe chon tapwerikich ra müttir seni ekewe ikel mi äs fän läng.

Ra tapwerikich won ekewe chukuchukutä o operikich lon ewe fanüapö.

20 Popun manauach ach we king mi kepit me ren ewe Samol mi Lapalap, a oolong lon ar kewe likatup.

I ätewe sa apasa usun pwe sipwe manau fän an tümwün me lein chon ekewe mwü.

21 Oupwe enen le meseik o pwapwa, ämi chon Etom mi nom lon ewe fanü Us,

pun epwe pwal torikemi ewe kapen feiengau. Oupwe puch ren o püsin aselelakemi.

22 Ämi chon Sion, liwinin ämi tipis a wesila.

Ewe Samol mi Lapalap esap chüen mochen oupwe nonomotam lon ämi oola.

Nge ämi chon Etom, ewe Samol mi Lapalap epwe apwüngükemi pokiten ämi föföringau o särifala ämi tipis.