1 Iwe, a la chomong fansoun mürin än ewe Samol mi Lapalap ngeni chon Israel kinamwe seni chon oputeer mi nom ünükür. Lon ei fansoun Josua a fokun chinlap. 2 Iwe, Josua a körifengeni chon Israel meinisin, nöür kewe souemwen me souakom, nöür kewe soukapwüng me nöür kewe meilap o üreniir, “Iei ngang üa fokun chinlap. 3 Ämi oua küna meinisin mine ewe Samol mi Lapalap ämi we Kot a föri ngeni ekei mwü meinisin fän itemi. Pun ewe Samol mi Lapalap ämi we Kot a maun fän itemi. 4 Nengeni, üa fen aineti ngenikemi fanüen chon ekewe mwü resamwo oola usun chök pwal fanüen chon ekewe mwü üa arosala chor, seni ewe chanpupu Jortan me ötiu tori ewe mataulap mi nom lotou, pwe fanüen ämi kewe ainang. 5 Iwe, ewe Samol mi Lapalap ämi we Kot epwe püsin tinirewu me mwemi, epwe pwal asürela, lupwen oupwe tolong lon fanüer, nge ämi oupwe fanüeni fanüer, usun ewe Samol mi Lapalap a fen pwon ngenikemi. 6 Iei mine oupwe fokun aleasochis o apwönüetä meinisin mine a mak lon än Moses we puken allük. Ousap fokun aleasolap ngeni. 7 Ousap chiechifengen me chon ekei mwü mi chüen nom leimi, ousap pwal föüni iten ar kewe kot ika eäniir akapel, ousap angang ngeniir ika fel ngeniir. 8 Nge oupwe fitipachei ewe Samol mi Lapalap ämi we Kot, usun oua fen föri tori ikenai. 9 Pun ewe Samol mi Lapalap a fen asüela me mwemi ekewe mwü watte o pöchökül. Nge tori ikenai esap wor eman aramas a tongeni ü ngenikemi. 10 Iwe, eman mwän me leimi epwe tongeni asüela engeröü mwän, pun ewe Samol mi Lapalap ämi we Kot a maun fän itemi usun a fen pwon ngenikemi. ✡ Tut 32.30; Tut 3.22 11 Iei mine oupwe fokun afälikemi pwe oupwe echeni ewe Samol mi Lapalap ämi we Kot. 12 Nge are oupwe tok seni o pach ngeni chon ekewe mwü mi chüen nom leimi, are oupwe pwal pwüpwülüfengen me ir, 13 oupwe fokun silei pwe ewe Samol mi Lapalap ämi we Kot esap chüen asüela chon ekei mwü me mwemi. Nge ir repwe afeiengau ngenikemi usun chök eu lenien likatup ika eu sär, pwal usun chök metekin efoch wokun wichiwich eman a wichi ngeni sökürümi ika efoch fölün irafölüföl lon mesemi, tori oupwe rosola seni ewe fanü mi mürina, ewe Samol mi Lapalap ämi we Kot a ngenikemi.

14 Iwe, iei a tori fansoun ai üpwe le mäla. Ämi meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi mürina meinisin a pwon ngenikemi. Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä. 15 Nge usun ewe Samol mi Lapalap ämi we Kot a apwönüetä ekewe pwon meinisin a eäni ngenikemi, iei usun epwe pwal atoto womi ekewe feiengau meinisin a kapas usun, tori epwe arosakemiila seni won ei fanü mi mürina a ngenikemi. 16 Are oua atai ewe pwon ewe Samol mi Lapalap ämi we Kot a eäni ngenikemi, are oupwe angang ngeni pwal ekoch kot o fel ngeniir, ewe Samol mi Lapalap epwe song ngenikemi. Oupwe müttir rosola seni ewe fanü mi mürina a ngenikemi.”