1 Mürin ekewe meilapen ewe mwichen sounfiu meinisin me Johanan nöün Karea we, pwal Asaria nöün Hosaia we mwän me ekewe aramas meinisin seni ekewe mi kis tori ekewe mi lap ra feito 2 ren ewe soufos Jeremaia o üreni, “Kose mochen kopwe etiwa äm tüngor o iotek ngeni ewe Samol mi Lapalap ach we Kot fän item meinisin äm kewe mi chüen manau. Pun me lom aia chomong, nge ikenai äm kewe mi chüen manau aia chokükün usun ka püsin küna. 3 Kopwe iotek pwe ewe Samol mi Lapalap ach we Kot epwe pwäri ngenikem ewe al aipwe feila won pwal mine aipwe föri.” 4 Iwe, ewe soufos Jeremaia a üreniir, “Üa rongorong mine oua apasa. Üpwe fokun iotek ngeni ewe Samol mi Lapalap ach we Kot fän äsengesin mine oua tüngor, nge meinisin mine ewe Samol mi Lapalap epwe eäni pälüen üpwe ürenikemi. Üsap tükümala och senikemi.” 5 Mürin, ra üreni Jeremaia, “Amwo ewe Samol mi Lapalap epwe eman chon pwärätä mi let o allükülük. Amwo epwe ü ngenikem, are aisap föri pwüngün ekewe kapas meinisin mine ewe Samol mi Lapalap ach we Kot epwe asile ngenikem me reöm. 6 Inamwo ika epwe öchitikem ika esap, äm aipwe fokun aleasochisi ewe Samol mi Lapalap ach we Kot, i ewe aia tinukela ren. Pun äm aipwe feiöch are aia aleasochisi ewe Samol mi Lapalap ach we Kot.”

7 Iwe, mürin engol rän ewe Samol mi Lapalap a kapas ngeni Jeremaia. 8 Mürin, Jeremaia a kökkörato Johanan nöün Karea we me ekewe meilapen ewe mwichen sounfiu mi nom ren, pwal ekewe aramas meinisin seni ekewe mi kis tori ekewe mi lap 9 o üreniir, “Iei alon ewe Samol mi Lapalap ewe Koten Israel, ewe oua tinieila ren pwe üpwe uwei ämi we tüngor ngeni, 10 ‘Are oupwe nomotiu lon ei fanü, mürin ngang üpwe aükemiitä, nge üsap ataakemiitiu. Üpwe fotukikemi, nge üsap üttikemiitä. Pun üa lolilenäsini ai üpwe afeiengauakemi. 11 Oupwe ükütiu le niuokusiti ewe kingen Papilon. Ousap niuokusiti, pun ngang üa etikemi pwe üpwe amanauakemi o angasakemi seni fän nemenian. 12 Üpwe ümöümöch ngenikemi, pwe i epwe pwal ümöümöch ngenikemi o mwüt ngenikemi pwe oupwe nonom lon püsin fanüemi. Ngang ewe Samol mi Lapalap üa kapas.’ 13 Nge are oupwe apasa, ‘Aisap nomotiu lon ei fanü,’ are oua lükümach ngeni ewe Samol mi Lapalap ämi we Kot 14 o apasa, ‘Ap, äm aipwe feila lon ewe fanü Isip o nonom ikenan ia esap torikem maun me ie, ia aisap rong tikin rappwan maun, aisap pwal echik ie,’ 15 mürin oupwe rongorong mine ewe Samol mi Lapalap a apasa, ämi chokewe mi chüen manau me lon Juta. Iei alon ewe Samol mi Unusen Manaman ewe Koten Israel, ‘Are oua fokun ekiekin feila Isip pwe oupwe nonom ikenan, 16 mürin ewe maun oua niuokusiti epwe kükemi me lon ewe fanü Isip, nge ewe lengita oua niuokusiti epwe fokun tapwerikemiila Isip. Iwe, oupwe mäla ikenan. 17 Ekewe aramas meinisin mi fokun ekiekin feila Isip pwe repwe nonom ikenan repwe fokun mäla lon maun, ren lengita me mätter. Esap wor eman epwe manau seni ewe feiengau üpwe awarato wor.’

18 Pun iei alon ewe Samol mi Unusen Manaman, ewe Koten Israel, ‘Usun üa song me lingeringer ngeni ekewe chon Jerusalem, iei usun üpwe song me lingeringer ngenikemi, lupwen oupwe feila Isip. Aramas repwe leawenikemi lon ar ottek, oupwe wiliti och minen eniweniw o küna turunufas me itengau, nge ousap chüen künasefäli ei leni.’ 19 Iwe, ewe Samol mi Lapalap a ürenikemi, ämi chokewe mi chüen manau me lon Juta, pwe ousap feila Isip. Oupwe fokun silei pwe ngang üa fönöökemi ikenai, 20 pun oua föri och mi mwäl a afeiengau ngeni manauemi. Ämi oua tinieila ngeni ewe Samol mi Lapalap ach we Kot o üra, ‘Kopwe iotek fän item ngeni ewe Samol mi Lapalap ach we Kot, nge meinisin mine i epwe apasa ngonuk, äm aipwe föri.’ 21 Iwe, ikenai üa pwäri ngenikemi alon ewe Samol mi Lapalap ach we Kot, nge ämi oua aleasolapa ekewe kapas meinisin a tini ngeniei pwe üpwe ürenikemi. 22 Iei mine oupwe fokun silei pwe oupwe mäla lon maun, ren lengita me mätter me lon ewe leni ia oua mochen feila o nonom ie.”