10
Ewe kot mi mwäl me ewe Kot mi let
10.1-16
1 Oupwe rongorong mine ewe Samol mi Lapalap a ürenikemi ämi chon Israel.
2 Iei alon ewe Samol mi Lapalap,
“Ousap föri föförün chon ekewe mwü,
ousap pwal rükö ren ekewe asisilen fän läng,
inamwo are chon ekewe mwü ra rükö rer.
3 Än chon ekewe mwü lamalam ra mwäl.
Ra pökü efoch irä seni lein wöllap,
nge eman soufalafal a angang ngeni ren efoch falafal.
4 Iwe, aramas ra afouta ngeni silifer me kolt,
ra pwal chüfölü ngeni chüföl,
pwe esap tongeni turula.
5 Ar kewe uluulun anümwäl ra usun chök ekewe anewenewen machang lon eu tanipin kiuri.
Resap tongeni kapas.
Aramas ra wisen uweer,
pun resap tongeni fetal.
Ousap niuokusitiir,
pun resap tongeni afeiengauakemi,
resap pwal tongeni afeiöchükemi.”
6 Esap wor eman a wewe ngonuk, en Samol mi Lapalap,
ka tekia, nge itom a lapalap o manaman.
7 Ifa usun, iö esap meninituk, en ewe kingen ekewe mwü?
A pwüng ngonuk pwe aramas repwe meninituk.
Esap wor eman me lein ekewe mi tipachem meinisin
me lon ekewe mwü ika me lein ar kewe king
a wewe ngonuk. ✡ Pwär 15.4
8 Ir meinisin ra tiparoch o umwes.
Pun ifa usun, repwe tongeni angei öüröürer seni uluulun anümwäl mi för seni mwüch?
9 Ra cheni ngeni ar kewe uluulun anümwäl ewe silifer mi nechenech a feito seni Tarsis,
ika ewe kolt seni Ufas.
Mine ekewe soufalafal me ekewe chon angang ngeni kolt ra föri,
ra pwal öüföüfa ngeni üf mi forket me parochol.
Meinisin förien aramas mi sipeöch.
10 Nge en Samol mi Lapalap ewe Kot mi let.
En ewe Kot mi manau
me ewe king mi nom tori feilfeilachök.
Lupwen ka song, fanüfan a chechech,
nge chon ekewe mwü resap tongeni manau fän om song.
11 Iei usun mine ämi aramas oupwe üreniir, “Ekewe kot resap föri
läng me fanüfan repwe tala. Resap chüen nom won fanüfan.”
12 Nge Kot a föri fanüfan ren an manaman,
a anüküchara ren an tipachem.
A ameresala ekewe läng ren an weweöch.
13 Lupwen a kapas, ekewe kolukun fän läng ra ngüngü.
A pwal föri ekewe kuchu pwe repwe ässitä seni ekewe lesopun fanüfan.
A föri inefi fiti üt
o awarato asepwäl seni an lenien iseis.
14 Lupwen aramas ra küna ei, ra mefi pwe ra umwes, esap pwal wor ar mirit.
Ekewe chon föri uluulun anümwäl seni kolt ra säw,
pun ar kewe uluulun anümwäl ra minen atuputup, esap pwal wor ngasangas lor.
15 Ra lomotongau o uretakir.
Repwe tala, lupwen Kot epwe apwüngüür.
16 Nge än Jakop we Kot esap usun ekei anümwäl,
pun i ewe chon föri mettoch meinisin.
A pwal filätä chon Israel pwe repwe wesewesen nöün aramas,
itan ewe Samol mi Unusen Manaman.
Juta a tala
10.17-25
17 Ämi chon Jerusalem meinisin, oupwe ionifengeni pisekimi pwe oupwe towu seni ewe fanü, pun sounfiu ra pwelifeili ämi kewe telinimw fän pisekin maun. 18 Pun iei alon ewe Samol mi Lapalap, “Üpwe asüela chon ei fanü lon ei fansoun, üpwe pwal atoto riaföü wor pwe repwe oola.”
19 Nge ekewe aramasen Jerusalem repwe siö,
“Feiengauach, pun sa fokun kinas.
Nge kinasach esap mola.
Sa ekieki pwe iei och mettoch sipwe tongeni öttures fan.
20 Imwach kewe imw mangaku ra tala,
nge selin kewe ra mwu.
Nöüch kewe semirit ra feila senikich.
Esap chüen wor eman a nom rech mi tongeni aüsefälietä imwach kewe imw mangaku
o emeitiwätä chechen lor.”
21 Ekewe souemwen ra umwes.
Resap angei öüröürer me ren ewe Samol mi Lapalap.
Iei mine esap fisiöch ar angang,
nge nöür aramas ra toropasfeil.
22 Oupwe aüseling pwe eu pworaus a war.
A wor eu akürangen maun mi watte a feito seni ewe mwü mi nom efeng.
An kewe sounfiu repwe ataela ekewe telinimwen Juta,
pwe repwe wiliti eu leni ia ekewe kolak mi mwacho repwe nom ie.
23 Ai Samol mi Lapalap, üa silei pwe aramas resap püsin nemeni manauer,
resap pwal tongeni akota mine repwe föri.
24 Ai Samol mi Lapalap, kopwe apwüngüei fän aüküköch,
nge kosap apwüngüei fän om song,
pwe ete much manauei.
25 Nge kopwe atoto om song won chon ekewe mwü resap sileek,
pwal won ekewe aramas resap köri itom.
Pun ra niela noum aramas,
ra wesewesen nirela
o ataela fanüer.