1 Iwe, ewe Samol mi Lapalap a apasa, “Feiengauen nei kana ra chök pälüeniei. Ra föri mochenin letiper, nge resap föri letipei. Ra pwal pwonfengen me chon ekis, nge resap mwir me woi. Ren ei ra chök alapala ar tipis. 2 Iwe, ra feila Isip, pwe repwe nom fän tümwünüen Farao o op fän nürün Isip, nge resap angei öüröürer me rei. 3 Iei mine repwe säw ren än Farao tümwün, repwe pwal küna itengau ren ar opolong fän nürün Isip. 4 Inamwo ika nöün chon Juta nöüwis ra nom Soan, nge nöür chon künö ra tori Hanes, 5 ir meinisin repwe säw ren Isip, pun i eu mwü mi lomotongau ngeniir, esap tongeni alisiir, pwe a chök äsäweer o aitengaueer.”

6 Iei kapasen osuni usun ekewe mönün ewe fanü Nekep: Ekewe chon künö ra pwerela lon eu fanüen osupwang me riaföü, eu lenien laion me serepenit mi afeiengau, pwal lenien ewe trakon mi äs. Ra uwei ar pisek mi aüchea won nöür kewe aas me kamel, pwe ar lifang ngeni ewe mwü mi lomotongau ngeniir. 7 Pun än chon Isip alilis a aücheangau o lomotongau. Iei mine üa aita ngeni Isip “Tunomong me chipwang.”

8 Iwe, Kot a üreniei, “Iei kopwe makeetiu lon eu puk ei pworaus usur, pwe epwe eu puken pwärätä lon kan fansoun repwe feito. 9 Pun ir eu täppin aramas mi ü ngeniei, nei kana mi chofana, resap mochen aüselinga kapasen amirit me rei ngang ewe Samol mi Lapalap. 10 Ra üreni ekewe souürür, ‘Ousap asile ngenikem künaemi,’ nge ngeni ekewe soufos ra apasa, ‘Ousap osuni ngenikem mine a pwüng, nge oupwe kapas motoutou ngenikem. Iwe, oupwe chök osuni mine a mwakel. 11 Iwe, oupwe märisi ewe al, ousap epetikem. Äm aisap mochen rongorong usun Ewe mi Pin lon Israel.’ ” 12 Iei mine Ewe mi Pin lon Israel a apasa, “Oua aücheangaua ai kapas, nge oua anomu ämi apilükülük won föförün kirikiringau me atuputup. 13 Iei mine ei tipis epwe usun chök chüngün eu tit mi tekia ngenikemi, a kopäi o arapakan ngeni an epwe turula. Nge an tur epwe usun chök müttirin morupun mas. 14 Iwe, epwe möküla usun chök eu sepi seni pwül, eman a amökkü fän pöchökül, pwe esap wor emök mökkün eman a tongeni aea le tukei molien ekkei seni eu lenien um, ika aea le üfi koluk seni lon eu chönüttu.”

15 Iei alon Kot ewe Samol mi Lapalap, Ewe mi Pin lon Israel, “Oupwe küna manau ren ämi liwinsefäl ngeniei me ämi asösö rei, oupwe pwal küna pöchökül ren ämi mosonotam me ämi lükülük. Nge ämi ousap mochen. 16 Oua apasa, ‘Apwi, äm aia mochen sü won oris.’ Iei mine oupwe süla. Oua pwal apasa, ‘Äm aipwe sü won oris mi fokun müttir.’ Iei mine chon tapwerikemi repwe pwal fokun müttir. 17 Iwe, engeröü leimi repwe sü ren eman chök mi eniwokusukemi, nge ämi meinisin oupwe sü ren liman chon eniwokusukemi tori oupwe usun chök efoch achen filäik won ungen chuk, pwal usun chök efoch filäik won chukuchukutä.”

18 Nge ewe Samol mi Lapalap a witiwiti chök an epwe kirikiröch ngenikemi, a pwal molotä pwe epwe ümöümöch ngenikemi. Pun ewe Samol mi Lapalap eman Kot mi unusen pwüng. Feiöchün chokewe meinisin ra anomu ar apilükülük won.

19 Ewer, ämi aramasen Sion mi imweimw lon Jerusalem, ousap chüen kechü. Kot epwe fokun ümöümöch ngenikemi, lupwen a rong ämi siö. Iwe, lupwen a rongorong, epwe pälüenikemi. 20 Inamwo are ewe Samol a fen ngenikemi ewe mongön riaföü me ewe kolukun letipeta, nge i ämi Soukait esap chüen op senikemi, pwe mesemi repwe küna. 21 Iwe, lupwen oua kul ngeni peliifich ika peliimöng, selingemi repwe rongorong me lükün sökürümi, “Iei ewe al oupwe aleni.” 22 Lon ena fansoun oupwe aücheangaua ämi uluulun anümwäl mi fal o pwölüpwöl ren silifer, pwal ämi uluulun anümwäl mi för seni mächä o pwölüpwöl ren kolt. Iwe, oupwe pöütirela usun chök mettoch mi limengau o apasa, “Aisap chüen mochen künakemi.”

23 Iwe, Kot epwe ngenikemi üt fän iten ekewe pwükil oua amorafeili won pwül, pwe repwe mär, epwe pwal ngenikemi föün wiich mi somola lon fansoun kinikin. Lon ena fansoun nöümi pwiin man repwe mongö lon lenien fetil mi watte. 24 Iwe, nöümi kewe kow me aas mi tuw ewe pwül repwe mongö fetil me föün irä mi neken aramas ra limetifichi ren söföl me fook mi watte. 25 Lon ena rän, lupwen ekewe imwen maun mi pöchökül repwe tala, nge ekewe chon oputakemi repwe ninnila, chanpupu repwe putiu seni ekewe chukutekia me chukutekison. 26 Iwe, tinen maram epwe wattela usun chök tinen akkar, nge tinen akkar epwe wattela fän fisu usun chök saramen fisu rän, lupwen ewe Samol mi Lapalap epwe filiti kinasen nöün aramas o amoola metekir a püsin ngeniir.

27 Nengeni, ewe Samol mi Lapalap a feito me toau fän an song mi fokun watte, pwal fän eu kuchun ötüöt mi ötümong. Iwe, awan a pwärätä an lingeringer, nge kapasen awan a usun chök ngetengeten ekkei. 28 Iwe, enienin ngasangasan a usun chök eu chanpupu a pupuwu lükün pwe a tori üen aramas. Iwe, Kot epwe achecha chon ekewe mwü ren feiengau, epwe pwal atokala ekewe mwichen aramas usun eman a atokala oris ren mächän lon awer.

29 Nge ämi nöün Kot aramas oupwe köl usun oua köl lon ewe pwin, lupwen a fis chulap mi pin, oupwe pwal pwapwa lon lelukemi usun oua pwapwa lon fansoun ämi sai ngeni chukun ewe Samol mi Lapalap, ewe Achauen Israel, fän tikitikin pisekin ettik. 30 Nge ewe Samol mi Lapalap epwe föri pwe aramas repwe rongorong mwelian mi osomong, epwe pwal aküna ngeniir pöün mi feitiu wor fän an song mi watte. Epwe wor ekkei mi ngetenget, pwal üttomong me mölümöl me ütten fau. 31 Iwe, ekewe chon Asiria repwe fokun niuokus ren mwelien ewe Samol mi Lapalap, lupwen a apwüngüür fän pöchökül. 32 Iteiten fansoun, lupwen ewe Samol mi Lapalap epwe apwüngü chon Asiria, nöün aramas repwe pwal ettiki pisekin ettik. Iwe, Kot epwe püsin maun ngeni chon Asiria. 33 Pun eu lenien ekkei a amol seni me lomlom. Ewer, a amol fän iten ewe kingen Asiria. Iwe, pwangen ewe lenien ekkei a alolol pwal chölap, a pwal ur ren chomong amüch me ekkei. Enienin ngasangasen ewe Samol mi Lapalap mi usun chök ütten primston epwe fisi.