8
Jesus ach we Souasor mi Lap
8.1-13
1 Iwe, iei aüchean mine sia kapas usun: Sia eäni eman Souasor mi Lap a mot lepelifichin ewe mi Unusen Tekia lon läng. ✡ Kölf 110.1 2 I a angang lon ewe wisen souasor mi lap lon ewe Leni mi Unusen Pin, iei wesewesen ewe imwenfel seni mangaku ewe Samol a aüetä, nge sap aramas.
3 Iteiten eman me eman souasor mi lap a kefilitä pwe epwe uwato sokopaten asor o eäni asoren man ngeni Kot. Iei mine ach we Souasor mi Lap epwe pwal fokun wor mine epwe eäni asor. 4 Ika i epwe nonom won fanüfan, esap fokun wiseni ewe wisen souasor, pun mi wor souasor ra eäni asor ekewe lifang fän pwüngün än ekewe chon Juta allük. 5 Ewe angang ra föri lon wiser wisen souasor a chök eu lios me ngünüen ekewe mettoch mi wor lon läng. Pwal iei chök usun mine a fis ren Moses. Me mwen an epwe aüetä ewe imwenfel seni mangaku, Kot a üreni, “Kopwe tümwünüfichi pwe kopwe föri meinisin lon lapalapen ewe lios ka küna me won ewe chuk.” ✡ Eks 25.40 6 Nge iei Jesus a angei ewe wisen souasor mi tekia seni wisen ekewe souasor mi lap, usun chök ewe pwon i a föri lefilen Kot me nöün kewe aramas a fokun aüchea seni ewe pwonen lom, pun a longolong won ekewe pwon mi fokun mürina.
7 Pun are esap wor och mwäl lon ewe aeuin pwon, esap wor lomoten an epwe pwal wor eu aruen pwon. 8 Nge lupwen Kot a küna mwälin nöün kewe aramas, a apasa,
“Ewe Samol a apasa: Epwe war ewe fansoun,
lupwen üpwe föri eu pwon mi fö ngeni chon Israel me chon Juta.
9 Ei pwon esap wewe ngeni ewe üa föri ngeni ar kewe lewo,
lon ewe rän üa amwöchü pöür o emweniirewu seni ewe fanü Isip.
Resap apwönüetä pwüngün ewe pwon üa föri ngeniir,
iei mine üa kul seniir.
10 Iwe, iei ewe pwon üpwe föri ngeni ekewe chon Israel
lon ewe fansoun epwe feito, iei alon ewe Samol:
Üpwe atolonga ai kewe allük lon ekiekiir
o makkeretiu lon letiper.
Iwe, ngang üpwe ar Kot,
nge ir repwe nei aramas kana.
11 Esap wor eman epwe aiti ngeni chon lenian,
ika apworausa ngeni chon fanüan, ‘Kopwe silei ewe Samol.’
Pun ir meinisin repwe sileei,
seni ekewe mi kis tori ekewe mi lap.
12 Pun üpwe amusala ar tipis,
nge üsap chüen chechemeni ar kewe föför mi ngau.” ✡ Jer 31.31-34 (LXX)
13 Lupwen Kot a kapas usun eu pwon mi fö, a föri pwe ewe aeuin pwon epwe mesila. Nge mine a mes esap chüen wor lomotan, epwe müttir morola.