1 Iwe, Apraham a pwüpwülüsefäl ngeni eman fefin itan Katura. 2 Neminewe a nöüni me won Apraham Simran, Joksan, Metan, Mitian, Ispak me Sua. 3 Joksan semen Sepa me Tetan, nge ekewe mwirimwirin Tetan ekewe chon Asur, chon Letus me chon Leum. 4 Iwe, a wor limman nöün Mitian mwän: Efah, Efer, Hanok, Apita me Eltaa. Ir meinisin mwirimwirin Katura. 5 Iwe, Apraham a ngeni Isaak wöün meinisin. 6 Nge lupwen a chüen manau, a ngeni nöün kewe mwän me won Hakar me Katura lifanger. Mürin a tinirela ngeni ewe fanüen ötiu pwe repwe toauela seni Isaak nöün we.

7 Iwe, ierin manauen Apraham ipükü fik me limu. 8 Mürin, Apraham a mäla lupwen a wesewesen chinlap. Iwe, a chufengen me an kewe lewo. 9 Nge nöün kewe Isaak me Ismael ra peiaseni lon ewe pwangen achau lon Makpela ötiuen Mamre, a nom lon ewe tanipin Efron nöün Sohar we, ewe re Hit. 10 Iei ewe tanipi Apraham a möni seni ekewe chon Hit. Ikenan ra peiaseni Apraham ünükün Sara pwülüan we. ✡ Ken 23.3-16 11 Iwe, mürin än Apraham mäla Kot a afeiöchü Isaak nöün we. Nge Isaak a nonom arun ewe chönüttu Peer Lahairoi.

12 Iei uruwon mwirimwirin Ismael nöün Apraham we, Hakar ewe fin Isip a nöüni me won, lupwen Sara a nöüni chon angang. 13 Ikkei iten nöün Ismael kewe mwän lon tettelin ar uputiu: Nepaiot ewe mwänichi, Ketar, Atpeel, Mipsam, 14 Misma, Tuma, Massa, 15 Hatat, Tema, Jetur, Hafis me Ketema. 16 Nöün Ismael kei, ir ekewe engol me ruoman samolun ar kewe ainang lon tettelin sopur me lenier kewe. 17 Iwe, ierin manauen Ismael ipükü ilik me fisu. Mürin a mäla o chufengen me an kewe lewo. 18 Iwe, ekewe mwirimwirin Ismael ra nonom lon ewe fanü seni Hawila tori Shur ötiuen Isip awenewenen Asiria. Nge ra nonom lon fanüer o tipepöchökül ngeni pwir kewe ekewe mwirimwirin Apraham.

19 Iei pworausen Isaak nöün Apraham we. 20 Iwe, Isaak a ierini faik, lupwen a pwülüeni Repeka nöün Petuel we ewe re Siria seni Mesopotamia. Nge Repeka fefinen Lapan we. 21 Iwe, Isaak a ikiotek fän äsengesin pwülüan we, pun a rit. Nge ewe Samol mi Lapalap a aüselinga an iotek, iei mine Repeka a pwopwo. 22 Nge a wor nöün lippwe, ra fiufengen lon lukan. Iwe, Repeka a apasa, “Met popun a fis ngeniei ei sokun lapalap?” Iwe, a feila pwe epwe aisini ewe Samol mi Lapalap usun. 23 Nge ewe Samol mi Lapalap a üreni,

24 Iwe, lupwen a tori fansoun an nöünöü, a wor nöün lippwe. 25 Iwe, ewe aeumanün mi uputiu akom a parapar ünüchan, nge unusen inisin a ülöül usun ülen man. Iei mine ra aita ngeni Esau * wewen Esau ülöül. 26 Mürin pwin we a uputiu, nge pöün a amwöchü apilipilin pechen Esau. Iei mine ra aita ngeni Jakop † wewen Jakop amwöchü epilipilin peche. Iwe, Isaak a ierini wone, lupwen Repeka a nöünöü.

27 Iwe, lupwen ekewe ät ra mämäritä, Esau a fokun foukus le likapich manmwacho, eman mi sani le nom lemäl. Nge Jakop eman mwän mi mosonoson, a chök nonom leimw. 28 Iwe, Isaak a echeni Esau, pun a sani le ochoch liapan man. Nge Repeka a echeni Jakop.

29 Iwe, lon eu rän, lupwen Jakop a amoota och mongö, Esau a liwinto seni lemäl, nge a fokun echik. 30 Iwe, Esau a üreni Jakop, “Kose mochen ngeniei och seni ewe mongö mi par pwe üpwe mongö, pun üa fokun echik.” Iei popun ra aita ngeni Etom ‡ wewen Etom parapar. 31 Nge Jakop a pälüeni, “Üpwe ngonuk ei mongö, are kopwe amömö ngeniei wisom wisen mwänichi.” 32 Mürin, Esau a üreni, “Nengeni, üpwe le mäla. Met echök lomoten ai wiseni ewe wisen mwänichi.” 33 Nge Jakop a pälüeni, “Kopwe akomwen akapel ngeniei pwe kopwe ngeniei wisom we.” Iei mine Esau a akapel ngeni o amömö ngeni wisan we wisen mwänichi. ✡ Ipr 12.16 34 Mürin, Jakop a ngeni Esau pilawa me ewe mongö mi par. Iwe, Esau a mongö o ün, a pwal ütä o feila. Iei usun Esau a aücheangaua wisan we wisen mwänichi.