12
Kot a köri Apram
12.1-9
1 Lon ewe fansoun ewe Samol mi Lapalap a üreni Apram, “Kopwe towu seni fanüom, seni aramasom pwal seni imwen semom, pwe kopwe feila lon ewe fanü ngang üpwe aiti ngonuk. ✡ Föf 7.2-3; Ipr 11.8 2 Iwe, üpwe achomonga mwirimwirum kana pwe ir repwe wiliti eu mwü mi watte, üpwe pwal afeiöchuk o alapala itom pwe kopwe eman wän feiöch.
3 Iwe, üpwe afeiöchü ekewe chon afeiöchuk,
nge afeiengaua ekewe chon afeiengauok.
Iwe, chon ekewe mwü meinisin won fanüfan repwe küna feiöch reöm.” ✡ Kal 3.8
4 Iwe, lupwen Apram a ierini fik me limu, a sai seni Haran, usun ewe Samol mi Lapalap a üreni, nge Lot a eti. 5 Iwe, Apram a angei Sarai pwülüan we me Lot nöün pwin, pwal pisekir meinisin ra achufengeni me nöür kewe chon angang ra nöüniir amanau me lon Haran. Iwe, ra towu pwe repwe feila lon ewe fanü Kanaan. Iwe, lupwen ra tori, 6 Apram a saifeil lon ewe fanü tori ewe leni itan Sikem, ia a wor ie ewe irä ook mi pin än More. Lon ena fansoun ekewe chon Kanaan ra nom lon ewe fanü. 7 Iwe, ewe Samol mi Lapalap a pwä ngeni Apram o üreni, “Ei fanü üpwe ngeni mwirimwirum kana.” Mürin, Apram a senätä eu rongen asor ikenan fän iten ewe Samol mi Lapalap mi pwä ngeni. ✡ Föf 7.5; Kal 3.16 8 Seni ikenan a feila ngeni ewe fanü mi chukuchukutä ötiuen Petel. Iwe, a aüetä imwan imw mangaku lefilen Petel mi nom lotou me Ai mi nom ötiu. Nge ikenan a pwal senätä eu rongen asor fän iten ewe Samol mi Lapalap o fel ngeni. 9 Mürin, Apram a sai seni eu leni tori pwal eu o fetaleiti peliörün ewe fanü Kanaan.
Apram a nonom Isip
12.10-20
10 Nge a fis lengita lon ewe fanü Kanaan. Iei mine Apram a feila Isip o nonom ikenan, pun ewe lengita a fokun chou won ewe fanü. 11 Nge lupwen a arap ngeni Isip, a kapas ngeni Sarai pwülüan we, “Üa silei pwe en eman fefin mi fokun liöch. 12 Lupwen ekewe chon Isip repwe künok, repwe apasa pwe en pwülüei. Iwe, repwe nieila, nge en kopwe manau. 13 Iei mine kopwe apasa pwe en fefinei. Mürin repwe eäni kirikiröch ngeniei o amanauaei pokitom.” ✡ Ken 20.2; 26.7 14 Iwe, lupwen Apram a tolong lon Isip, ekewe chon Isip ra küna pwe ewe fefin a fokun liöch. 15 Nge lupwen nöün Farao kewe nöüwis ra küna neminewe, ra ainga ngeni Farao. Iwe, ra angei Sarai o emwenato lon imwen Farao. 16 Nge Farao a fokun eäni kirikiröch ngeni Apram pokiten Sarai. Iwe, a fang ngeni sip, kow, aas, chon angang mwän me chon angang fefin me kamel.
17 Nge ewe Samol mi Lapalap a ariaföüü Farao me chon leimwan meinisin ren sokun feiengau mi lapalap pokiten Sarai pwülüen Apram we. 18 Mürin, Farao a körato Apram o apasa, “Pwota ka föri ngeniei ei sokun? Pwota kosap asile ngeniei pwe neminei pwülüom? 19 Pwota ka apasa pwe neminei fefinom? Ina popun üa angei pwe pwülüei. Kopwe angei pwülüom ei o sü seniei.” 20 Mürin, Farao a allük ngeni nöün kewe chon angang pwe repwe emwenala Apram. Iwe, ra angei Apram me pwülüan we me mettochun meinisin o emwenawu seni ewe fanü Isip.