1 Iwe, ewe Samol mi Lapalap a kapas ngeniei, 2 “Nöün aramas, ka nonom lein eu täppin aramas mi lükümach o ü ngeniei. A wor meser pwe repwe küna, nge resap künökün, a pwal wor selinger pwe repwe rongorong, nge resap rongorong, pun ir eu täppin aramas mi lükümach o ü ngeniei. ✡ Ais 6.9-10; Jer 5.21; Mark 8.18 3 Iei mine, nöün aramas, kopwe amolätä om pwotou usun eman chon oola a föri. Lerän, lupwen ekewe aramas ra nenengenuk, kopwe feila seni leniom o feila ngeni pwal eu leni. Eli repwe wewe ren, inamwo ika ir eu täppin aramas mi lükümach o ü ngeniei. 4 Lerän, lupwen ra nenengenuk, kopwe uwawu om pwotou ka amolätä usun än eman chon oola. Nge lekuniol, lupwen ra nenengenuk, kopwe feila seniir usun eman aramas mi oola. 5 Lupwen ra nenengenuk, kopwe pwangeni etippen imwom o towu me lon fän om pwotou. 6 Kopwe mwärei om pwotou, lupwen ra nenengenuk, o uweela, lupwen a pwinila. Kopwe pwal pwölüela won mesom pwe kosap küna mwom, pun üa awisok, pwe kopwe eu asisil fän iten ekewe chon Israel.”

7 Iwe, üa föri usun Kot a allük ngeniei. Lerän üa amolätä ai pwotou usun än eman chon oola, nge lekuniol üa pwangeni etippen imwei ren püsin pei. Iwe, lupwen a pwinila, üa feil seniir o mwärei ai pwotou, lupwen ra nenengeniei.

8 Nge sorotän ewe rän, ewe Samol mi Lapalap a kapas ngeniei, 9 “Nöün aramas, ifa usun, sap chon Israel ewe täppin aramas mi lükümach o ü ngeniei ra aisinuk, ‘Met ka föri?’ 10 Kopwe pälüeniir, ‘Iei alon Kot ewe Samol mi Lapalap: Ei kapasen osuni fän iten ewe samolun Jerusalem, pwal fän iten chon Israel meinisin mi nom lon ewe fanü.’ 11 Kopwe üreniir, pwe en eu asisil fän iter. Iwe, usun mine ka föri, ina usun epwe fis ngeniir. Repwe feila toau pwe repwe oola. 12 Iwe, ewe samol mi nemeniir epwe mwärei an pwotou, lupwen a pwinila, o feila. Repwe pwangeni ewe tit fän itan pwe epwe towu me lon, epwe pwal pwölüela won mesan pwe esap tongeni küna mwan. 13 Nge ngang ewe Samol mi Lapalap üpwe aturala ai toloia won, pwe epwe tup lon. Mürin üpwe emwenala Papilon lon fanüen chon Kaltea, nge i esap küna. Iwe, epwe mäla ikenan. ✡ 2.King 25.7; Jer 52.11 14 Üpwe atoropasafeili chon leimwan ekis meinisin, pwal nöün kewe nöüwis me nöün kewe sounfiu meinisin, üpwe pwal tapweriir fän ketilas. 15 Iwe, lupwen üpwe tinirela lein chon ekewe mwü o atoropasafeiliir won ekewe fanü, mürin repwe silei pwe ngang ewe Samol mi Lapalap. 16 Nge ekoch chök me leir üpwe amanaueer seni maun me lengita me mätter, pwe repwe mefi me lein chon ekewe mwü ia ra oola ie, pwe ar kewe föför ra anioput. Mürin repwe silei pwe ngang ewe Samol mi Lapalap.”

17 Iwe, ewe Samol mi Lapalap a kapas ngeniei, 18 “Nöün aramas, kopwe mongö anom o ünümi ünümom fän chechech me niuokus watte. 19 Kopwe üreni aramasen ei fanü, ‘Iei alon Kot ewe Samol mi Lapalap usun ekewe chon Jerusalem mi nom lon ewe fanü Israel: Repwe mongö ener fän niuokus watte o ünümi ünümer fän apilükingau, pun fanüer epwe unusen pöla, pokiten chon ewe fanü ra chök föri föförün mwänewüs. 20 Iwe, ekewe telinimw mi so me lom repwe tala, nge ewe fanü epwe wiliti eu fanüapö. Mürin repwe silei pwe ngang ewe Samol mi Lapalap.’ ”

21 Iwe, ewe Samol mi Lapalap a kapas ngeniei, 22 “Nöün aramas, pwota ekewe chon Israel ra eäni ei sokun mwiitun? Ra apasa, ‘Ekewe rän ra la, nge künään soufos esap fis.’ 23 Iei mine kopwe üreniir, ‘Iei alon Kot ewe Samol mi Lapalap: Üpwe awesi ei mwiitun, pwe aramas resap chüen eänisefäli lon Israel.’ Nge kopwe pwal üreniir, ‘A fokun tori fansoun pwe künään soufos meinisin repwe fisitä.’ 24 Pun esap chüen wor künään soufos mi mwäl ika kapasen osuni mi mwotoutou lein chon Israel. 25 Pwe ngang ewe Samol mi Lapalap üpwe kapas, nge epwe fokun pwönüetä, pun esap chüen mang. Ewer, lupwen fansoun manauemi, ämi chon lükümach o ü ngeniei, üpwe apwönüetä ai kewe kapas meinisin.” Iei alon Kot ewe Samol mi Lapalap.

26 Iwe, ewe Samol mi Lapalap a kapassefäl ngeniei, 27 “Nöün aramas, ekewe chon Israel ra apasa pwe mine ka küna epwap fis mürin chomong rän, nge mine ka osuni a fokun toau, toau. 28 Iei mine kopwe üreniir, ‘Iei alon Kot ewe Samol mi Lapalap: Esap wor eu lein ai kewe kapas epwe mang le pwönüetä, nge mine üa apasa epwe fokun fis.’ Ngang Kot ewe Samol mi Lapalap üa kapas.”