1 “Iwe, amüchülan iteiten fisu ier oupwe amusala än aramas liwinimang ngenikemi. 2 Nge iei usun lapalapen ämi amusala: Ewe chon mwütätä liwinimang epwe amusa mine a ngeni chon arun. Esap fokun echimwa seni pwin we chon Israel ewe liwinimang, pun a tori ewe fansoun ewe Samol mi Lapalap a filätä pwe aramas repwe amusala liwinimang. 3 Iwe, oua tongeni echimwa seni eman chon ekis pwe epwe ngenikemi an liwinimang. Nge meinisin mine pwimi kewe chon Israel ra angei senikemi oupwe amusala. 4 Ewe Samol mi Lapalap ämi we Kot epwe afeiöchükemi lon ewe fanü epwe ngenikemi pwe oupwe fanüeni. Esap wor eman epwe wöüngau leimi, 5 are oupwe chök aleasochisi alon ewe Samol mi Lapalap ämi we Kot o tümwünüöchü le apwönüetä ekei allük meinisin üa ngenikemi ikenai. 6 Lupwen ewe Samol mi Lapalap ämi we Kot epwe afeiöchükemi usun a pwon ngenikemi, oupwe mwütätä pisek ngeni chomong mwü, nge ämi ousap paaro seniir, oupwe pwal nemenem won chomong mwü, nge ir resap nemenem womi.

7 Iwe, are mi wor eman pwimi mi wöüngau lon ämi kewe telinimw mi nom lon ewe fanü ewe Samol mi Lapalap ämi we Kot epwe ngenikemi, ousap apöchöküla lelukemi are kichingau ngeni. 8 Nge oupwe suki pöümi ngeni pwimi we o mwüt ngeni ükükün mine a tüngor, ese lifilifil met an osupwang. ✡ Lif 25.35 9 Oupwe afälikemi pwe esap wor ekiek mi ngau lon lelukemi, pwe oua apasa: A arap ewe afisuen ier, ewe ierin musala. Ousap pwal wowongau ngeni pwimi we mi wöüngau pwe ousap ngeni och. Pun pwimi epwe siö ngeni ewe Samol mi Lapalap o aturukemi, nge ämi oupwe tipis ren. 10 Iwe, oupwe kichiöch le fang ngeni pwimi we, nge ousap ekipwichi lon lelukemi, lupwen oua fang ngeni och. Pun are oua kichiöch, ewe Samol mi Lapalap ämi we Kot epwe afeiöchükemi lon ämi angang meinisin, pwal lon meinisin mine oua popuetä le föri. 11 Pun epwe wor chon wöüngau lon ewe fanü fansoun meinisin. Iei mine üa allük ngenikemi pwe oupwe fokun suki pöümi ngeni pwimi kewe mi osupwang o wöüngau lon ewe fanü.” ✡ Mat 26.11; Mark 14.7; Joh 12.8

12 “Iwe, are eman a amömö ngenikemi eman re Ipru ika eman fin Ipru, epwe angang ngenikemi ükükün wonu ier, nge lon afisuen ier oupwe angasala. 13 Lupwen oupwe angasala, ousap afeiloi fän an asöülapö. 14 Nge oupwe fangemong ngeni sip seni nöümi pwiin sip, wiich seni ämi lenien wichiwich umwun wiich, pwal wain seni ämi lenien üchüch föün wain. Iwe, oupwe ngeni seni mine ewe Samol mi Lapalap ämi we Kot a afeiöchü ngenikemi. 15 Oupwe chechemeni pwe ra piin nöünikemi amanau me lon ewe fanü Isip, nge ewe Samol mi Lapalap ämi we Kot a angasakemi. Iei mine üa ngenikemi ei allük ikenai. 16 Nge are ewe chon angang mwän epwe ürenikemi pwe esap mochen feila senikemi, pun a tongeekemi me ämi famili pokiten a tiueöch me remi, 17 mürin oupwe angei efoch pwangapwang o pwangeni selingan appwere ngeni asamalapen imwemi. Iwe, oupwe nöüni amanau lon ränin manauan meinisin. Oupwe pwal föri iei usun ngeni nöümi chon angang fefin. 18 Iwe, lupwen oua angasala ewe chon angang pwe epwe feila senikemi, ousap weires ren. Pun ükükün mine oua liwini ngeni, lupwen a angang ngenikemi wonu ier, a chök ükükün esopun liwinin eman chon angang mi mö. Mürin, ewe Samol mi Lapalap ämi we Kot epwe afeiöchükemi lon meinisin mine oupwe föri.” ✡ Lif 25.39-46

19 “Iwe, ekewe ätemwänin mweinöü meinisin seni nöümi pwiin kow me sip oupwe apini fän iten ewe Samol mi Lapalap ämi we Kot. Ousap nöüni le angang ekewe mweinöün nöümi kow, ousap pwal fichi ülöülen mweinöün nöümi sip. ✡ Eks 13.12 20 Iwe, ämi me chon leimwemi oupwe ochei ekewe mweinöün man iteiten ier me fän mesen ewe Samol mi Lapalap ämi we Kot lon ewe leni epwe filätä. 21 Nge are a wor terin, are a mwok ika chun ika a wor och sokun terin mi ngau, ousap eäni asor ngeni ewe Samol mi Lapalap ämi we Kot. 22 Oupwe chök ochei me lon ämi kewe telinimw. Chokewe mi limengau me chokewe mi limöch ra tongeni ochoch seni, usun ämi ochoch chia ika sokun chia itan kasele. 23 Nge ousap chök ünümi chan ewe man, pwe oupwe ninätiu lepwül usun koluk.” ✡ Ken 9.4; Lif 7.26-27; 17.10-14; 19.26; Tut 12.16,23