1 Iwe, Tarius nöün Asuworos ewe re Metia a kingen mwün Papilon. 2 Lon aeuin ierin mwün ngang Taniel üa aleani me lon puk usun mine ewe Samol mi Lapalap a aiti ngeni ewe soufos Jeremaia, pwe Jerusalem epwe tala lon ükükün fik ier. ✡ Jer 25.11; 29.10

3 Iwe, üa sachetä ngeni Kot ewe Samol lon ai iotek o tüngormau fän ai echikefel, üa pwal üföüf üf seni tuk o mot lon falangen ekkei. 4 Mürin üa iotekin amusamus ngeni ewe Samol mi Lapalap ai we Kot, “Ai Samol me ai Kot, en eman Kot mi tekia me eniuokus, ka tümwünüöchü om pwon, ka pwal tongei chokewe mi echenuk o föri pwüngün om kewe allük. 5 Äm aia tipis, äm aia föri mine a mwäl o ngau fän mesom, äm aia pwal ü ngonuk o lükümmach ngeni om kewe allük. 6 Äm aisap aüselinga alon ekewe soufos noum kewe chon angang, ra kapas fän itom ngeni äm kewe king me samol, pwal ngeni äm kewe lewo me aramasen ewe fanü meinisin. 7 En chök äm Samol ka unusen pwüng, nge äm aia chök atoto wom säw usun a pwä ikenai, äm me chon Juta, chon Jerusalem me chon Israel meinisin mi nom toau me arap, ia ka atoropasafeilikem ie pokiten tipisin äm likitukela. 8 Ewer, äm Samol, äm me äm kewe king, äm samol me äm kewe lewo äm aia föri föförün äsäw o tipis ngonuk. 9 En chök äm Samol me äm Kot ka eäni tong, ka pwal amusala tipis. Nge äm aia ü ngonuk, 10 äm aisap aleasochisi alom, pun aisap föri pwüngün om kewe allük ka ngenikem ren ekewe soufos noum chon angang. 11 Chon Israel meinisin ra puri om allük o kul senuk, pun resap aleasochisi alom. Äm aia tipis ngonuk, iei mine ka atoto wom ekewe anümamau mi fis fän akapel, ekewe mi mak lon ewe puken allük än Moses noum we chon angang. 12 Ka apwönüetä om kapasen pälüenikem me äm kewe sounemenem ren om awarato wom feiengau watte. Iwe, ükükün ewe feiengau mi tori Jerusalem esamwo fis me mwan won unusen fanüfan. 13 Ei feiengau a torikem a mak lon ewe puken allük än Moses. Nge äm aisap föri och mine en Kot äm Samol mi Lapalap kopwe chä ngenikem ren, pun aisap kul seni äm tipis, aisap pwal föri mine a let. 14 Iei mine en Kot äm Samol mi Lapalap ka amolätä ei feiengau o awarato wom. Pun ka eäni pwüng lon om föför meinisin, nge äm aisap aleasochisi alom. 15 Äm Samol me äm Kot, ka emwenawu noum aramas seni lon ewe fanü Isip ren om manaman, ka pwal iteföüla ren tori ikenai. Iei äm aia pwärätä pwe aia tipis ngonuk o föri mine a ngau. 16 Äm Samol, pokiten om föförün pwüng me om ümöümöch kose mochen kopwe siwili om ekiekin song me lingeringeriti om we telinimw Jerusalem me chukum we mi pin. Pun Jerusalem me noum aramas meinisin ra küna itengau me ren chokewe mi nom ünüküm pokiten äm tipis me tipisin äm kewe lewo. 17 Nge iei ai Kot, kose mochen kopwe aüselinga ai iotekin tüngor, ngang noum chon angang, nge pokiten itom kopwe pwal wopwapwasefäl ngeni imwom Imwenfel mi tala ikenai. 18 Äm Kot, kose mochen kopwe aüselingakem, kopwe anelai mesom o nenengeni leniem mi tatakis me ewe telinimw a iteni itom. Pun äm aisap eäni äm iotekin tüngor pokiten äm pwüng, nge pokiten watten om ümöümöch me om tong ngenikem. 19 Äm Samol, kose mochen kopwe aüselingakem o amusala äm tipis. Äm Samol, kose mochen kopwe aüselinga kem o amüttirato om alilis ngenikem pokiten itom, pwe aramas meinisin repwe silei pwe en Kot. Pun ei telinimw om, nge ekei aramas noum.”

20 Iwe, üa chök sopwela le iotek o pwärätä ai tipis me tipisin aramasei chon Israel, üa pwal tüngormau ngeni ai Kot ewe Samol mi Lapalap fän iten imwan mi pin epwe kaüsefäl. 21 Iwe, lupwen üa chüen iotek, ewe mwän Kapriel, üa fen küna lon künaei me mwan, a müttir ässito rei lupwen fansoun a fis asoren lekuniol. ✡ Luk 1.19,26 22 A üreniei, “Taniel, iei üa feito, pun üpwe alisuk pwe kopwe weweiti ekei mettoch. 23 Lupwen ka popuetä le iotekin tüngor, Kot a pälüeni om iotek. Iei üa feito pwe üpwe asile ngonuk pälüan, pun ka fokun chen me ren. Iei mine kopwe ekieki ekewe kapas pwe kopwe weweiti künaom we.

24 Iwe, a pwüngüla pwe ükükün fisu fän fik ier a kaüküla fän iten aramasom me om we telinimw mi pin. Mürin, pupungau epwe ükütiu, tipis epwe müchüla, epwe fis amusamusen tipis, nge pwüng esemüch epwe pwönüetä pwe alon soufos me künaer epwe fisitä, epwe pwal fis apinipinin ewe Leni mi Unusen Pin. 25 Kopwe silei o weweiti ei: Seni fansoun ewe kapas a towu pwe Jerusalem epwe kaüsefäl tori waren ewe sounemenem, ätewe mi kepit, ükükün fisu fän fisu ier repwe la. Iwe, Jerusalem epwe kaüsefäl, epwe pwal wor alan me an lenien chulap. Epwe nom lon ükükün fisu fän wone me ruu ier, nge epwe eu fansoun osupwang. 26 Iwe, mürin ekewe fisu fän wone me ruu ier ewe mi kepit epwe ninnila, nge esap wor popun. Iwe, nöün eman samol sounfiu repwe war o ataela ewe telinimw me ewe Leni mi Pin. Nge sopolan ewe telinimw epwe war usun chök eu noter, epwe pwal fis maun me tatakis tori lesopolan, usun Kot a fen apwüngala. 27 Lon ükükün fisu ier ewe samol epwe föri eu pwon mi nüküchar ngeni chomong aramas, nge lukalapen ekewe fisu ier epwe aükätiu ewe asoren kek me ewe asoren mongö. Iwe, ewe mi afisätä tatakis epwe anomu eu mettoch mi fokun anioput lon ewe Leni mi Fokun Tekia lon ewe Imwenfel, tori Kot epwe atolonga ätewe lon ewe feiengau a fen apwüngala won.” ✡ Tan 11.31; 12.11; Mat 24.15; Mark 13.14