1 Ekoch fansoun mürin, Nahas ewe kingen chon Amon a mäla, nge Hanun nöün we mwän a siwili lon wisan wisen king. 2 Iwe, Tafit a üra, “Üpwe kirikiröch ngeni Hanun, usun Nahas saman we a kirikiröch ngeniei.” Iei mine Tafit a tinala nöün chon künö, pwe repwe aururu Hanun pokiten än saman mäla. Nge lupwen nöün Tafit kewe chon angang ra tori ewe fanüen chon Amon, 3 ekewe samolun chon Amon ra üreni Hanun ar we king, “Ifa usun, ka ekieki pwe Tafit a tinato chon aururuk pokiten an mochen asamolu semom? Ifa usun, Tafit esap fen tinato nöün chon angang reöm pwe repwe ouwasacha ewe telinimw o operi, pun repwe ataela?” 4 Iei mine Hanun a turufi nöün Tafit kewe chon angang, a räisöüla epekin alüsen eman me eman leir o pöküela üfer me won wilar. Mürin a tinirela. 5 Lupwen ra asile ngeni Tafit ei pworaus, a tinala chon künö pwe repwe uwala an pworaus ngeniir, pun ekewe mwän ra fokun säw. Iei alon ewe king, “Oupwe chök nonom lon Jeriko tori alüsemi epwe pwüksefäl. Mürin oupwap liwinto.”

6 Iwe, lupwen ekewe chon Amon ra mefi pwe Tafit a oput ir, ra titi o möni rüe ngeröü sounfiu mi fetal re Siria seni Peterehop me Sopa, ewe kingen Maaka fiti engeröü mwän, pwal engol me ruungeröü re Top. 7 Lupwen Tafit a rong usun, a tinala Joap me ewe mwichen sounfiu meinisin. 8 Iwe, ekewe re Amon ra feito o tettelila mwen asamalapen tittin ar we telinimw Rapa. Nge ekewe re Siria seni Sopa me Rehop me ekewe re Top pwal Maaka ra imwüla o tettelila lon ewe fanü mi amassawa.

9 Iwe, lupwen Joap a küna pwe ekewe sounfiu ra sousou me mwan me lükisökürün, a fili ekoch mwän mi pwora seni meinisin me lon Israel o atetteliir pwe repwe maun ngeni ekewe sounfiun Siria. 10 Nge ekewe lusun nöün sounfiu a atolongeer fän nemenien Apisai pwin we. Iwe, Apisai a atetteliir pwe repwe maun ngeni ekewe sounfiun Amon. 11 Joap a üreni Apisai, “Are ekewe re Siria ra kon pöchökül ngeniei, ina otun kopwe alisiei. Nge are ekewe re Amon ra kon pöchökül ngonuk, ina otun üpwe feila o alisuk. 12 Kopwe tipepwora. Sipwe tipen mwän fän iten nöüch aramas, pwal fän iten ekewe telinimwen ach we Kot. Nge ewe Samol mi Lapalap epwe föri mine a öch me ren.” 13 Mürin, Joap me nöün kewe sounfiu ra kaneto o maun ngeni ekewe sounfiun Siria. Iwe, ekewe sounfiun Siria ra sü me mwan. 14 Nge lupwen ekewe sounfiun Amon ra küna pwe ekewe sounfiun Siria ra sü, pwal ir ra sü me mwen Apisai o sülong lon ewe telinimw. Mürin, Joap a liwin seni an maun ngeni ekewe sounfiun Amon o feito Jerusalem.

15 Lupwen ekewe sounfiun Siria ra küna pwe ra kuf ren ekewe sounfiun Israel, ra achufengeniir meinisin. 16 Mürin, king Hatateser a titi o körato ekewe sounfiun Siria mi nom ötiuen ewe chanpupu Oifrat. Iwe, ra feito Hilam, nge Sopak ewe meilapen nöün Hatateser mwichen sounfiu a emweniir. 17 Lupwen ei pworaus a tori Tafit, a achufengeni ekewe sounfiun Israel meinisin, a feila pekilan ewe chanpupu Jortan o tori Helam. Iwe, ekewe sounfiun Siria ra atettelirela o maun ngeni Tafit. 18 Nge ekewe sounfiun Siria ra sü me mwen ekewe sounfiun Israel. Iwe, Tafit me nöün kewe sounfiu ra niela ükükün füpükü sounfiun Siria mi wawa woken, pwal faik ngeröü chon wawa oris, ra pwal akinasa Sopak ewe meilapen ar mwichen sounfiu pwe a mäla ikenan. 19 Iwe, lupwen ekewe king meinisin, ir mi nom fän nemenien Hatateser, ra küna pwe ra kuf ren ekewe sounfiun Israel, ra föri kinamwe ngeniir o atolongeer fän nemenier. Iei mine ekewe chon Siria ra niuokus ren ar repwe chüen alisi ekewe chon Amon.