1 Iwe, Hiskia a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün rüe me tiu ier. Iten inan Apia nöün Sekaria we fefin. 2 Hiskia a föri mine a pwüng me fän mesen ewe Samol mi Lapalap, usun meinisin mine Tafit an we lewo a föri.

3 Iwe, lon aeuin ierin mwün Hiskia, lon ewe aeuin maram Hiskia a sukisefäli ekewe asamalapen imwen ewe Samol mi Lapalap, a pwal försefäli mine a ta me won. 4 A körato ekewe souasor me ekewe mwän seni ewe ainangen Lefi o amwichafengeniir lon ewe leni lükün imwenfel mi nom ötiuan. 5 Iwe, a üreniir, “Oupwe aüselingaei, ämi chon ewe ainangen Lefi. Oupwe apinikemi, oupwe pwal apini imwen ewe Samol mi Lapalap än ämi kewe lewo we Kot, o atowu ewe limengau seni ewe leni mi pin. 6 Pun ach kewe lewo ra tipis o föri mine a ngau me fän mesen ewe Samol mi Lapalap ach we Kot. Ra likitala Kot o akulu sökürür ngeni imwen ewe Samol mi Lapalap. 7 Ra pwal apüngala ekewe asamalapen kengkangen ewe imwenfel o kunuela ekewe lamp. Resap keni apach mi pwokus ika eäni asoren kek ngeni ewe Koten Israel me lon ewe leni mi pin. 8 Iei mine ewe Samol mi Lapalap a song ngeni chon Juta me chon Jerusalem o föri pwe ir eu lenien eniweniw me ämäirü me turunufas, usun oua püsin küna ren mesemi. 9 Nengeni, semelapach kewe ra mäla lon maun, nge nöüch mwän me fefin, pwal pwülüach ra oola pokiten ei föför. 10 Iwe, iei ekiekin lelukei, pwe üpwe föri eu pwon ngeni ewe Samol mi Lapalap ewe Koten Israel, pwe esap chüen song ngenikich. 11 Nei kana, iei ousap alusala fansoun, pun ewe Samol mi Lapalap a filikemiitä pwe oupwe nöün chon angang, oupwe ü fän mesan o angang ngeni, oupwe pwal keni apach mi pwokus ngeni.”

12 Iwe, ikkei iten ekewe mwän seni ewe ainangen Lefi mi popuetä ar angang: Seni ewe eterekesin Kohat Mahat nöün Amasai me Joel nöün Asaria. Seni ewe eterekesin Merari Kis nöün Apti me Asaria nöün Jehalelel. Seni ewe eterekesin Kerson Joa nöün Sima me Eten nöün Joa. 13 Seni ewe eterekesin Elisafan Simri me Jeuel. Seni ewe eterekesin Asaf Sekaria me Matania. 14 Seni ewe eterekesin Heman Jehuel me Simei, nge seni ewe eterekesin Jetutun Semaia me Usiel. 15 Ekei mwän ra achufengeni pwiir kewe seni ewe ainangen Lefi, nge ir meinisin ra apiniir. Mürin, ra tolong lon imwen ewe Samol mi Lapalap, pwe repwe limeti, usun ewe king a allük ngeniir fän alon ewe Samol mi Lapalap. 16 Iwe, ekewe souasor ra tolong lon imwen ewe Samol mi Lapalap lon ewe rumwen lon, pwe repwe limeti. Ra atowu ekewe mettoch mi limengau meinisin ra küna lon o uweerela lon ewe leni lükün ewe imwenfel. Nge ekewe mwän seni ewe ainangen Lefi ra angei ekewe mettoch mi limengau o uweerela ngeni ewe lemolun Kitron. 17 Iwe, lon aeuin ränin ewe aeuin maram ra popuetä ewe angangen apinipin, nge lon awaluen ränin ewe chök maram ra tori kengkangen imwen ewe Samol mi Lapalap. Mürin ra apini imwen ewe Samol mi Lapalap lon pwal ükükün walu rän. Nge lon engol me wonuen ränin ewe aeuin maram ra wes. 18 Mürin, ra feila ren ewe king Hiskia o üreni, “Äm aia limeti unusen imwen ewe Samol mi Lapalap, ewe rongen asoren kek me pisekin meinisin, pwal ewe chepel fän iten ewe pilawa mi pin me pisekin meinisin. 19 Iwe, ekewe pisek meinisin ewe king Ahas a pöütala lon fansoun mwün, lupwen a tipis, äm aia aliwinisefäliir o apiniir. Iei ra nom mwen än ewe Samol mi Lapalap we rongen asor.”

20 Mürin, ewe king Hiskia a pwätä lesosorusich o amwichafengeni ekewe nöüwisen ewe telinimw. Iwe, ra feilapök ren imwen ewe Samol mi Lapalap. 21 Ra emwenato füman ätemwänin kow, füman ätemwänin sip, füman lam, pwal füman ätemwänin kuuch pwe eu asoren tipis fän iten familien ewe king, fän iten chon Juta, pwal fän iten limelimen ewe leni mi pin. Iwe, Hiskia a allük ngeni ekewe souasor ir mwirimwirin Aaron, pwe repwe eäniir asor won än ewe Samol mi Lapalap rongen asor. 22 Iei mine ekewe souasor ra niela ekewe ätemwänin kow, ra angei ewe cha o uti ngeni ewe rongen asor. Mürin ra niela ekewe ätemwänin sip o uti char ngeni ewe rongen asor, ra pwal niela ekewe lam o uti char ngeni ewe rongen asor. 23 Lesopolan ra emwenato ekewe ätemwänin kuuch fän iten ewe asoren tipis ren ewe king me ewe mwichen aramas, nge ir ra iseis pöür wor. 24 Mürin, ekewe souasor ra nirela o ninätiu char won ewe rongen asor, pwe asoren amusamusen tipis fän iten chon Israel meinisin. Pun ewe king a allük pwe repwe eäni ewe asoren kek me asoren tipis fän iten chon Israel meinisin.

25 Iwe, ewe king Hiskia a alenia ekewe mwän seni ewe ainangen Lefi lon imwen ewe Samol mi Lapalap fän pisekin kaktai, fän kitar me ükülele, usun mine Tafit me Kat nöün ewe king we soufos, pwal ewe soufos Natan ra allük, pun ei allük ekewe soufos ra apasa fän alon ewe Samol mi Lapalap. 26 Iei mine ekewe mwän seni ewe ainangen Lefi ra ütä fän ekewe pisekin ettik än ewe king Tafit, nge ekewe souasor ra ütä fän ekewe rappwa. 27 Mürin, Hiskia a allük pwe repwe eäni ewe asoren kek won ewe rongen asor. Nge lupwen ra popuetä le eäni ewe asoren kek, ekewe aramas ra popuetä le köl ngeni ewe Samol mi Lapalap, nge ekewe chon ettik ra ettiki ekewe rappwa me ekewe sokopaten pisekin ettik. 28 Iwe, unusen ewe mwichen aramas ra fel ngeni Kot, ekewe chon köl ra köl, nge ekewe chon ettiki rappwa ra ettik tori ewe asoren kek a wes. 29 Nge lupwen ra wes le eäni ewe asor, ewe king me ekewe aramas meinisin mi nom ren ra chapetiu o fel ngeni Kot. 30 Iwe, ewe king Hiskia me nöün kewe nöüwis ra allük ngeni ekewe mwän seni ewe ainangen Lefi, pwe repwe kölün mwareiti ewe Samol mi Lapalap ren ekewe köl Tafit me ewe soufos Asaf ra föri. Iei usun ra kölün mwareiti Kot fän pwapwa, ra chapetiu o fel ngeni.

31 Mürin, Hiskia a üreni ekewe aramas, “Iei oua püsin apinikemi fän iten ewe Samol mi Lapalap. Oupwe kaneto o uwato ekewe asor me asoren kilisou lon imwen ewe Samol mi Lapalap.” Iei mine ra uwato ekewe asor me ekewe asoren kilisou, nge ekoch me leir ra pwal uwato man fän iten asoren kek seni mochenin letiper. 32 Iwe, iteiten ekewe mönün asor ekewe aramas ra uwato fän iten asoren kek ngeni ewe Samol mi Lapalap ükükün fik ätemwänin kow, ipükü ätemwänin sip me rüepükü lam. 33 Ra pwal uwato ekewe asor mi pin ükükün wonopükü ätemwänin kow me ülüngatngeröü sip. 34 Nge ekewe souasor ra men chokükün, iei popun resap tongeni atika silin ekewe mönün asoren kek meinisin. Iei mine pwiir kewe ekewe mwän seni ewe ainangen Lefi ra alisiir tori ewe angang a wes, pwal tori ekewe souasor meinisin ra apiniir. Pun ekewe mwän seni ewe ainangen Lefi ra tiliken le püsin apiniir lap seni ekewe souasor. 35 Iwe, lükün ekei chomongun asoren kek, ekewe souasor ra pwal keni kirisin ekewe mönün asoren kinamwe o ninätiu ekewe asoren ün mi chu ngeni ekewe asoren kek. Iei usun angangen fel lon imwen ewe Samol mi Lapalap a fisisefäl. 36 Nge Hiskia me ekewe aramas meinisin ra pwapwa, pokiten Kot a alisiir, pwe ra tongeni müttir föri ekei föför.