1 Nge lon ewe afisuen ier Jehoiata a tipepwora o föri eu pwonen atipeeu ngeni ekewe meilapen sounfiu, ngeni Asaria nöün Jeroham we mwän, Ismael nöün Jehoanan we mwän, Asaria nöün Opet we mwän, Maseia nöün Ataia we mwän me Elisafat nöün Sikri we mwän. 2 Iwe, ra feila lemenen Juta o amwichafengeni chon ewe ainangen Lefi me ekewe mwänirelan ekewe cho seni ekewe telinimwen Juta meinisin. Nge lupwen ra feito Jerusalem, 3 unusen ewe mwichen aramas ra föri eu pwon ngeni ewe king lon imwen ewe Samol mi Lapalap. Jehoiata a üreniir, “Nengeni, iei i nöün ewe king we mwän. I epwe king, usun ewe Samol mi Lapalap a fen pwon fän iten ekewe mwirimwirin Tafit. ✡ 2.Sam 7.12 4 Iei usun mine oupwe föri: Ämi kewe souasor me ämi chon ewe ainangen Lefi mi popuetä ämi angang lon ewe ränin sapat, eu leülüngat me leimi repwe mamasa asamalapen ewe imwenfel, 5 eu leülüngat repwe mamasa imwen ewe king, nge eu leülüngat repwe nom ren ewe Asamalapen Longolong. Nge ekewe aramas meinisin repwe nom lon ewe leni lükün imwen ewe Samol mi Lapalap. 6 Ousap mwüt ngeni eman epwe tolong lon imwen ewe Samol mi Lapalap, chilon chök ekewe souasor me chon ewe ainangen Lefi mi föri ar angang. Ir chök repwe tongeni tolong, pun ra pin. Nge ekewe aramas meinisin repwe aleasochis ngeni mine ewe Samol mi Lapalap a allük o nom lükün. 7 Iwe, chon ewe ainangen Lefi repwe ütä pwelin ünükün ewe king, eman me eman fän an pisekin maun. Repwe eti ewe king ekis meinisin ia epwe feila ie. Nge iön a tolong lon ewe imwenfel epwe ninnila.”

8 Iwe, chon ewe ainangen Lefi me ekewe chon Juta meinisin ra föri meinisin mine ewe souasor Jehoiata a allük ngeniir. Eman me eman seni ekewe meilap a emwenato nöün aramas, chokewe mi wes le angang lon ewe ränin sapat, pwal chokewe mi popuetä ar angang. Pun ewe souasor Jehoiata esap asera ekewe mwich. 9 Mürin, ewe souasor Jehoiata a atowu ngeni ekewe meilap ekewe siles me ekewe tittin maun mi watte me kükün än ewe king Tafit mi nom lon ewe imwenfel. 10 Iwe, a atetteli ekewe mwän pwe repwe tümwünü ewe king, eman me eman fän an pisekin maun. Ra tettel arun ewe rongen asor me ewe imwenfel seni peliörün ewe imwenfel tori peliefengin. 11 Mürin, Jehoiata me nöün kewe mwän ra emwenawu Joas nöün ewe king we ät, ra isetä epa mwärämwär won möküran o ngeni ewe puken allük. Iwe, ra awisa ngeni ewe wisen king, ra epiti o kökkö, “Ewe king epwe manauatam.”

12 Nge lupwen Atalia a rongorong akürangen ekewe aramas mi sässä o mwareiti ewe king, a feila ren imwen ewe Samol mi Lapalap ren ekewe aramas. 13 Lupwen a nenefetal, a küna ewe king a ütä ren ewe ür arun asamalapen ewe imwenfel, nge ekewe meilap me ekewe chon ettik rappwa ra ütä ünükün ewe king. Iwe, aramasen ewe fanü meinisin ra mweireir o ettiki rappwa, nge ekewe chon köl ra emweni ewe mwich fän ar pisekin ettik le köl. Nge Atalia a kamwei üfan o puchör, “A fis rawangau, a fis rawangau!” 14 Mürin, ewe souasor Jehoiata a allük ngeni ekewe meilap mi nemeni ewe mwichen sounfiu, “Oupwe emwenawu neminewe lefilen ekewe chon mas mi tettel, nge are eman a tapwela mürin, oupwe niela ren ketilas.” Pun ewe souasor a üra, “Ousap niela neminewe lon lenien ewe Samol mi Lapalap.” 15 Iei mine ra turufi neminewe, ra emwenalong lon asamalapen imwen ewe king, ia ekewe oris ra tolong me ie. Ikenan ra niela ie.

16 Iwe, ewe souasor Jehoiata a föri eu pwon lefilen i me ekewe aramas meinisin pwal ewe king, pwe ir repwe nöün ewe Samol mi Lapalap aramas. 17 Mürin, ekewe aramas meinisin ra tolong lon imwen ewe anü Paal o ataetiu. Ra atatakisi ekewe rongen asor me ekewe uluulun anümwäl, ra pwal niela Matan nöün Paal we souasor me mwen ekewe rongen asor. 18 Iwe, Jehoiata a pwal awisa ekewe souasor seni ewe ainangen Lefi, pwe repwe nemeni angangen imwen ewe Samol mi Lapalap. Repwe föri ewe angang ewe king Tafit a fen akota ngeniir. Repwe pwal eäni ekewe asoren kek ngeni ewe Samol mi Lapalap, usun a fen mak lon än Moses kewe allük. Repwe föri ar angang fän meseik me köl, usun mine Tafit a fen allük. 19 Iwe, a pwal anomu chon masen asam arun asamalapen ewe imwenfel, pwe esap wor eman epwe tongeni tolong lon, are esap limöch. 20 Mürin, Jehoiata me ekewe meilapen sounfiu, ekewe aramas tekia me än ekewe aramas kewe kepina, pwal aramasen ewe fanü meinisin ra etala ewe king seni imwen ewe Samol mi Lapalap o pwerelong lon ewe asamalapen won tori imwen ewe king. Iwe, ra amota ewe king won ewe lenien motun king. 21 Ekewe aramas meinisin ra meseik, nge ewe telinimw a kinamwe mürin än Atalia ninnila ren ketilas.