1 Iwe, Manasa a ierini engol me ruu, lupwen a tolong lon wisan wisen king. A nom lon Jerusalem o nemeni Juta lon ükükün lime me limu ier. 2 Manasa a föri mine a ngau me fän mesen ewe Samol mi Lapalap ren an föri ekewe föför mi anioput chon ekewe mwü ra föri, ir chokewe ewe Samol mi Lapalap a asürela me mwen ekewe aramasen Israel. ✡ Jer 15.4 3 Pun a aüsefälietä ekewe lenien fel won ekewe leni tekia Hiskia saman we a atarela. A senätä rongen asor fän iten ewe anü Paal o föri uluulun ewe anüfefin Asera, usun Ahap ewe kingen Israel a föri, a pwal fel ngeni ekewe fün läng meinisin. 4 Iwe, Manasa a senätä sokopaten rongen asor lon ewe imwenfel, iei ewe leni ewe Samol mi Lapalap a fen kapas usun pwe aramas repwe fel ngeni ie. ✡ 2.Sam 7.13 5 Manasa a pwal senätä rongen asor fän iten ekewe fün läng meinisin me lon ekewe ruu lenien mwich mwen ewe imwenfel. 6 Iwe, a kenala nöün ät pwe eu asor, a pwal föri angangen souasisil me souwo o churi watawa me sourong. Manasa a föri chomong sokun föför mi ngau me fän mesen ewe Samol mi Lapalap o asonga i. 7 Manasa a anomu uluulun ewe anüfefin Asera a föri lon ewe imwenfel, iei ewe leni, ewe Samol mi Lapalap a kapas usun ngeni Tafit, pwal ngeni Salomon nöün we mwän, “Ei imwenfel me lon Jerusalem iei ewe leni üa filätä seni lenien ekewe ainangen Israel meinisin, pwe aramas repwe fel ngeniei ie tori feilfeilachök. ✡ 1.King 9.3-5; 2.Kron 7.12-18 8 Üsap chüen mwüt ngeni aramas pwe repwe asüela chon Israel seni ewe fanü üa ngeni ar kewe lewo, are repwe chök tümwünüöchü meinisin mine üa allük ngeniir o aleasochisi ekewe allük meinisin nei we chon angang Moses a allük ngeniir.” 9 Nge ekewe chon Juta resap aleasochis ngeni ewe Samol mi Lapalap. Iwe, Manasa a atokerela pwe ra föri mine a ngau lap seni chon ekewe mwü ra föri, ir chokewe ewe Samol mi Lapalap a aroserela me mwen ekewe aramasen Israel.

10 Iei usun mine ekewe soufos nöün ewe Samol mi Lapalap kewe chon angang ra apasa fän alon, 11 “Manasa ewe kingen Juta a föri ekei föför mi fokun anioput. A föri sokun föför mi ngau lap seni mine ekewe chon Amor ra föri me mwan, o emweni chon Juta ngeni tipis ren an kewe uluulun anümwäl. 12 Iei mine ewe Samol mi Lapalap ewe Koten Israel a apasa, ‘Üpwe awarato won Jerusalem me Juta feiengau mi lapalap, pwe meinisin mi rongorong usun repwe mäirü ren. 13 Üpwe eäni ewe aükükün feiengau ngeni Jerusalem, usun üa eäni ngeni Samaria, o arosala chon, usun üa arosala chon leimwen Ahap. Üpwe alimelimala chon Jerusalem usun eman a alimelima eu sepi o achapätiu. 14 Üpwe pöütala chokewe mi chüen manau seni lein nei armas o asechirelong lepöün chon oputer. Iwe, repwe wiliti liapen me choon wokun chon oputer meinisin, 15 pun ra föri mine a ngau me fän mesei o asongaei seni ewe fansoun ar kewe lewo ra towu seni Isip tori ikenai.’ ”

16 Manasa a pwal niela chomong aramas esap wor ar tipis, pwe ekewe alen Jerusalem ra kula ren cha. Ei a föri lükün ewe tipis, pwe a emweni chon Juta ngeni ar repwe föri mine a ngau me fän mesen ewe Samol mi Lapalap.

17 Nge lusun pworausen än Manasa föför meinisin me ekewe tipis a föri a mak lon puken uruwon ekewe kingen Juta. 18 Iwe, Manasa a mäla, nge ra peiaseni lon ewe tanipi lükün imwan, ewe tanipin Usa. Iwe, Amon nöün we mwän a siwili lon wisan wisen king.

19 Iwe, Amon a ierini rüe me ruu, lupwen a tolong lon wisan wisen king. A nom lon Jerusalem o nemeni Juta lon ükükün ruu ier. Iten inan Mesulemet nöün Harus we fefin seni Jotpa. 20 Amon a föri mine a ngau me fän mesen ewe Samol mi Lapalap, usun Manasa saman we a föri. 21 A apirü föförün saman we o fel ngeni ekewe uluulun anümwäl, saman we a pwal fel ngeni. 22 Amon a likitala ewe Samol mi Lapalap än an kewe lewo we Kot o aleasolap ngeni an kewe allük. 23 Iwe, nöün Amon kewe nöüwis ra rawangauei o niela me lon imwan. 24 Nge ekewe aramasen Juta ra niela chokewe meinisin mi rawangauei ewe king Amon o seikätä Josia nöün we mwän, pwe epwe siwili lon wisan wisen king. 25 Nge lusun pworausen än Amon föför a mak lon puken uruwon ekewe kingen Juta. 26 Iwe, ra peiaseni Amon lon püsin peiasan me lon tanipin Usa, nge Josia nöün we mwän a siwili lon wisan wisen king.