1 Mürin, Salomon a popuetä le aüetä imwen ewe Samol mi Lapalap lon Jerusalem me won ewe chuk Moria, ia ewe Samol mi Lapalap a pwä ngeni Tafit saman we ie. Iei ewe lenien wichiwich umwun wiich än Arauna ewe re Jepus, Tafit a fen amolätä. ✡ Ken 22.22 2 Salomon a popuetä le aüetä ewe imwenfel lon aruuen maram lon ewe arüanün ierin mwün. 3 Iwe, longolongun ewe imwenfel Salomon a föri ükükün langataman tiue fiit, nge ükükün chölapan ilik fiit. 4 Ewe kengkang mi nom mesen ewe imwenfel ükükün langataman ilik fiit, a nönöfengen me chölapen ewe imwenfel, nge tekian ükükün ipükü walik fiit. Iwe, Salomon a apachatä kolt mi mürina me lon. 5 Nge ewe rum mi watte a cheni ngeni pap seni ewe irä saipires o apachatä kolt mi mürina won, a pwal ruputi liosun ewe irä palm me sein won. 6 Iwe, a afouta ewe imwenfel ren fau aüchea me kolt seni ewe fanü Parwaim. 7 A apacha kolt ngeni unusen lon ewe imwenfel: ngeni ekewe irälap, ekewe penkasam, ekewe etip me ekewe asam. A pwal ruputi liosun kerop won ekewe etiip.

8 Salomon a pwal föri ewe rum mi unusen pin. Langatamen ewe rum ükükün ilik fiit, a nönöfengen me chölapen ewe imwenfel, nge ükükün chölapan a pwal ilik fiit. Iwe, a aea rüe me limu ton kolt mi mürina le apachatä ngeni etippen ewe rum mi unusen pin. ✡ Eks 26.33-34 9 Nge choun ekewe chüföl kolt ükükün rüe ounus. Iwe, a pwal apacha kolt ngeni etippen ekewe rumwen won.

10 Iwe, fän iten ewe rum mi unusen pin Salomon a föri uluulun ruoman kerop o apachatä kolt wor. 11 Unusen langatamen pöükässin ekewe kerop ükükün ilik fiit. Iwe, langatamen efoch pöükässin ewe aemanün kerop ükükün fisu esop fiit, a itila o küw etippen ewe imw. Nge langatamen ewe aruofochun pöükässin pwal ükükün fisu esop fiit, a itifengen me pöükässin pwal ewe eman kerop. 12 Langatamen efoch pöükässin ewe aruomanün kerop pwal ükükün fisu esop fiit, a itila o küw pwal etippen ewe imw me epek, nge aruofochun pöükässin a itifengen me pöükässin ewe aemanün kerop. 13 Iwe, langatamen pöükässin ekei ruoman kerop ükükün ilik fiit. Ekewe kerop ra ütä won pecher o sape ngeni ewe rum mi watte. ✡ Eks 25.18-20 14 Iwe, Salomon a pwal föri echö chech seni mangaku mi arauarau me parachol me parapar, pwal mangaku mi pwechepwech, o chüri liosun kerop won. ✡ Eks 26.31

15 Iwe, Salomon a föri ruofoch ür ükükün tekiar lime me ruu fiit o anomuur mesen ewe imwenfel. Won efoch me efoch kewe ür a pwal wor letoner tekian eu me eu ükükün fisu esop fiit. 16 A föri sein mi nut o apacheer ngeni won ekewe ür, a pwal föri ükükün ipükü uluulun apel o fötiretä won ekewe sein. 17 A aüetä ekewe ür mesen ewe imwenfel, efoch a nom peliör, nge pwal ewe efoch a nom peliefeng. Iwe, ewe mi nom peliör a aita ngeni Jakin, nge ewe mi nom peliefeng a aita ngeni Poas.