1 Ämi pwiim kana, oua püsin silei pwe äm churikemi esap lomotongau. 2 Ämi oua silei pwe aia fen küna riaföü me itengau lon Filipi me mwen äm feito remi lon Tesalonika. Inamwo ika a wor chomong chon ü ngenikem, nge ach Kot a ngenikem pwora pwe aipwe aiti ngenikemi ewe Pworausen Manau mi feito seni i. ✡ Föf 16.19-24; 17.1-9 3 Äm afalafal ngenikemi esap longolong won met mi mwäl ika won ekieksolä, sisap pwal atupu eman. 4 Nge iteiten fansoun aia apasatä mine Kot a mochen, pun a apwüngala pwe aipwe fich ngeni an epwe lükü ngenikem ewe Pworausen Manau. Äm aisap mochen apwapwai aramas, nge aia mochen apwapwai Kot ewe mi sotuni ekiekin letipach. 5 Pun oua fokun silei pwe aisap feito remi fän kapas amichimich, aisap pwal aea sokun kapas epwe pwölüela äm tipemong. Kot i nöüch chon pwärätä. 6 Aisap pwal föri met aramas repwe mwareitikem ren, aisap föri ngenikemi, aisap pwal föri ngeni ekoch. 7 Inamwo ika a wor äm pwüüng womi pokiten äm nöün Kraist soukünö, nge aia tipepwetete lupwen aia nonom remi, usun eman in a tümwünü püsin nöün kana. 8 Iwe, pokiten aia fokun tongekemi, aia pwal pwapwa le fang ngenikemi sap chök ewe Pworausen Manau seni Kot, nge pwal püsin manauem, pun aia fokun echenikemi. 9 Ämi pwiim kana, oua fokun chechemeni usun äm angang weires. Äm aia angang lerän me lepwin pwe aisap aweiresikemi lupwen aia afalafala ngenikemi ewe Pworausen Manau seni Kot.

10 Ämi nöüm chon pwärätä, pwal Kot, pwe äm föför ngenikemi ämi mi lükü ewe Pworausen Manau a limöch me pwüng, nge esap wor mwäl lon. 11 Ämi oua silei pwe aia alisi eman me eman leimi usun chök eman sam a alisi püsin nöün kana. 12 Äm aia apöchöküla letipemi o aururukemi, aia pwal allük ngenikemi pwe oupwe manaueni ewe sokun manau mi apwapwai Kot, ewe mi körikemi pwe oupwe eti i lon Mwün me lingan.

13 Iwe, mi pwal wor eu popun pwota sia kilisoufochofoch ngeni Kot. Lupwen sia uwato remi ewe kapasen Kot, oua rongorong ngeni o etiwa. Ousap ekieki pwe kapasen aramas, nge oua etiwa pwe iei wesewesen kapasen Kot. Pun ewe kapas a angang lomi ämi mi lükülük. 14 Ämi pwiim kana, mine a fis ngenikemi a fen fis ngeni än Kot kewe mwichefel lon Jutea, ir chokewe nöün Kraist Jesus. Ämi oua küna riaföü seni püsin chon fanüemi, usun chök ir ra küna riaföü seni ekewe chon Juta, ✡ Föf 17.5 15 ir chokewe mi niela ach Samol Jesus me ekewe soufos, ra pwal ariaföüükem. Ifan me ar asonga Kot! Ifan me ar oput aramas meinisin. ✡ Föf 9.23,29; 13.45,50; 14.2,5,19; 17.5,13; 18.12 16 Ra pwal mwo nge sotuni ar repwe pinekem seni äm afalafala ngeni ekewe chon lükün Israel ewe kapasen Kot mi atoto rer manau. Iei ewe amüchülan me lein ekewe tipis meinisin ra föri seni me lom. Iwe, iei än Kot song a fokun feitiu wor.

17 Ämi pwiim kana, lupwen sia imwüfesen o sia nonom toau senikemi ekis chök fansoun,- ewer, sia chök imwü senikemi ren inisim, nge sap ren lelukem,- äm aia fokun positikemi o achocho ngeni äm aipwe künasefälikemi. 18 Äm aia mochen liwinsefälitikemi. Ngang Paulus üa sotuni ai üpwe liwinsefälitikemi fän ekoch, nge Satan a pinekem. 19 Pun ämi chök popun äm apilükülüköch, äm pwapwa, pwal popun äm aingaing lon äm win mwen mesen ach Samol Jesus lupwen epwe liwinsefälito. 20 Enlet, ämi chök popun äm ling me äm pwapwa!