1 Iwe, iei usun pwüngün met oua makketo rei fän iten ekewe mongö aramas ra asor ngeni ekewe uluulun anümwäl. Ewer, a fokun let pwe “oukich meinisin a wor ach silelap”, usun ra apasa. Nge ei sokun silelap a afisätä lamalamtekia, nge chen a afisätä fisiöchün ach souläng. 2 Iö aramas a ekieki pwe a wor an silei lon ekoch mettoch, ätei esap mwo wor wesewesen ürürün met epwe silei. 3 Nge ewe aramas mi echeni Kot a sil me ren Kot.

4 Iwe, usun ach mongö ekewe mongö ra asor ngeni ekewe uluulun anümwäl: Kich sia silei pwe eu uluulun anümwäl a aliosunätä och mettoch esap fokun wor. Kich sia silei pwe mi wor eman chök Kot. 5 Pun inamwo ika ekoch ra apasa pwe mi wor “kot” lon läng ika won fanüfan, pwal inamwo ika a wor chomong ekei sokun “kot” me “samol”, 6 nge fän itach mi wor eman chök Kot, i ewe Sam mi föri mettoch meinisin, nge kich sia manau fänäsengesin. Sia pwal eäni eman chök Samol, Jesus Kraist, mettoch meinisin ra för ren o kich sia manau ren.

7 Nge sap aramas meinisin ra silei ei let. Ekoch aramas ra chüen örüni angang ngeni anümwäl tori ikenai, pwe lupwen ar mongö ewe mongö ra chüen ekieki, pwe ewe mongö aramas ra wesewesen asomä ngeni ekewe uluulun anümwäl. Mwelien letiper a apwangapwang, iei mine ra mefi pwe ra limengau ren ewe mongö. 8 Iwe, mongö esap alisikich lon ach chiechi ngeni Kot. Sisap lus och are sisap mongö och, sisap pwal feiöch ren are sia mongö och.

9 Nge oupwe chök föröchü, pwe mine oua föri lon ämi ngasala esap wiliti eu lenien chepetek ngeni ekewe mi apwangapwang lon ar lükü. 10 Pun are eman aramas mi apwangapwang mwelien letipan epwe künok, en mi silelap, pwe ka mongö lon imwenfelin eman uluulun anümwäl, ifa usun, ei esap apöchöküla letipan an epwe pwal mongö ekewe mongö ra asor ngeni ekewe uluulun anümwäl? 11 Iei usun pwiüm mi apwangapwang, ätewe Kraist a mäla fän itan, epwe pöütmwälila pokiten om silelap. 12 Lupwen ka tipis ngeni pwiüm lon ei sokun lapalap o afeiengaua mwelien letipan mi apwangapwang, ka tipis ngeni Kraist. 13 Iei mine are pwii a tolong lon tipis pokiten mine üa mongö, üsap fokun chüen ochochsefäl fituk, pun üsap mochen pwe pwii we epwe tolong lon tipis.