1 Ämi pwiim kana, iei soposopolan met oua kaiö senikem usun ewe sokun manau oupwe manaueni pwe oupwe apwapwai Kot ren. Ewer, iei usun mine oua fen manau lon. Nge iei äm aia tüngormau o pese ngenikemi fän iten ach Samol Jesus, pwe manauemi epwe fokun mürinala. 2 Pun oua fen silei ekewe kapasen öüröür aia ngenikemi fän alon ach Samol Jesus. 3 Pun iei letipen Kot pwe oupwe pin o unusen ngas seni sokun föförün lisowu. 4 Ämi mwän kana, eman me eman leimi epwe silei usun an nomofengen me pwülüan fän pin me üöch, 5 esap fän mocheisou usun ekewe aramas mi nom lon rochopwak resap silei Kot. 6 Iwe, ren ei lapalap esap wor eman mwän epwe föri och mi mwäl ngeni chiechian souläng ika föri angangen atuputup ngeni. Äm aia fen ürenikemi ei me mwan o aia fokun fönöü ngenikemi, pwe ach Samol epwe apwüngü chokewe mi föri ei sokun föför mi ngau. 7 Pun Kot esap körikich pwe sipwe manau lon ei sokun manauen mocheniangau, nge a körikich pwe sipwe manaueni eu manau mi pin. 8 Iei mine iö a pöütala ekei kapasen fön, esap pöütala kapasen aramas pwe kapasen Kot, ewe mi fang ngenikich ngünün we Ngünmifel.

9 Iwe, esap wor lomoten äm aipwe mak ngenikemi usun ämi oupwe echeni chiechiemi kewe souläng, pun püsin Kot a fen aiti ngenikemi usun ämi oupwe echenifengenikemi lefilemi. 10 Enlet, oua fen echeni pwimi kewe souläng meinisin lon Masetonia. Iei mine pwiim kana, aia tüngormau ngenikemi, oupwe alapala ämi echenifengenikemi lefilemi. 11 Oupwe achocho ngeni ämi oupwe manaueni eu manau mi mosonoson, oupwe en me püsin föri an angang o anganga met oupwe manau ren usun aia fen ürenikemi me mwan. 12 Are oua föri ei, chokewe resap lükü Jesus repwe meninitikemi, ousap pwal tüngor än eman epwe fang ngenikemi met oua osupwang ren.

13 Ämi pwiim kana, äm aia mochen pwe oupwe silei mine a let usun chokewe mi mäla, pwe ousap lolilen usun chokewe esap wor ar apilükülüköch. 14 Sia lükü pwe Jesus a mäla o manausefälitä, iei mine sia pwal lükü pwe Kot epwe aliwinisefäli Jesus me chokewe mi mäla lon ar lükü i. 15 Mine aia aiti ngenikemi iei alon ach Samol: Kich mi chüen manau ngeni ewe rän ach Samol epwe liwinsefälito lon sisap akom mwen chokewe ra fen mäla. 16 Pun püsin ach Samol epwe feitiu me läng fän mwelian mi leüömong, fän mwelien ewe samolun chon läng, pwal fän puun nöün Kot rappwa. Iwe, chokewe ra fen mäla lon ar lükü Kraist repwe akomwen manausefäl. 17 Mürin kich mi chüen manau ngeni ena fansoun sipwe etekitä o chufengen me ir lon kuchu, pwe sipwe churi ach Samol lon längin asepwäl. Iei usun sipwe nonomfengen me ach Samol fansoun meinisin. ✡ 1.Kor 15.51-52 18 Iei mine oupwe echipafengenikemi ren ekei kapas.