Chru RÔMA 6

RÀI HƠDIŬ HŨ PƠSƠLIH BƠRHƠU

(Mư̆ng tăl 6:1 truh tăl 8:39)

Mơtai Sơ̆ng Gah Glài-Sơnoh Bloh Hơdiŭ Wơ̆ Sơ̆ng Pô Krist

1 Nư̆n buơl gudrơi rơŭ đờm hơyơu? Buơl gudrơi kừ sơđaŭ hơdiŭ lăm glài-sơnoh tô pơnuaĭ anĭt-brơi-soh hũ dơlah-dơlài? 2 'Buh tŭ lơi yơu nư̆n! Buơl gudrơi hũ mơtai bơjơ sơ̆ng gah glài-sơnoh, nư̆n ngă hơyơu kừ hơdiŭ mĭt lăm glài-sơnoh jiơ̆ng? 3 Buơl adơi-ai 'buh thơu lài: tŭ abih buơl gudrơi hũ đồ-mă pơnuaĭ 'baptem lăm Yàng Jêsu Krist, la buơl gudrơi hũ kŏng 'baptem lăm pơnuaĭ mơtai Pô ơu? 4 Yơu nư̆n, kơyoa pơnuaĭ 'baptem, buơl gudrơi hũ dơ̆r sơ̆ng Pô lăm pơnuaĭ mơtai Pô, tô gơnừm tơ pơnuaĭ màng-kơc̆rà Pô Yàng Ama bloh Pô Krist hũ hơdiŭ wơ̆ mư̆ng pơnuaĭ mơtai hơyơu lơi, nư̆n buơl gudrơi kŭng hơdiŭ lăm rài hơdiŭ bơrhơu yơu nư̆n rơi. 5 Kơyoa yah buơl gudrơi hũ tơbiă jiơ̆ng sa sơ̆ng Pô lăm pơnuaĭ mơtai Pô hơyơu lơi, nư̆n nìn-kơjăp biă buơl gudrơi kŭng rơŭ hũ tơbiă jiơ̆ng sa sơ̆ng Pô lăm pơnuaĭ hơdiŭ wơ̆ Pô kŭng mơhiơ̆ yơu nư̆n rơi. 6 Buơl gudrơi thơu lài anà mơnih klă buơl gudrơi hũ kŏng pơ̆ng lăm kơyơu pơkăl sơ̆ng Pô bơjơ, tô anà mơnih klă kơyoa glài-sơnoh apăn-akŏ kŏng pơluĭ-pơlơhiă, sơ̆ng buơl gudrơi 'buh dò ngă hơlŭn-hơlă tơ glài-sơnoh tra. 7 Kơyoa mơnih lơi mơtai bơjơ nư̆n hũ tơbiă klàh mư̆ng gơnuăr glài-sơnoh. 8 Bloh yah buơl gudrơi hũ mơtai găm sơ̆ng Pô Krist, nư̆n buơl gudrơi păng-tui lài buơl gudrơi kŭng rơŭ hơdiŭ găm sơ̆ng Pô rơi. 9 Buơl gudrơi thơu lài Pô Krist hũ hơdiŭ wơ̆ mư̆ng pơnuaĭ mơtai, nư̆n rơŭ 'buh tŭ lơi mơtai tra; pơnuaĭ mơtai 'buh dò apăn-akŏ tơ ngŏ Pô tra. 10 Kơyoa Pô hũ mơtai, la mơtai tơ glài-sơnoh sa amăng tơ̆l abih; bloh tŭ ni Pô hơdiŭ, nư̆n la hơdiŭ tơ Yàng Pô Lơngì. 11 Yơu nư̆n, buơl adơi-ai kŭng păl c̆ơ drơi yơu mơtai bơjơ mư̆ng glài-sơnoh, sơ̆ng dò hơdiŭ tơ Yàng Pô Lơngì lăm Yàng Jêsu Krist.

12 Yơu nư̆n, juơi luơi glài-sơnoh apăn-akŏ lăm rùp-phàp buơl adơi-ai, la rùp-phàp păl mơtai, ngă tơ buơl adơi-ai păl ngă tui du pơnuaĭ hàm-khiăng ñu. 13 Juơi jào rùp-phàp drơi ngă phơ̆n angui tô ngă pơnuaĭ 'buh rĭng-tơpă, duh bruă tơ glài-sơnoh, bloh păl pơyă bĕ rùp-phŭn buơl adơi-ai tơ Yàng Pô Lơngì, yơu du anà mơnih mư̆ng anih mơtai hơdiŭ wơ̆, sơ̆ng pơyă rùp-phàp drơi ngă jiơ̆ng phơ̆n angui tơ pơnuaĭ rĭng-tơpă, bloh duh bruă Yàng Pô Lơngì. 14 Glài-sơnoh rơŭ 'buh hũ gơnuăr apăn-akŏ tơ ngŏ buơl adơi-ai ơu, kơyoa buơl adơi-ai 'buh dò tơ ala pơnuaĭ adăt-adia, bloh dò tơ ala pơnuaĭ anĭt-brơi-soh.

Hơlŭn-Hơlă Pơnuaĭ Rĭng-Tơpă

15 Yơu nư̆n păl ngă hơyơu? Kơyoa buơl gudrơi 'buh dò tơ ala pơnuaĭ adăt-adia, bloh dò tơ ala pơnuaĭ anĭt-brơi-soh, nư̆n buơl gudrơi rơŭ kừ ngă glài-sơnoh mĭt? 'Buh tŭ lơi yơu nư̆n ơu! 16 Buơl adơi-ai 'buh thơu lài yah buơl adơi-ai hũ jào rùp drơi ngă hơlŭn-hơlă tô păng-bơbah ngă tui mơnih lơi, nư̆n buơl adơi-ai la hơlŭn-hơlă tơ mơnih drơi păng-bơbah ngă tui: halài ngă hơlŭn-hơlă glài-sơnoh, nư̆n rơŭ păl mơtai; halài ngă hơlŭn-hơlă duh bruă Yàng Pô Lơngì, nư̆n rơŭ hũ tơbiă jiơ̆ng rĭng-tơpă. 17 Bloh ưnjơmừn Yàng Pô Lơngì, kơyoa mư̆ng dơlhơu thrơi buơl adơi-ai sơđaŭ la hơlŭn-hơlă tơ glài-sơnoh, bloh ni abih hơtai-hơtiàn păng-bơbah ngă tui pơnuaĭ pơto-pơđăr hũ jào tơ buơl adơi-ai, 18 sơ̆ng buơl adơi-ai hũ dŏng-tơleh klàh mư̆ng glài-sơnoh, tơbiă jiơ̆ng hơlŭn-hơlă tơ pơnuaĭ rĭng-tơpă bơjơ. 19 Dơlhă đờm tui pơnuaĭ anà mơnih rài ni jiăng đờm, kơyoa rùp-phàp drah-rơlo buơl adơi-ai sơđaŭ dò lơmŭn 'buh pràn-khăng. Kơyoa yơu dơlhơu thrơi, buơl adơi-ai hũ jào rùp-phàp drah-rơlo drơi tô ngă hơlŭn-hơlă tơ pơnuaĭ sơŭ-sơnoh sơ̆ng pơnuaĭ mơsak-jơhà hơyơu lơi, nư̆n tŭ ni, pơyă bĕ rùp-phàp drah-rơlo buơl adơi-ai tô ngă hơlŭn-hơlă tơ pơnuaĭ rĭng-tơpă, tô hũ tơbiă jiơ̆ng sơc̆ih-sri, kŭng yơu nư̆n rơi. 20 Kơyoa tŭ buơl adơi-ai dò la hơlŭn-hơlă tơ glài-sơnoh, nư̆n buơl adơi-ai hũ akŏ-lơhuai tơkai-lơnàng sơ̆ng pơnuaĭ rĭng-tơpă. 21 Tŭ nư̆n buơl adơi-ai rì-mă hũ bơnga boh hơgĕ, kơyoa ngă du bruă bloh hơrơi ni buơl adơi-ai păl mơlơu alah? Kơyoa pơnuaĭ luĭ-dŭt du bruă nư̆n mĭn la pơnuaĭ mơtai. 22 Bloh tŭ ni buơl adơi-ai hũ toh-tơleh klàh mư̆ng glài-sơnoh sơ̆ng hũ tơbiă jiơ̆ng hơlŭn-hơlă Yàng Pô Lơngì, nư̆n bơnga boh buơl adơi-ai rơŭ đồ-mă hũ la pơnuaĭ tơbiă jiơ̆ng sơc̆ih-sri, sơ̆ng hơdơi luĭ rơŭ đồ-mă pơnuaĭ hơdiŭ rài pơdò rài. 23 Kơyoa priă-blàn bloh glài-sơnoh c̆iŭ tơ aràng, la pơnuaĭ mơtai; bloh pơnuaĭ brơi-soh mư̆ng Yàng Pô Lơngì la pơnuaĭ hơdiŭ rài pơdò rài lăm Yàng Jêsu Krist, Yàng buơl gudrơi.

RÔMA
<
6
>