1 Ca²³tɨ́³ jmɨ́ɨ² 'e³ ca²³'ée²³ dsa³ Jesús ñʉ'²³ 'ñʉ́² gáan³ je² mi³gáan³ Dios dsa³ Israel. Ca²³'ɨ́ɨ³ júu² dxʉ́²³ quiee'³² Dios. Ca²³lǿn²³ mɨ³lén² te'²³ juii² jmii³ dsa³ quia̱'² te'²³ dsa³ 'e²³ ley quia̱'² te'²³ dsa³ mɨ³dxún²³. 2 Ca²³jua'³te'²³ ca²³sɨ'²³te'²³ Jesús:

―Rɨ²juɨɨ'n³¹nu³ jnee'³¹ 'e³ 'ee² ta² quié̱n² 'e³ jmeen³ la²³jɨ³ 'e³ jmeen³. ¿'I̱i̱² sɨɨ'³¹ 'i³ ca²³cuǿø²³ 'nʉ³ ta² 'e³ quié̱n²?

3 'E³ jo̱³ ca²³jua'³ Jesús. Ca²³sɨ'²³ dsa³ 'í³:

―Xa³ co̱o̱³ júu² 'e³ rɨ²ŋɨ'n¹na²³ 'nee'²³ jné² co̱'³. Rɨ²juɨɨ'³¹ra'³ jné² jo̱o̱²³na²³: 4 ¿'I̱i̱² sɨɨ'³¹ 'i³ ca²³cuǿ³ ta² 'e³ có̱²³ Juan 'e³ ca²³xáan² dsa³ jmɨɨ³? ¿'A² Dios 'i³ jen³¹ yʉʉ'³¹ güii³ ca²³cuǿ³ ta² 'e³ có̱²³? ¿'A² dsa³ hua² ca²³cuǿ³ ta² 'e³ có̱²³?

5 'E³ jo̱³ ca²³sɨ́n²³ júu² la²³ co̱³quie'² miin²³. Ca²³jua'³te'²³:

―¿Jmii'³¹ cu³lø³¹ rɨ²juaa'²ra² cu²ne²ra²? Qui² xi³nu³ rɨ²juaa'²ra²: “Dios ca²³cuǿ³ ta² 'e³ ca²³jmée³ Juan”, 'e³ jo̱³ rɨ²³jua'³ 'ñée²: “¿'Ee² lǿ² 'a²³jia'³ ca²³táan³na'³ júu² 'e³ ca²³lʉ́³ jo̱o̱²³na²³?” 6 'E³ quie'²³ xi³nu³ rɨ²juaa'²ra²: “Dsa³ hua² ca²³cuǿ³ ta² 'e³ có̱²³”, bi²³ rɨ²³cuǿ²³ cú̱u̱² quiée²ra² la²³jɨn³ dsa³. Qui² sɨ³táan³te'²³ 'e³ ca³quie̱e̱² ca²³'ɨ́ɨ³ Juan júu² quiee'³² Dios.

7 'E³ jo̱³ ca²³jua'³te'²³:

―'A²³jia'³ ne³ra'³¹ 'e³ 'i̱i̱² sɨɨ'³¹ ca²³cuǿ³ ta² 'e³ có̱²³ Juan.

8 'E³ jo̱³ ca²³jua'³ Jesús. Ca²³sɨ'²³ dsa³ 'í³:

―'E³ quie'²³ la'³, 'a²³jia'³ jmɨ́ɨ² rɨ²juøøn³¹na¹ 'nee'²³ 'e³ 'i̱i̱² sɨɨ'³¹ ca²³cuǿ³ ta² 'e³ quie̱e̱n²³² 'e³ jmeen²³ 'e³ la²³ jmeen²³.

9 'E³ quie'²³ jo̱³ ca²³tín²³ ca²³lʉ́³ Jesús júu² la³ 'e³ jmee²³ lii²³ 'e³ jmii'³¹ lǿ² rɨ²³jme'²³te'²³ 'ñée². Ca²³jua'³:

―La²³ cu²ru'³ xen³ jø̱n³ dsa³ 'i³ ca²³jñi³ xoo'³¹ jø'² 'uǿ²³ quiee'³². Jo̱³ tu³ ca²³cuǿø²³ dsa³ 'uǿ²³ quiee'³² 'e³ rɨ²³jmóo²te'²³ ta² quiee'³² xoo'³¹ jø'². 'E³ quie'²³ jo̱³ bi²³ huǿø³ ŋóo² 'ñée² co̱o̱³ juɨɨ³ je² bi²³ huɨ̱́ɨ̱³. 10 Ma²ca¹tɨ́³ ji̱i̱³ 'e³ jioo³² dsa³ mɨ²jø'², ca²³xíin²³ jø̱n³ mozo quien³². 'E³ jo̱³ ŋóo² mozo i²joon³ dsa³ 'i³ mi³qui³ xoo'³¹ jø'². Ca²³ŋɨ'²³ ca³juɨ² mɨ²jø'² jñii³¹ 'uǿ²³. 'E³ quie'²³ 'a²³jia'³ ca²³la²³dxʉ́²³ dsɨ́²te'²³ 'e³ rɨ²³jɨ̱'²te'²³. Te³ ca²³cuǿ³te'²³ quie'² mozo 'i³ ca²³xíin²³ juii² 'uǿ²³. 'A²³'e³ xa³ jñii³¹ 'uǿ²³ 'e³ quie̱³ mozo 'e³ la²³ ca²³cu²³dxe'n³te'²³. 11 'E³ quie'²³ jo̱³ ca²³xíin²³ juii² jia'³ cɨ'²³ mozo co̱'³. 'E³ jo̱³ ca²³cuǿ³te'²³ quie'² mozo 'í³ co̱'³. Bi²³ u²³'i'²³ ca²³jme'²³te'²³ mozo 'í³. 'A²³'e³ xa³ jñii³¹ 'uǿ²³ 'e³ quie̱³ mozo 'í³ 'e³ la²³ ca²³cu²³dxe'n³te'²³ co̱'³. 12 'E³ quie'²³ jo̱³ ca²³xíin²³ juii² jia'³ cɨ'²³ mozo je² sɨ³tɨ́²³ aan³. Ca²³jme'²³te'²³ mozo 'í³ co̱'³. Bi²³ xa³ je² ca²³lǿ²³ quie'². Jo̱³ tu³ ca²³dxin³te'²³ mozo.

13 ’'E³ jo̱³ ca²³lǿn³ juii² xoo'³¹ jø'²: “¿Jmii'³¹ rɨ²jmeen²³² cu²ne²ra²? Ja̱a̱n²³ 'i³ bi²³ 'náan²³na²³ cɨ'²³ rɨ²sɨɨn³¹na¹ co̱'³. Co̱'³ xi² rɨ²³'áa²³te'²³ u²³go³ u²³'iʉʉ²³ quia̱'²te'²³ ja̱a̱n²³”, lǿn³ 'ñée². 14 Ma²ŋo²³² dsa³ 'i³ jmoo³² ta² quiee'³² xoo'³¹ jø'² 'e³ mɨ³dxóo² jo̱o̱³¹, ca²³sɨ́n²³ miin²³ la²³ co̱³quie'²: “'I³ la³ dsa³ 'i³ rɨ³lø³¹ 'i'²³ 'e³ rɨ²³'ióo²³ 'uǿ²³ mɨ³rɨ³jú̱n³ jmii³. Mɨ²³gui²³²ra². Mɨ²³jŋɨ'n²³na² jo̱o̱²³na²³. Qui² jo̱³ hua² rɨ²³'ióo²³ra² miin²³na² 'e³ rɨ³lø³¹ 'i'²³ 'e³ rɨ²³'ióo²³ 'ñée².” 15 'E³ quie'²³ jo̱³ ca²³juén²te'²³ rɨ²³co'²³ 'iá³. Jo̱³ tu³ ca²³jŋɨ'n²³te'²³.

’¿Jmii'³¹ rɨ²³jmée²³ juii² 'uǿ²³ rɨ²³jme'²³ dsa³ 'í³, lǿn³na'³? 16 Rɨ²³güe'n²³ co̱'³. Rɨ²³jŋɨ'n²³ dsa³ 'i³ jmoo³² ta² quiee'³² xoo'³¹ jø'², ¿mɨ³naa'³¹? Rɨ²³cuǿø²³ jia'³ cɨ'²³ dsa³ 'uǿ²³ quiee'³² 'e³ cu²jmóo¹te'²³ ta² quiee'³² xoo'³¹ jø'². ―La'³ ca²³jua'³ Jesús.

Ma²ca¹núu³te'²³ júu² 'e³ ca²³lʉ́³, ca²³jua'³te'²³:

―¡'A²³jia'³ 'ne'² rɨ²³lí³ la'³!

17 'E³ quie'²³ Jesús ca²³jóon² dsa³. Ca²³jua'³:

―¿Jmii'³¹ cu³lø³¹ 'née²³ rɨ²³jua'³ júu² quiee'³² Dios 'e³ to̱o̱²³ ji³, lǿn³na'³? Qui² to̱o̱²³ ji³ je² jua'³:

19 'Née²³ juii² jmii³ dsa³ quia̱'² dsa³ 'e²³ ley 'e³ xe̱'n² quie'²³ jo̱³ rɨ²³sø̱'n²te'²³ Jesús. Qui² ca²³la²³quii²³te'²³ 'e³ miin²³ hua² ca²³'én² Jesús ma²ca¹lʉ́³ júu² quiee'³² xoo'³¹ jø'². 'E³ quie'²³ bi²³ 'ñaa'n²³te'²³ dsa³ juɨɨ³.

20 Ca²³jmóo² 'i'²³ te'²³ juii² jmii³ dsa³ quia̱'² te'²³ dsa³ 'e²³ ley 'e³ jmii'³¹ rɨ²³li²³tɨ́ɨ²³ quie'²te'²³. 'E³ jo̱³ ca²³xíin²³te'²³ dsa³ 'i³ ca²³tén² Jesús. Ca²³jmóo²te'²³ 'e³ bi²³ 'née²³te'²³ 'e³ rɨ²³núu²³te'²³ júu² quiee'³² Jesús. 'E³ quie'²³ te³ ca²³jmóo²te'²³ guóo². Qui² 'née²³te'²³ rɨ²³jáan²³te'²³ júu² quiee'³² 'e³ la²³ rɨ²³lí³ juø'² rɨ²³ta̱a̱'n³te'²³ guoo³ dxi² juɨɨ³ pii'². 21 'E³ jo̱³ ca²³jua'³te'²³ ca²³sɨ'²³te'²³ Jesús:

―Dsa³ 'e²³, ne³ra'³¹ 'e³ lʉ́n² 'e³ ca³dsaan³², 'e³ 'en³ ca³dsaan³². 'A²³jia'³ jmeen³ 'i'²³ xi³ gáan³ dsa³, xi² la³dsɨɨ³² dsa³. Lʉ́n² ju²dsoo³¹ 'e³ la²³ 'en³ jui³¹ quiee'³² Dios. 22 ¿'A² rɨ²jméen² co̱o̱³ mɨ²'áa² rɨ²juɨɨ'n³¹nu³ jnee'³¹ xi² joo'²³ 'e³ rɨ²qui²³²ra² cuu² 'e³ cu'n³² 'io'² 'i³ xiin²³ dxi² juɨɨ³ César?

23 'E³ quie'²³ ñi³² Jesús 'e³ jmii'³¹ 'nɨɨ'n³¹ jmoo³²te'²³ lá³. 'E³ jo̱³ ca²³jua'³ 'ñée². Ca²³sɨ'²³ dsa³ 'i³ co̱³² tóo³:

―¿'Ee² lǿ² 'e³ 'noo³ra'³ rɨ²jmée²ra'³ lá³ quia̱'n²na'³ jné²? 24 Ja³ maan²³² la³ co̱o̱³ cuu². ¿'I̱i̱² sɨɨ'³¹ quie'² ne'n² 'e³ to̱o̱²³ la³? ¿'I̱i̱² sɨɨ'³¹ quie'² nombre 'e³ to̱o̱²³?

―'E³ quiee'³² dxi² juɨɨ³ César ―ca²³jua'³te'²³.

25 'E³ jo̱³ ca²³jua'³ Jesús. Ca²³sɨ'²³ dsa³ 'í³:

―Rɨ²cuøø³¹ra'³ dxi² juɨɨ³ la²³jɨ³ 'e³ quiee'³² dxi² juɨɨ³. 'E³ quie'²³ rɨ²cuøø³¹ra'³ Dios la²³jɨ³ 'e³ quiee'³² 'ñée² Dios.

26 'E³ jo̱³ 'a²³jia'³ ca²³lǿ²³ juø'² ca²³jáan³te'²³ júu² quiee'³² xi²ñi² dsa³. 'E³ quie'²³ te³ ca²³cɨ́n³ ca²³gǿn³te'²³. Qui² bi²³ juø'²³ ca²³núu³te'²³ júu² quiee'³².

27 Xen³ dsa³ saduceo 'i³ ca²³dxi²³guín²³ caan²³ Jesús. Jua'³ dsa³ saduceo 'e³ 'a²³jia'³ sɨ³ji̱i̱'²³ dsa³ co̱'³. Xa³ co̱o̱³ júu² 'e³ ca²³ŋɨ'²³te'²³ Jesús. Ca²³jua'³te'²³:

28 ―Dsa³ 'e²³, la²³la³ cu³lø³¹ jua'³ ji³ 'e³ ca²³jmée³ Moisés 'e³ xa³ quiée²ra², ¿mɨ³naa'³¹?: Xi³nu³ rɨ²³jú̱n³ jø̱n³ dsa³ 'i³ xen³ mɨ²³quie'², 'e³ quie'²³ 'a²³'i̱³ xen³ jo̱o̱³¹, 'ne'² rɨ²³tǿø²³ mɨ́³ 'nɨ́ɨ³ jó̱o̱² dsa³ 'i³ jú̱n²³ 'e³ jua'³ cu²li³xen³ 'é̱e̱² jo̱o̱³¹ 'lɨ² jó̱o̱². La'³ cu³lø³¹ jua'³ ji³, ¿mɨ³naa'³¹? 29 Xen³ guiáan²³ dsa³ la²³ ca³já̱a̱n². Tǿø² mɨ́³ jó̱o̱² 'i³ cua̱a̱n²³. 'E³ quie'²³ 'íi² li²³xen³ jo̱o̱³¹ 'e³ jú̱n²³ 'ñée². 30 Tǿø² mɨ́³ 'nɨ́ɨ³ 'í³ jó̱o̱² 'i³ sɨ³tɨ́²³ áan²³. 'E³ quie'²³ 'íi² li²³xen³ jo̱o̱³¹ 'e³ jú̱n²³ 'i³ 'í³ co̱'³. 31 'E³ jo̱³ tǿø² mɨ́³ 'nɨ́ɨ³ 'í³ jó̱o̱² 'i³ sɨ³tɨ́²³ aan³. 'E³ quie'²³ la'³ la²³jɨn³. 'E³ quie'²³ 'a²³'i̱³ jo̱o̱³¹ ca²³la²³xen³ cɨ'³ la²³ jø̱n³ 'e³ jú̱n²³te'²³. 32 Je² dsøn³ cɨ² jú̱n²³ 'ñée² mɨ́³ co̱'³. 33 ¿'I̱i̱² quién² mɨ́³ 'í³ mɨ³rɨ³ji̱i̱'²³ dsa³ co̱'³ cu²ne²ra²? Qui² ca²³la²³quia̱'² la²³jɨn³ guiáan²³.

34 'E³ jo̱³ ca²³jua'³ Jesús. Ca²³sɨ'²³ dsa³ saduceo:

―Tøø²³ mɨ́³ dsa³ 'i³ xen³ mɨ³¹güii³ la³. Cuøn³² dsa³ mɨ́³ 'e³ tøø²³ dsa³. 35 'E³ quie'²³ 'a²³la³ ma²³ la'³ rɨ²³jmóo² dsa³ 'i³ jua'³ Dios 'e³ joo'²³ rɨ²³ji̱i̱'²³ co̱'³ yʉʉ'³¹ güii³. Núu²³ 'a²³jia'³ ma²³ rɨ²³tǿø²³ dsa³ mɨ́³. 'E³ quie'²³ 'a²³ cɨ'²³ ma²³ rɨ²³cuǿn² jo̱²³mɨɨ³¹ quie'² dsóo²³. 36 Qui² 'a²³jia'³ ma²³ rɨ²³lí³ juø'² rɨ²³jú̱n³ dsa³ núu²³. Núu²³ xen³te'²³ la²³ xen³ ángeles. Rɨ³løn³¹ jo̱o̱³¹ Dios la²³jɨn³. Qui² mɨ³ji̱i̱'n²³te'²³ co̱'³. 37 Ca²³jmée³ lii²³ 'ñée² Moisés 'e³ sɨ³ji̱i̱'²³ dsa³ co̱'³. Jmee²³ lii²³ júu² quiee'³² Dios je² to̱o̱²³ 'e³ jmii'³¹ lǿ² 'e³ 'iún² Dios xoo'³¹ nuu³ ma²ca¹lʉ́³ quia̱'² Moisés. La²³la³ cu³lø³¹ ca²³jua'³: “Dios juii² Abraham hua² jné². Dios juii² Isaac. Dios juii² Jacob co̱'³.” La'³ cu³lø³¹ to̱o̱²³ ji³ je² 'en³² Dios Juii³ra². 38 Qui² 'a²³jia'³ rɨ³løn³¹ Dios juii² dsa³ 'i³ rɨ³jú̱n². 'E³ quie'²³ rɨ³løn³¹ juii² dsa³ 'i³ rɨ³ji̱'²³. Rɨ³ji̱'²³ quie'²³ dsɨ́² la²³jɨn³ dsa³ ji̱'²³ Dios, juø'n³ quie'²³ mɨ³xa³ jmɨ́ɨ² jú̱n²³ jmɨ² ŋu². ―La'³ ca²³jua'³ Jesús. Ca²³sɨ'²³ dsa³ saduceo.

39 'E³ jo̱³ ca²³jua'³ ca³dxáan² dsa³ 'e²³ ley:

―Dsa³ 'e²³, bi²³ dxʉ́²³ mɨ³lʉ́n².

40 'A²³jia'³ ma²³ ca²³la²³bii²³ dsɨ́²te'²³ 'e³ ca²³ŋɨ'²³te'²³ júu².

41 Co̱'³ cɨ'²³ ca²³jua'³ Jesús. Ca²³sɨ'²³ dsa³ saduceo:

―¿Jmii'³¹ lǿ² 'e³ jua'³te'²³ 'e³ dsa³ ju̱u̱n²³ David rɨ³løn³¹ Cristo 'i³ rɨ²³xíin²³ Dios? 42 Qui² 'ñée² David ca²³jua'³ 'e³ la²³ to̱o̱²³ ji³ 'e³ xi̱i̱n³ Salmos je² 'en³² Cristo. La²³la³ cu³lø³¹ ca²³jua'³:

45 Je² nuu³ la²³jɨn³ dsa³ ca²³jua'³ Jesús. Ca²³sɨ'²³ dsa³ quien³²:

46 ―'A²³ rɨ³co̱³ra'³ tɨ³² 'i'²³ quiee'³² dsa³ 'e²³ ley. Qui² bi²³ mi³gáan³ miin²³. Bi²³ la²³ŋɨ́²³te'²³ la²³ca̱a̱n³ 'e³ quii'³te'²³ cuo̱o̱³ cuaa³. 'Née²³te'²³ 'e³ rɨ²³cuǿ²³ dsa³ u²³juee'n³¹ quia̱'²te'²³ je² dxa²³ dsa³ 'moo'². 'Née²³te'²³ 'e³ rɨ²³gua³te'²³ je² dxʉ́²³ cɨ² ñʉ'²³ 'ñʉ́² je² mi³gáan³ dsa³ Dios. 'Née²³te'²³ rɨ²³gua³te'²³ sii³¹ je² gua³ dsa³ gáan³ 'e³ la²³ tøø³te'²³ 'e³ rɨ²³e'². 47 Je̱'n³²te'²³ 'ñʉ² mɨ́³ 'nɨ́ɨ³. Bi²³ huǿø³ lʉ²³te'²³ quia̱'²te'²³ Dios 'e³ jua'³ cu²jóo¹ dsa³. 'E³ jo̱³ bi²³ cɨ² rɨ²³jmée²³ Dios jñiin²³te'²³.